Read Nhengatu 1 Timuteu 6 Bible Online

1 Timuteu 6 - Nhengatu bible

1 Timuteu 6

¹Rexari aintaurespetari aintaruixawaita panye kuaita apigawa supe arama, tiarama aintaumutenyuntu Deus rera, yambuewaa yuiri.

²Asui kuaita urikuwaita aintaruixawa uruyariwaita, tiarama puxi aintaumaa ainta supe nyãse aintaimuita ainta, maa aintaurikute aintaupuraki ainta supe turusu xinga, nyãse uruyariwaita aintaugustariwaita kuaita uganyariwaita ipupe kua aintaupurakiwaa puranga. Rembue, asui rembeu aintaumunya yawe.

³Yepe umbue rame amu kiti, tirame yepewasu inyenga yaneruixawa Jesus Kristu nyenga purangawaa, tirame yepewasu yuiri kua umbuewaa uxariwaa yamanduari puranga Deus,

⁴Anyunte umanduari sesepawate, timaa nungara ukuawa, kirimbawa usikari umaramunya aintairumu inyenga irumu, uputari yuiri umuserana ainta inyenga resewara, anyunte uxari aintaumuasi, puxi aintaumaa yuiri, aintaumbeu tenyuntu aintaresepawa, aintaumanduari puxi amuita rese;

⁵Uxari aintauyuyakawa apigawa tiwaita umanduari irumu, kuaita tiwaita uriku nyenga supiwa, aintaumanduari aintaupuderi aintauganyari aintamaa arama aintaumanduari resewara Deus.

⁶Turusu kuri yaganyari Deus irumu, yamanduari rame ae suuri.

⁷Nyãse timaa nungara yaruri kua mundu kiti, tiyuiri maa yapuderi yarasu kua mundu sui.

⁸Maa yariku rame yambau arama, yanerupa arama yuiri yarikute yaiku suuri.

⁹Maa kuaita uputariwaita rikuwaa ainta, aintauwike kuri Yurupari irumu, umuyusana ainta aintairumu kuaita aintauputariwaa aintaumunya tenyuntu puxuwerawa kua uxari aintaukanyemu kuaita apigawaita aintaukanyemu arama.

¹⁰Nyãse kua ugustari turusu dinyeru, panye puxuwerawa rapu ae; asui yepeyepe aintauyusupariana ainta uruyarisawa sui, aintaumuasi resewara dinyeru, asui aintauyumusasiyara aintapawa, siya sasisawa irumu.

¹¹Maa inde apigawa Deus yara, reyawawa isui kua yawewaa; rewata purangawaa rese, remanduari Deus, reruyari ae, regustari ae, reiku santa, tenepiaiwa inde.

¹²Remunya kirimbawa kua kera purangawaa, irumu kua reruyarisawa. Repisika santa kua mundu tiwa upawa, nyãse sesewara Deus usenui inde rembeu irumu netestemunyu purangawaa aintaumaawaa upe siya kuaita usenduwaita.

¹³Hambeu inde arama usenduwaa upe kua Deus uxari upakawaa panye maantu, usenduwaa upe yuiri kua Kristu Jesus umbeuwaa itestemunyu purangawaa Punsiu Pilatu usendu;

¹⁴Hambeu inde arama remukaturu arama ikiaimawaa kua nyenga, terexari aintaumbeu puxi sese, ate uri rame kuri yaneruixawa Jesus Kristu.

¹⁵Ape yasaru kuri ae sangawa upe, uxariwaa kua umundusara yepenyute purangawaa, kua aintaruixawaita kuaita tuixawaita, kua aintaguvernuita kuaita guvernuita.

¹⁶Aete kua yepenyu tiwa upawa, uikuwaa murutingawaa upe tiwa yapuderi yamaa, kua tiware apigawaita umaa, tiyuiri aintaupuderi umaa ae. Yaputari yarespetari ae, yaputari yuiri yaneruixawa ae yawewarawate. Amem.

¹⁷Maa kuaita rikuwaita kua mundu upe, rembeu ainta supe arama tiarama aintaumanduari puranga ainta, tiarama aintauyuka aintapia aintamaa upawawaa rese, maa aintauxari aintapia sese kua Deus uxariwaa yande arama turusu purangawaa suuri arama yande.

¹⁸Aintaumunya arama puranga, riku arama kuri ainta aintaumunyawaita puranga irumu, suuri aintauxari arama turusu aintamaa pirasuawaita supe.

¹⁹Aintaumuatiri arama ainta supe arama turusu purangawaa, aintauriku arama kuri yepe aintauiku arama santa, aintaupisika arama kuri kua mundu tiwa upawa supiwa.

²⁰Asui inde Timuteu, remukaturu puranga kua Deus uxariwaa inde arama. Teresendu ainta supe aintaumbeu rame tenyuntu, aintauyakawa rame yuiri sese kua nyenga aintaugananiwaa sese ukuawa ape,

²¹Nyãse yepeyepe uruyariana kua nyenga, ape aintauyusupariana ainta isui kua uruyarisawa. Kuiri Deus purangasawa uiku peirumu.