Read Nhengatu Kulusuwaraita 1 Bible Online

Kulusuwaraita 1 - Nhengatu bible

Kulusuwaraita 1

¹Ixe Paulu, Jesus Kristu umunduwaa ixe kuaye Deus uputariwaa yawe, ae yuiri yanemu Timuteu.

²Penye arama penye uruyariwaita, yanemuita uikuwaita santa Kristu rese Kulusuwaraita, yanepaya Deus uxari penye arama ipurangasawa itimaaresesawa yuiri.

³Yawewarawate yamee purangawaa ixupe kua yaneruixawa Deus Jesus Kristu ipaya yapurandu rame perese.

⁴Nyãse yasendu peresewara peruyari puranga Kristu Jesus nyenga, pegustari yuiri puranga panye kuaita uruyariwaita.

⁵Sesewara kua pesaruwaa pemaa iwaka kiti, kuxima pesendu sesewara nyenga supiwa irumu nyenga purangawaa rese.

⁶Kua nyenga usikana pepiterupi, kuaye usikawaa yawe panye kua mundu kiti, asui uxari iya ae aintapiterupi, uyukiriari yuiri puranga, yawete yuiri pepiterupi ae pesendu rire ae pekuawa rire supiwa kua Deus purangasawa.

⁷Kuaye umbuewaa yawe penye kua Epafra yagustariwaa upurakiwaa yaneirumu, upuraki puranga Kristu supe arama peresewara.

⁸Ae yuiri uxari pekuawa pegustari puranga Espiritu irumu.

⁹Sesewara yande yuiri yasendu rire peresewara, timaa yanekuere yapurandu perese; yapurandu uxari arama teresemu pepia upe ukuawasawa irumu, pekuawa arama kuaye uputariwaa yawe kua Espiritu, uxari arama pekuawa puranga pemanduarisawa puranga yuiri.

¹⁰Pewata puranga kua mundu upe kuaye yaneruixawa uputariwaa yawe, suuri arama ae, puranga iya arama penye pemunyawaita purangawaita irumu, peyukiriari arama Deus ukuawasawa rese.

¹¹Peiku arama kirimbawa panye kirimbawasawa irumu kuaye ikirimbawasawa purangawaa uxariwaa yawe, tiarama kuri pepiaiwa pepurara, periku arama kuri pasiensia aintairumu pepia suuriwaa irumu.

¹²Pemee purangawaa yanepaya supe, kua uxariwaa purangawaita penye periku arama kuri aintaurikuwaa kuaita uruyariwaita murutingawaa upe.

¹³Nyãse uyurawa yande pitunawasuwaa sui, asui umutirika yande yaneruixawa Jesus umunduwaa upe kua Taira ugustariwaa.

¹⁴Aete umuyuiri yande ixupe arama, umburi yanesui yanepuxuwerasawa.

¹⁵Yepewasute ae ipaya Deus irumu, kua Deus tirewaa yamaa, aete aintarundewara panye kuaita umunyawaita.

¹⁶Nyãse Deus umunya panye maa Kristu upe, panye iwaka kiti, panye kua mundu upewaraita, panye kuaita yamaawaita, panye yuiri kuaita tiwaita yamaa, panye tuixawaita, panye guvernuita yuiri, panye kirimbawawaita, panye umunduwaita yuiri. Aepawate umunya panye maantu ixupe arama.

¹⁷Aintarundewara ae panye. Sesewara interure panye maa.

¹⁸Aete ingreja akanga nyãse ipira ae, aete kua uyupiruwaa, aete kua uyupiruwaa usemu umanuwaita pitera sui, aintarundewara ae panye maa rese.

¹⁹Asui suuri Deus uxari ukuawasawa uiku sese.

²⁰Asui Kristu irumu umukaturu irumu panye maantu, panye kua mundu upe, panye yuiri iwaka kiti, asui uxari timaarese aintasui resewara umburiwaa kurusa rese.

²¹Asui penye peikuwaa kuera apekatu isui, pemuruanyana ae pepia upe pemunyawaita puxuwerawaita irumu;

²²Maa kuiri umukaturu penye irumu ipira apigawa yawewaa irumu umanu resewara ae, uxari arama purangawaita penye umaa, tiarama periku perese puxuwerawa, tiarama awa upuderi umbeu puxi perese umaa.

²³Peiku rame santa sese kua peruyariwaa, tirame peyutiari isui kua pesaruwaa pemaa uxari penye arama kua nyenga purangawaa pesenduwaa, kua nyenga aintaumbuewaa ainta supe panye kuaita iwaka wira kitiwaita. Asui ixe Paulu umbuesara ae.

²⁴Asui kuiri suuri hapurara peresewara, asui sepira upe hapurara kua tiware Kristu upurara ipira resewara, iingreja resewara.

²⁵Asui upurakiwaa ixe ingreja upe kuaye Deus uputariwaa yawe hapuraki ixupe, haxari arama pekuawa puranga panye kua Deus nyenga.

²⁶Kua uyumimiwaa aintasui panye kuaita miraita kuxima, maa kuiri uxari aintaukuawa ae kuaita uruyariwaita ae.

²⁷Asui Deus uputari pekuawa ipurangasawa iturususawa aintapiterupi kuaita tiwaita judeu, yawesawa kua uyumimiwaa kuera, Kristu uiku pepiterupi periku arama ipurangasawa.

²⁸Kristu kua yambuewaa sese, yambue ainta supe arama panye kuaita apigawaita, yambue ainta panye, panye ukuawasawa irumu, yaxari arama tuyuwe ainta Kristu rese panye kuaita apigawaita.

²⁹Asui yawewaa resewara hapurara hapuraki ikirimbawasawa irumu kua uxariwaa ixe arama turusu.