Read Nhengatu 1 Timuteu 1 Bible Online

1 Timuteu 1 - Nhengatu bible

1 Timuteu 1

¹Ixe Paulu Kristu Jesus umunduwaa, nyãse umundu resewara yawe kua Deus umukaturuwaa yande, ae yuiri kua Kristu Jesus yasaruwaa yamaa.

²Inde arama inde Timuteu, supiwa seraira inde sese kua yaruyariwaa, yanepaya Deus, yaneruixawa Jesus Kristu yuiri aintauxari inde arama aintapurangasawa, pirasua aintaumaa penye yuiri, timaarese aintauxari inde yuiri.

³Hasu rame kuera Masedunia kiti, hapurandu inde reiku aramare Efezu upe pembeu arama ainta supe arama kuaita yepeyepe, tiarama aintaumbue amu kiti isui kua yambuewaa.

⁴Tiarama aintaumanduari aintaramunyaita nyenga, tiyuiri aintaumanduari aintaramunya reraita kuera yawewarawate, nyãse anyunte uxari aintaupurungita retentu ainta, tiuxari aintaumanduari Deus aintapia sui.

⁵Yawe kuri rembeu ainta supe aintauyugustari arama aintapia ikiaimawaa irumu, aintaumanduarisawa purangawaa irumu yuiri, uruyarisawa irumu yuiri supiwa.

⁶Nyãse yepeyepe uxariana kua purangawaa, asui aintauyusupariwaita ainta nyenga tenyuntuwara rese.

⁷Aintauputari umbuewaita ainta sese kua Deus nyenga kuximawara, maa tiaintaukuawa mayetaa kua aintaumbeuwaa, tiyuiri aintaukuawa sese kua aintaumbeuwaa.

⁸Maa yakuawate purangate kua Deus nyenga kuximawara, yakuawa rame puranga mayesawataa umbeuwaa.

⁹Maa yakuawate timaa Muize uxari yande arama kua Deus nyenga kuximawara aintaresewara kuaita purangawaita, maa aintaresewara kuaita puxuwerawaita, tiwaita uruyari yuiri, aintaresewara kuaita tiwaita uputari Deus, puxuwerawaita yuiri, aintaresewara yuiri kuaita ikiawaita umanduarisawa, upurungitawaita nyenga puxuwerawa yuiri, aintaresewara yuiri kuaita uyukáwaita aintapaya, kuaita uyukáwaita aintamaya yuiri, kuaita uyukáwaita mira yuiri.

¹⁰Aintaresewara yuiri kuaita warixiwaita, aintayuiri kuaita apigawaita warixiwaita aintapawa, aintayuiri kuaita umundawaita apigawaita, aintayuiri kuaita ugananiwaita, kuaita yuiri ugananiwaita aintaumbeu pukusawa supiwa yawe, aintayuiri panye kuaita umuruanyanawaita kua nyenga supiwa,

¹¹Kua nyenga purangawaa uxariwaa serese kua Deus yabensuari ae.

¹²Hamee purangawaa ixupe kua yaneruixawa Jesus Kristu, nyãse uxari ixe arama kirimbawasawa, nyãse hakuawa puranga umaa ixe, uparawaka resewara ixe, hapuraki arama ixupe.

¹³Ixe hambeu kuera puxi sese, ixe hamuruanyana kuera ae, ixe hamusasiyara kuera ae. Maa pirasua umaa ixe arama nyãse yawe kuera hamunya tiramere hakuawa ae, tiramere haruyari ae.

¹⁴Asui yaneruixawa purangasawa uyusena serese irumu kua uruyarisawa, gustarisawa yuiri Kristu Jesus suiwara.

¹⁵Supiwa kua nyenga, yarikute yaruyari ae panye, Kristu Jesus uri kua mundu kiti umukaturu arama kuaita puxuwerawaita, asui ixe yuiri puxuwera piri aintasui.

¹⁶Maa sesewara pirasua umaa ixe arama, nyãse ixe puxuwera piri aintasui panye Jesus Kristu umukame aintaumaa turusu uaguentari seirumu, aintaumaa arama aintarangawa ixe panye kuaita uruyariwaita kuri ae, urikuwaita kuri mundu tiwa upawa.

¹⁷Kuiri yamee ixupe arama purangawaa yawewarawate, yasikie arama yamaa ixupe kua yaneruixawa tiwa upawa, kua tiwa ukanyemu, tiwa yamaa yaneresa irumu, kua Deus yepenyuwaa, amem.

¹⁸Yawe hamundu inde seraira Timuteu, aintautitika yawe nerese: Rexari kua nyenga uajudari inde, remunya kirimbawa kua kera purangawaa resewara.

¹⁹Reiku santa sese kua reruyariwaa, resikari remanduarisawa ikiaimawaa, nyãse tiresewara aintauputari ikiaimawaa aintaumanduarisawa kuaita amuita, ape aintauxari aintasui panye kua aintauruyariwaa yepe.

²⁰Asui aintasuiwara aintate kuaita Imeneu, Alexandre yuiri, asui haxariana ainta Yurupari supe umpurarakari arama ainta tiarama maa aintaupurungita puxi.