Read Nhengatu 1 Tesalunikawaraita 5 Bible Online

1 Tesalunikawaraita 5 - Nhengatu bible

1 Tesalunikawaraita 5

¹Penye semuita, timaa arama hampinima penye arama sangawa kua ara.

²Nyãse uri kuri rame penyete pekuawa yaneruixawa rangawa kuaye mundawasu uriwaa yawe pituna.

³Aintaumbeu rame kuri, timaarese peiku puranga, asui kutara kuri umukanyemuwaa usika aintarese, kuaye yepe kunya uriku yawe imembira, asui tikuri maa kiti ueskapari ae isui. Yarikute yasaru uri

⁴Maa penye semuita, timaa peiku pitunawasuwaa upe upisika arama penye kua ara tiwa upe maa rese penye, kuaye mundawasu yawe.

⁵Nyãse panye penye turi rairaita penye, murutingawaa upe rairaita penye; nyãse timaa pituna yara yande, tiyuiri pitunawasuwaa upewaita yande.

⁶Ape timaa ukiriwaita yande, aintayawe kuaita amuita, maa yasaru puranga yakuawana ara yuiri.

⁷Nyãse kuaita ukiriwaita aintaukiri pituna rame; asui kuaita ukauwaita aintaukau pituna rame.

⁸Ape yande murutingawaa upe yaraita yarikute yakuawa ara, yamundeu yanerese yanekamixa uruyarisawa, gustarisawa yuiri, asui yaxari yaneakanga rese kua kapasete yasaruwaa yamaa umukaturuwaa yande.

⁹Nyãse timaa Deus uputari yande ipiaiwasawa runde, maa uputari umukaturu yande irumu kua yaneruixawa Jesus Kristu,

¹⁰Kua umanuwaa yaneresewara yaiku arama kuri irumu u yapaka rame yande, u yakiri rame yuiri.

¹¹Ape peyumusuuri perumuaraita irumu, asui pexari uyukiriari puranga panye penye kuaye pemunyawaa yawe.

¹²Asui kuiri yapurandu penye yanemuita, perespetari puranga kuaita upurakiwaita pepiterupi, kuaita serakuenawaita yaneruixawa rese, kuaita umbeuwaita penye arama.

¹³Puranga pemaa ainta, pegustari resewara ainta, aintamuraki resewara. Peyumusuuri perumuaraita irumu.

¹⁴Yambeu penye arama penye yanemuita, pepurungita aintairumu kuaita tiwaita uruyari puranga, pemusuuri kuaita sasiyarawaita, peajudari kuaita pituawaita, pemuturusu pepia aintairumu muiri ainta.

¹⁵Tepexari amu umunya ixupe arama puxi kua umunyawaa ixupe puxi, pesikari pemunya puranga penye arama panye aintairumu kuaita amuita.

¹⁶Peyumusuuri yawewarawate.

¹⁷Pepurandu Deus irumu, tepekuere.

¹⁸Pemee ixupe arama purangawaa yawewarawate, nyãse yawe Deus uputari peirumu Kristu Jesus rese.

¹⁹Tepemuweu Espiritu.

²⁰Tepemutenyuntu kua aintautitikawaa.

²¹Pesaã pemaa panye maa, asui kua purangawaa pemukaturu penye arama ae.

²²Petirika isui panye kua puxuwerawa.

²³Asui kua Deus uxariwaa timaarese penye, yaputari uxari ixupe arama panye penye, umukaturu kuri panye pepia, panye pemanduarisawa, panye pepira yuiri, tiarama yuiri periku perese puxuwerawa uri rame kuri kua yaneruixawa Jesus Kristu.

²⁴Supiwa kua usenuiwaa penye, nyãse umunya kuri kuaye umbeuwaa yawe.

²⁵Penye yanemuita, pepurandu yanerese Deus irumu.

²⁶Pesuanti puranga peimuita, pebejari ainta.

²⁷Yaneruixawa rese hambeu penye arama: —Pexari arama panye yanemuita uleri kua yampinimawaa.

²⁸Kuiri yaneruixawa Jesus Kristu purangasawa uiku peirumu panye.