Read Nhengatu 2 Timuteu 1 Bible Online

2 Timuteu 1 - Nhengatu bible

2 Timuteu 1

¹Ixe Paulu, Kristu Jesus umunduwaa ixe Deus uputari resewara yawe, kuaye umbeu yawe ainta supe mundu tiwa upawa uikuwaa Kristu Jesus ipia upe.

²Inde arama inde Timuteu, inde seraira hagustariwaa, yanepaya Deus, yaneruixawa Kristu Jesus yuiri, aintauxari inde arama aintapurangasawa, pirasua aintaumaa inde, aintauxari timaarese inde.

³Hamee purangawaa Deus supe, kua hapurakiwaa ixupe hamanduarisawa purangawaa irumu, kuaye seramunyaita umunyawaa yawe; hamee ixupe arama purangawaa hamanduari rame inde yawewarawate hambeu rame Deus.

⁴Kirimbawa haputari hamaa inde hamanduari rame neresa yukise, haputari hayumusuuri.

⁵Nyãse hakuawa maitaa reruyari supiwa, kuaye aintauruyariwaa yawe aintauyupiru kuaita nearia Luide, kua nemaya yuiri Eunise, asui kuiri inde yuiri.

⁶Ape hambeu inde arama, rembaka kua Deus uxariwaa inde arama nepia upe, haxari resewara seipu nerese.

⁷Nyãse timaa Deus uxari yande arama espiritu yasikie arama maa, maa uxari yande arama espiritu uxariwaa yande arama kirimbawasawa, gustarisawa yuiri ukuawasawa yuiri.

⁸Ape teretiĩ rembeu yaneruixawa resewara, teretiĩ inde yuiri seresewara ixe prezuwaa sesewara, asui inde yuiri repurara sesewara kua nyenga purangawaa, irumu kua Deus kirimbawasawa.

⁹Nyãse umukaturuana yande, asui usenuiwana yande nyenga purangawaa irumu, timaa sesewara kua yamunyawaita, maa uputari resewara, sesewara yuiri kua ipurangasawa uxariwaa kuera yande arama Kristu Jesus resewara.

¹⁰Asui kuiri umukameana ipurangasawa uri resewara kua Kristu Jesus, kua umukaturuwaa yande, kua umukanyemu manusawa, kua uxariwaa yamaa sikuesawa mundu tiwa upawa yuiri irumu kua nyenga purangawaa.

¹¹Nyãse sesewara kua nyenga purangawaa uxari hambue ae, uxari umunduwaa ixe, uxari umbuesara ixe.

¹²Asui sesewara hapurara. Maa timaa hatiĩ ixe nyãse hakuawate kua haxari sepia sese, hakuawate yuiri upuderi umukaturu serunde kua uxariwaa ixe arama ate nyã ara upe kuri.

¹³Resikari rembeu nyenga purangawaa yawewarawate kuaye remaawaa yawe nerangawa ixe, irumu kua uruyarisawa, gustarisawa yuiri Kristu Jesus rese.

¹⁴Remukaturu kua nyenga supiwa uxariwaa inde arama, irumu kua Espiritu Santu uikuwaa yanepia upe.

¹⁵Rekuawate panye kuaita Azia upewaraita aintauxari ixe, panye kuaita Fijelo, Ermujenes yuiri.

¹⁶Haputari pirasua yaneruixawa umaa Uneziferu ruka puraita, nyãse siya viaji umusuuri ixe, timaa utiĩ ae seresewara prezu resewara ixe.

¹⁷Nyãse usika rame Ruma kiti usikari ixe kirimbawa ate uwasemu ixe.

¹⁸Haputari pirasua yaneruixawa umaa ae nyã ara upe kuri, nyãse rekuawate mayetaa uajudari ixe Efezu upe.