Read Nhengatu 1 Timuteu 5 Bible Online

1 Timuteu 5 - Nhengatu bible

1 Timuteu 5

¹Terembeu kirimbawa ipekadu ixupe kua tuyu, maa rembeu ixupe kuaye rembeuwaa yawe nepaya supe, asui kuaita kurumiwasuita, remunya ainta supe kuaye nemuita yawe.

²Asui kuaita kunyaita waimiita, remunya ainta supe kuaye nemaya yawe, asui kuaita kunyamukuita, remunya ainta supe kuaye nerendiraita yawe, remanduarisawa purangawaa irumu.

³Rerespetari puranga kuaita viuvaita pirasuawaita.

⁴Maa uriku ramere imembiraita kua viuva, u ximiariruita yuiri, rexari aintauyupiru aintauyumbue aintaumunya puranga aintarukapuraita supe, asui rexari aintawajudari aintapaya, aintamaya yuiri puranga, nyãse suuri Deus umaa yawe.

⁵Asui kua viuva supiwa pirasua yepenyu, anyunte umanduari Deus, asui upurandu irumu, muiri ara, pituna yuiri upurandu Deus irumu.

⁶Maa kua uyumusuuriwaa aepawate, anyunte umanuwaa ae, upaka ramere ae.

⁷Yawe rembeu ainta, tiarama aintaumunya puxi.

⁸Awa rame tiwajudari kuaita sumuaraita, aintayuiri kuaita suka puraita, anyunte uyumimi sesewara kua uruyariwaa, puxuwera piri ae isui kua tiwa uruyari.

⁹Tereseruka viuva kua tirewaa uriku sesenta akayu, kua tiwa uriku kuera yepenyu imena.

¹⁰Aintaurikute aintaukuawa sesewara umunyawaita purangawaita resewara, umukiriariwaa imembiraita puranga, suuriwaa usuanti miraita, umuyasukawaa aintaipi kuaita uruyariwaita, uajudariwaa kuaita upurarawaita, uputariwaa umunya purangawaa yawewarawate.

¹¹Tereseruka viuvaita kuaita kunyamukuitare, nyãse pitua rame aintaumanduari Kristu rese, anyunte aintaumanduari aintauriku arama aintamena;

¹²Asui aintaumunya puxi ainta supe pawate, aintaumutenyuntu resewara kua aintaumbeuwaa aintauyupiru.

¹³Nyãse anyunte aintauyupiru tiaintaupuraki ainta, aintauwata uka yaweyawe, maa timaa anyunte yatima ainta, maa aintaumbeu yuiri amuita rese, asui aintaumbeu yuiri nyenga puxuwerawa tiwa puranga yambeu.

¹⁴Sesewara haputari aintauriku aintamena kuaita viuvaita pisasuwaitare aintaumukiriari arama aintamembiraita, aintaumukaturu arama puranga aintarukapuraita, tiarama yaneruanyana umbeu puxi aintarese.

¹⁵Nyãse yepeyepe aintauyusupariana ainta, aintausu Yurupari rakakuera.

¹⁶Yepe uruyariwaa uriku rame yepe iamu viuva, urikute uajudari ae, tiarama iwasu ingreja supe arama ae; ingreja upuderi uajudari kuaita viuvaita pirasuawaita.

¹⁷Rexari aintaurespetari ainta supe kuaita ansiãoita usaruwaita puranga kua ingreja, kuaita upurarawaa sesewara kua nyenga, sesewara yuiri kua umbuesarawaa.

¹⁸Nyãse Deus nyenga umbeu: "Terepukuari bui yuru upiru rame inde arama trigu karusu." Aintaumpinima yuiri: "Kua upurakiwaa uganyari sikuyara kua upurakiwaa."

¹⁹Tereruyari aintaumbeu rame puxi sese yepe ansião, tirame aintaumbeu sesewara mukuĩ u musapiri.

²⁰Maa kuaita aintauiku aintapekadu rese, rembeu ainta supe aintapekadu aintausenduwaa upe panye, aintausikie arama yuiri kuaita amuita.

²¹Kuiri hambeu inde arama Deus usendu, Jesus Kristu usendu yuiri, aintausendu yuiri kuaita anjuita uparawakawaita; remunya arama ainta supe yepewasu kua hambeuwaa inde arama, tiarama reparawaka remaa amuita supe.

²²Teneranyee rexari neipu amuita rese. Tereajudari ainta aintaumunya aintapuxuwerasawa; remukaturu ikiaimawaa remanduarisawa.

²³Tereu iipawa, maa reu kuaira vinyu nepia resewara, sesewara kua nemãsisawa.

²⁴Uyukuawana aintapekadu kuaita yepeyepe apigawaita, asui kutara aintaupurara sesewara, maa aintapekadu kuaita amuita uikupuku xinga kuri uyukuawa ae.

²⁵Yawete yuiri uyukuawa aintaumunyawaita purangawaita, tirame uyukuawa ainta kuiri, timaa kuri aintaupuderi aintauyumimi ainta.