Read Nhengatu 1 Tesalunikawaraita 4 Bible Online

1 Tesalunikawaraita 4 - Nhengatu bible

1 Tesalunikawaraita 4

¹Ape semuita, hapurandu penye yaneruixawa Jesus rese, peiku arama puranga, pemusuuri arama Deus yuiri, kuaye peyumbuewaa yawe yaneirumu, kuaye pemunyawaa yawe, kuiri peyumukaturu turusu xinga.

²Nyãse Pekuawate maye yambeu penye arama irumu kua yaneruixawa Jesus.

³Nyãse Deus uputari peyuxari penyepawate ixupe, tiarama pemuwarixi.

⁴Pekuawa arama peyaweyawe peyuka arama perimiriku puranga, pesikiesawa rupi, pemanduarisawa ikiaimawaa irumu.

⁵Tepeyuka perimiriku pemanduarisawa puxuwerawa irumu, pemunya arama tenyuntu kuaye aintaumunyawaa yawe kuaita tiwaita judeu, tiwaitare ukuawa Deus rese.

⁶Tiarama amu umunya puxi imu supe uganani arama ae, nyãse Yaneruixawa kuri upagari panye kuaita umunyawaita kua puxuwerawa, kuaye yambeuwaa yawe penye arama kuxima.

⁷Nyãse timaa Deus usenui yande yaiku arama ikiawaa rese, maa yaiku arama ikiaimawaa yanepia irumu.

⁸Ape awa umburi kua yambeuwaa, timaa umburi apigawaita, maa umburi kua Deus uxariwaa penye arama iEspiritu Santu.

⁹Maa timaa hampinima penye arama pegustari arama kuaita peimuita, nyãse Deus umbue penye peyugustari arama amuita irumu.

¹⁰Nyãse supiwa pegustari panye kuaita yanemuita, panye Maseduniawaraita. Maa yambeu penye arama, pegustari arama ainta turusu xinga.

¹¹Pesikari kuri timaarese penye puranga, pemukaturu peyara, pepuraki peipu irumu kuaye yambuewaa yawe penye arama.

¹²Puranga arama kuri aintaumaa penye kuaita tiwaitare uruyari, tiarama pesaru amuita umee peyara arama.

¹³Maa timaa yaputari tiwaita ukuawa penye yanemuita aintarese kuaita umanuwaita pesui, yawaite sasiyara penye aintayawe kuaita amuita tiwaita uriku kua yasaruwaa yamaa.

¹⁴Nyãse yakuawa umanu kuera Jesus, asui upuamu kuera yuiri manusawa sui, asui yawete yuiri kuri Deus ururi kuri irumu Kristu resewara kuaita umanuwaita uruyariwaita.

¹⁵Nyãse yawete yambeu penye arama yaneruixawa nyenga irumu; yande upakawaita kuri uri kuri yaneruixawa, tikuri aintarunde kiti yande kuaita umanuwaita.

¹⁶Nyãse yaneruixawa kuri uwiye iwaka sui inyenga kirimbawawaa irumu, aintausendu irumu yuiri kua arkanju nyenga, asui aintaupeyu irumu Deus trumbeta, ainta kuri uyupiru upuamu, kuaita umanuwaita Kristu rese.

¹⁷Asui kuri yande uikuwaitare upakawaita, usupiri kuri yande aintairumu nuvẽ upe, ara upe, yayumuatiri arama yaneruixawa irumu, asui yawewarawate kuri yaiku yaneruixawa irumu.

¹⁸Ape peyumusuuri perumuaraita irumu, kua nyenga irumu.