Read Nhengatu 1 Timuteu 3 Bible Online

1 Timuteu 3 - Nhengatu bible

1 Timuteu 3

¹Supiwa kua nyenga, yepe uputari rame usaru ingreja ae, uputari yepe muraki purangawaa.

²Asui kua usaruwaa ingreja urikute uxari puranga aintaumaa ae panye, yepenyute ximiriku, tiwa ukau, tiwa upuká tenyuntu, umunyawaa puranga panye, suuriwaa usuanti mira, ukuawawaa umbue;

³Tiwa ugustari kawĩ, tiwa ipiaiwa ae, maa ipiaiwaimawaa ae, tiwa uyakawa ae, tiwa ugustari turusu dinyeru.

⁴Kua ukuawa usaru puranga suka puraita, umukiriari tairaita aintauruyari arama puranga, urespetari arama ainta puranga.

⁵Nyãse tirame ukuawa usaru suka puraita, maitaa maa upuderi usaru Deus ingreja?

⁶Kua pisasua uruyari tiupuderi usaru ingreja, yawaite umanduari puranga ae amuita sui, Yurupari uganani kuri ae.

⁷Maa kuaita amuita aintaurikute aintaumaa ae puranga, yawaite puxi aintaumaa ixupe, yawaite Yurupari umuyusana ae.

⁸Yawete yuiri kuaita diakunuita, aintaurikute puranga aintaumaa ainta, yepenyu aintaumanduarisawa, tiwaita ukau, tiwaita umuasi aintamaa arama.

⁹Aintaurikute aintaumukaturu aintaumanduarisawa ikiaimawaa irumu kua nyenga aintauruyariwaa.

¹⁰Pemaa mayetaa ainta, asui tirame pewasemu puxi aintarese, pexari diakunu ainta.

¹¹Yawete yuiri kuaita aintarimiriku aintaurikute aintauxari puranga aintaumaa ainta, tiwaita upurungita puxuwera, tiwaita ukauwera ainta, aintaurikute aintaumunya puranga panye maantu.

¹²Asui kua diakunu yepenyute ximiriku, urikute usaru puranga tairaita, panye suka puraita yuiri.

¹³Nyãse kuaita purangawaita diakunu ainta, aintauxari puranga aintaumaa ainta panye, asui aintauiku santa sese kua uruyarisawa Kristu Jesus rese.

¹⁴Yawe hampinima inde arama, maa kutara kuri haputari hamaa nepiri.

¹⁵Maa tiramere hayuiri rekuawana mayetaa rerikute remunya Deus ruka puraita supe, nyãse aete iingreja kua Deus upakawaa, aete kua uxariwaa uiku santa kua nyenga supiwa.

¹⁶Nyãse turusuwaa kua nyenga uyumimisawa sese kua yaruyariwaa. Kuxima Deus umuyukuawa ipira upe, asui kua espiritu uxari yakuawa sese, asui kuaita anjuita aintaumaa ae, asui aintaumbue sese ainta supe panye kuaita tiwaita judeu, asui aintauruyari ae kua mundu kiti, asui aintausuanti ae iwaka kiti.