Read Nhengatu 1 Tesalunikawaraita 2 Bible Online

1 Tesalunikawaraita 2 - Nhengatu bible

1 Tesalunikawaraita 2

¹Nyãse penyepawate pekuawa, penye semuita, timaa retentu yaiku kuera pepiterupi.

²Nyãse yapurara rire, aintaumpurarakari rire yande Filipu upe kuaye pekuawa yawe yanerese, Deus uxari tiyasikie yambeu kua nyenga purangawaa Deus rese yapurara pukusawa.

³Kua yambeuwaa penye arama timaa yambeu ae yaganani penye arama, u yaputari resewara yaganani penye arama, u yamuyusana arama penye.

⁴Maa kuaye Deus uxariwaa yawe yambeu kua nyenga purangawaa, yawete yuiri yambeu, timaa yamusuuri arama apigawa, maa yamusuuri arama Deus kua usaã ukuawa yanepia.

⁵Supiwa, nẽ yepe viaji yamusasawa penye arama nyenga, tiyuiri yaganani yayuka peirumu yanemaa arama, Deus ukuawate yanerese.

⁶Tiyuiri yaputari apigawa umee yande arama purangawaa, tiyuiri penye, tiyuiri kuaita amuita.

⁷Maa yapuderi maa yayuka peirumu yanemaa arama, nyãse Kristu umunduwaita yande pepiri, maa purangate yaiku pepiterupi yasaru penye kuaye kunya usaru yawe imembiraita.

⁸Asui yaputari resewara penye, turusu suuri yanepia irumu yambeu penye arama kua nyenga purangawaa Deus rese, suuri yuiri yayuxari yandepawate peresewara, nyãse turusu yagustari penye.

⁹Nyãse penye semuita, pekuawate maye kuera yapuraki yapurara yuiri; yapuraki ara rame, pituna rame yuiri tiarama iwasu yande penye arama, asui yambeu penye arama kua nyenga purangawaa Deus rese.

¹⁰Penyete pekuawa yanerese, Deus ukuawa yuiri maye kuera yaiku pepiterupi penye uruyariwaita, tiawa upuderi umbeu puxi yanerese.

¹¹Nyãse pekuawate maye kuera yamunya penye arama, kuaye apigawa umunyawaa yawe tairaita supe.

¹²Yamusatambika penye, yamusuuri penye, yambeu penye pewata arama puranga kua mundu upe, kuaye Deus uputariwaa yawe, kua usenuiwaa penye peiku arama yaneruixawa Deus umunduwaa upe purangawaa kiti.

¹³Asui yuiri yamee Deus supe purangawaa yawewarawate nyãse pesuantiana inyenga pesenduwaa yaneirumu, nyãse timaa pesuanti ae kuaye pesuantiwaa yawe apigawa nyenga, maa Deus nyenga yawe, nyãse aete ae, kua upurakiwaa kirimbawa pepia upe, penye uruyariwaita.

¹⁴Nyãse penye semuita, pemaawana perangawa pemunya arama kuaye aintaumunyawaa yawe kuaita Deus ingrejaita Kristu Jesus rese uikuwaita Judeya upe, nyãse kuaita perumuaraitate aintaumpurarakari penye kuaye kuaita Judeya upewaraita aintarumuaraitate umpurarakari ainta.

¹⁵Aintauyuká kuera yaneruixawa Jesus kuaita utitikawaita yuiri, asui aintaumuruanyana yande, timaa aintaumusuuri Deus, aintaumuruanyana yuiri panye apigawaita.

¹⁶Aintaumuapatuka yande tiarama yambeu tiwaita judeu supe kua nyenga umukaturu arama ainta, kuaye aintaumunya teresemu arama ainta aintapuxuwerasawa irumu, ape Deus ipiaiwasawa usikana aintarese anyu aramawaa upe.

¹⁷Asui penye yanemuita, yaiku pesui kutarantu yanepira irumu, timaa yanepia irumu, asui kirimbawa yaputari yamaa yuiri penye.

¹⁸Sesewara yaputari yamaa pepiri, ixe Paulu mukuĩ viaji haputari hamaa pepiri, maa Yurupari umuapatuka yanerapee.

¹⁹Maitaa tiserá penye yanekurua, yanesuurisawa, yasaruwaa yamaa, yamukame yaneruixawa Jesus umaa uri rame kuri.

²⁰Supiwa, penyete yanepurangasawa yanesuuriwaa yuiri.