Read Nhengatu 1 Timuteu 4 Bible Online

1 Timuteu 4 - Nhengatu bible

1 Timuteu 4

¹Kuiri kua Espiritu umbeu kirimbawa, senundere kuri kua mundu upawa, yepeyepe kuri aintauxari kua aintauruyariwaa, aintauruyari arama kua gananisawa, aintanyenga yuiri kuaita demuniwita.

²Turusu aintauganani retentu resewara ainta, santawaa aintaumanduariwaa.

³Aintausaisu kuri aintauyuka aintarimiriku, aintausaisu aintaumbau kua timbiu Deus umunyawaa yambau arama, aintaumee rire sese purangawaa kuaita uruyariwaita, kuaita ukuawaita kua nyenga supiwa.

⁴Nyãse purangawaa panye kua Deus umunyawaa, asui tiyapuderi yamuaiwa kua yambauwaa yamee rireana sese purangawaa.

⁵Nyãse puranga ae Deus nyenga irumu yapurandu resewara sese.

⁶Rembeu rame yanemuita supe kua nyenga, ape kuri upurakiwaa purangawaa inde, Kristu Jesus supe arama, nyãse reyumuteresemu ipupe kua nyenga reruyariwaa, irumu yuiri kua umbuesarawaa reruyariwaa sese.

⁷Tereiku aintaramunyaita nyenga rese, tenyuntuwara retentuwaa ae. Maa reyumbue reiku arama puranga.

⁸Purangate yasikari kirimbawa arama yanepira, maa puranga piri yasikari Deus ukuawasawa kirimbawa yanepia upe, nyãse uajudari yande kuiri kua mundu upe, uajudari yuiri kuri yande senunde kua mundu nunkawaa upawa uriwaa kuri.

⁹Supiwa kua nyenga, yarikute yaruyari panye ae.

¹⁰Nyãse sesewara yapuraki, yapurara yuiri, nyãse yasaru yamaa kua Deus upakawaa, kua umukaturuwaa panye kuaita apigawa uruyariwaita.

¹¹Kuiri rembue ainta aintauruyari arama kua nyenga.

¹²Terexari aintaumutenyuntu inde netainasawa resewara, maa rerikute remunya puranga aintaumaa arama aintarangawa, remunyawaita panye nenyenga irumu, panye remunyawaita irumu, panye gustarisawa irumu, panye uruyarisawa irumu, panye ikiaimawaa irumu yuiri.

¹³Ate hasika rame kuri rerikute releri, rerikute rembeu ainta supe, rembue aintayuiri.

¹⁴Timaarese reiku isui kua Espiritu uxariwaa inde arama, aintauxari irumu kuera aintaipu nerese kuaita serakuenawaita.

¹⁵Remanduari kua hambeuwaa, remunya ae puranga aintaumaa arama panye, reyukiriari sese.

¹⁶Remaa nesui puranga, remukaturu puranga kua rembuewaa, reiku santa sese, nyãse remunya rame kuaye, reyumukaturu indepawate, aintayuiri kuaita usenduwaita inde arama.