Read Nhengatu Kulusuwaraita 4 Bible Online

Kulusuwaraita 4 - Nhengatu bible

Kulusuwaraita 4

¹Penye aintapatrãoita, pemunya ainta supe puranga yepewasu, nyãse pekuawate periku yuiri peruixawa iwaka kiti.

²Pembeu Deus yawewarawate, pesaru pepurandu irumu, pemee irumu ixupe purangawaa.

³Pepurandu yanerese yuiri Deus upirari arama yande arama ukena yambue arama kua nyenga uyumimiwaa Kristu rese, kua nyenga aintaumprezuwaa ixe sesewara.

⁴Hambeu arama ae uyukuawa kuaye uputariwaa yawe hambeu.

⁵Pewata ukuawawaita yawe aintapiterupi kuaita tiwaita uruyari yaneirumu; yawewarawate pemunya puranga.

⁶Pembeu kua nyenga purangawaa yawewarawate, kuaye yamusembikawaa yawe yukira irumu, pekuawa arama maye pesuaxara aintayaweyawe.

⁷Tikiku umbeu kuri pesendu seresewara, aete yanemu yagustariwaa, upurakiwaa tiwa ikuere yawe seirumu yaneruixawa rese.

⁸Nyãse sesewara hamundu pepiri ae pekuawa arama maye hamunya suuri arama kuri pepia.

⁹Asui irumu hamundu kua Unezimu pesuiwara ae, aete yanemu purangawaa yagustariwaa. Aintaumbeu kuri pesendu panye sese kua usasawawaa ike.

¹⁰Asui Aristarku kua aintaumprezuwaa seirumu umundu penye arama kuekatu, asui Marku yuiri umundu penye arama kuekatu, Barnabe primu ae kua hambeuwaa penye arama sesewara uri rame umaa pepiri pesuanti arama ae.

¹¹Kuekatu penye arama yuiri kua Jesus aintaumuserukawaa Justu. Anyunte ainta kuaita usirkunsidariwaita uajudariwaita ixe sese kua yaneruixawa Deus umunduwaa upe. Aintate umusuuri ixe turusu.

¹²Epafra umundu penye arama kuekatu, kua upurakiwaa Kristu Jesus supe, pesuiwara ae; kirimbawa upurandu perese yawewarawate peiku arama santa, pekuawa arama puranga kuaye Deus uputariwaa yawe.

¹³Hambeu sesewara puranga nyãse upuraki turusu peresewara, aintaresewara yuiri kuaita Laudiseiawaraita, Ierapuliwaraita yuiri.

¹⁴Kua umpusangasara yagustariwaa serawaa Luka umundu penye arama kuekatu, Dema yuiri kuekatu penye arama ae.

¹⁵Kuekatu yanemuita supe Laudiseiawaraita, asui Ninfa supe yuiri, asui panye kuaita ingreja supe aramawaita uyumuatiriwaa suka upe kuekatu ainta supe arama.

¹⁶Asui peleri rire kua papera panye penye, pexari aintauleri yuiri ae aintaingreja upe kuaita Laudiseiawaraita, asui yawete yuiri peleri aintapapera.

¹⁷Asui pembeu Arkipu supe upuraki arama puranga, umunya arama kua muraki urikuwaa yaneruixawa rese.

¹⁸Ixe Paulu hampinima kua kuekatu seipu irumu. Haputari pemanduari ixe aintaumprezuwaa. Kuiri Deus purangasawa uiku peirumu.