Read Nhengatu Kulusuwaraita 3 Bible Online

Kulusuwaraita 3 - Nhengatu bible

Kulusuwaraita 3

¹Pepuamu rameana Kristu irumu pesikari kuri kua iwate kitiwaraita Kristu uikuwaa kiti, uwapikawaa Deus katusawa upe.

²Pemanduari sese kua iwate kitiwaraita, tepemanduari sese kua mundu puraita.

³Nyãse pemanuana penye, asui upakana penye Kristu irumu peyumimiana Deus ipia upe.

⁴Uri rame kuri kua Kristu kua uxariwaa upaka yande, penye yuiri kuri peyuiri irumu ipurangasawa upe. Yaxari panye puxuwerawa

⁵Ape pexari umanu pesui panye pemanduarisawa kua mundu puraita, panye warixisawa, panye ikiawaa, panye pepira uputariwaa umunya kirimbawa, panye peputarisawa puxuwerawa, panye umuasisawa idulu yawe.

⁶Nyãse yawewaa resewara uri kuri Deus ipiaiwasawa.

⁷Nyãse pewata kuera aintapiterupi kuaita yawewaita peiku ramere yawewaa rese.

⁸Maa kuiri pexari pesui panye pepiaiwasawa, panye pepiaiwasawa kutarawaa, panye puxuwerawa yuiri, tepepurungita puxi amuita rese, tepembeu nyenga puxuwerawa ikiawaa.

⁹Tepeganani perumuaraita nyãse pemusakana pesui pemanduarisawa kuximawara panye yuiri irumu kua uxariwaa kuera pemunya.

¹⁰Nyãse pemundewana perese pemanduarisawa pisasua kua umpisasuawaa ukuawasawa irumu kuaye iyawe kua umunyawaa ae.

¹¹Sese tiyamaa greguita, tiyuiri judewita, tiyuiri usirkunsidariwaita, timaa yuiri tiwa usirkunsidariwaita, tiyamaa kaa puraita, tiyuiri uwatawera, tiyuiri apigawa supe aramawaita, tiyuiri yamaa kuaita tiwaita apigawa supe aramawaita, maa Kristu uiku aintapia upe panye muiri ainta.

¹²Ape kuaye Deus uparawakawaita purangawaita uputariwaita yawe, pemundeu perese pepia purangawaa pirasua arama pemaa amuita, panye purangawaa yuiri, puranga arama pemaa amuita, tepepiaiwa penye, pemuturusu pepia pepurara rame.

¹³Periku pasiensia amuita irumu, peperduari peirumu ainta puxi rame peyumaa. Kuaye yaneruixawa uperduariwaa yawe irumu penye, yawete yuiri peperduari peirumu ainta.

¹⁴Asui pexari perese aintaara kiti piri kua gustarisawa nyãse upukuari yande yepewasu arama yaiku sese.

¹⁵Pexari Kristu timaaresesawa umundu penye pepia upe, nyãse sesewara usenui penye yepenyu arama ipira penye. Asui pemee purangawaa yawewarawate.

¹⁶Pexari Kristu nyenga uiku kirimbawa pepia upe, peyumbue peirumu amuita irumu panye ukuawasawa irumu, pemee purangawaa Deus supe panye salmu irumu, panye kansão Espiritu uxariwaita irumu pepia suuriwaa sui.

¹⁷Asui panye maantu pemunyawaa u nyenga ae, u pemunyawaita peipu irumu, pemunya ae yaneruixawa Jesus rera rese, asui ipupe yuiri pemee purangawaa yaneruixawa Deus supe arama.

¹⁸Penye perikuita pemena, peruyari pemenaita nyenga kuaye yaneruixawa uputariwaa yawe.

¹⁹Penye perikuita perimiriku, pegustari perimiriku, tepeiku irumu irawawaa upe.

²⁰Penye tainaita, peruyari pepayaita nyenga, nyãse yawewaa irumu pemusuuri yaneruixawa.

²¹Penye perikuita perairaita, tepempiaiwa peraira, yawaite sasiyara aintapia.

²²Penye upurakiwaita, peruyari aintanyenga panye kuaita pepatrãoita kua mundu upewaraita, tepepuraki aintaumaawaa upentu pemusuuri arama kuaita apigawaita, maa pepuraki pepia sui pesikie resewara yaneruixawa sui.

²³Maantu pemunyawaa, pemunya ae pepia sui yaneruixawa umaa, timaa apigawaita umaa arama.

²⁴Nyãse pekuawate yaneruixawa uxari kuri penye arama periku arama pepurakiwaa rikuyara, nyãse pepuraki yaneruixawa Kristu supe.

²⁵Nyãse kua umunyawaa puxuwera uriku kuri sikuyara kua umunyawaa puxuwera, nyãse timaa uparawaka umaa miraita.