Read Nhengatu 2 Timuteu 4 Bible Online

2 Timuteu 4 - Nhengatu bible

2 Timuteu 4

¹Hambeu inde arama kirimbawa Deus usendu, usendu yuiri kua Kristu Jesus, kua umbeuwaa kuri aintaresewara kuaita upakawaita, umanuwaita yuiri, uri resewara, asui yaneruixawa Deus umunduwaa upe resewara yuiri:

²—Rembue kirimbawa inyenga yawewarawate maa kiti rewata, remusatambika ainta, rembeu ainta supe aintapekadu, rembue ainta supe nyenga supiwa tiwa nepiaiwa irumu.

³Nyãse amu ara kuri timaa aintauputari kua nyenga supiwa, maa aintaumuatiri ainta supe umbuewaita kuaye aintauputarisawa puxuwerawa uputari yawe, maye aintausaãwaa yawe yusara aintaapisa kuara upe.

⁴Tikuri aintauputari aintausendu kua nyenga supiwa, maa aintauputari kuri aintausendu kua nyenga tiwa supi.

⁵Asui inde reiku santa yawewarawate, reaguentari repurara rame, resenui mira irumu kua nyenga purangawaa, remunya puranga kua nemuraki.

⁶Maa ixe serangawa usikana aintauyuká arama ixe, serangawa usikana hasu arama.

⁷Hambauwana hamunya kua kera purangawaa, hambauwana hayana, hamukaturuana kua uruyarisawa.

⁸Kuiri umukaturu serunde kua kurua purangawaa, uxariwaa kuri ixe arama kua yaneruixawa umbeuwaa yanerese satambika nyã ara upe kuri, maa timaa ixe aramapawantu, maa ainta supe yuiri panye kuaita ugustariwaita uri kua mundu kiti mukuĩsawa.

⁹Resikari reyuiri sepiri kutara.

¹⁰Nyãse Dema uxari ixe ugustari resewara kua mundu, asui Tesalunika kiti; asui Kresenti Galasia kiti, asui Titu Dalmasia kiti.

¹¹Anyunte Luka serumuarawaa. Resu reyuka Marku, asui reruri neirumu ae, nyãse turusu uajudari ixe semuraki rese.

¹²Maa kua Tikiku hamundu ae Efezu kiti.

¹³Asui reyuiri rame reruri ixe arama sepupekawa haxariwaa Truadi upe, Karpu ruka upe, reruri yuiri selivruita, maa panye sui haputari reruri ixe arama kuaita suu pirera aintaumpinimawaa sese.

¹⁴Kua Alexandre upurakiwaa kubri, puxuwera umunya ixe arama; yaneruixawa kuri upagari ixupe sikuyara kua umunyawaa.

¹⁵Remaa nesui ae nyãse kirimbawa umuruanyana kua yambuewaa.

¹⁶Asui hayupiru rame hambeu seresewara tiawa uajudari ixe, maa aintauxari ixe panye. Haputari Deus tiumburi kunta sese kua aintaumunyawaa puxi.

¹⁷Maa yaneruixawa uiku seruaki, asui uxari ixe arama kirimbawasawa hambeu arama inyenga panye ainta supe kuaita tiwaita judeu. Asui uyurawana ixe iyuru sui kua leão.

¹⁸Yaneruixawa uyurawa kuri ixe, panye puxuwerawa sui; asui umukaturu ixe urasu kuri ixe yaneruixawa Deus umunduwaa upe, iwaka kiti. Yamee ixupe arama purangawaa yawewarawate, amem.

¹⁹Kuekatu Priska supe, Akila supe yuiri; kuekatu yuiri Uneziferu ruka puraita supe.

²⁰Erastu uikure Kurintu upe. Haxariana Trufimu Miletu upe, imãsire ae.

²¹Reyuiri sepiri paranawasu rundere. Eubulo umundu kuekatu inde arama, yawete yuiri Prodenti, Linu yuiri, Klaudia yuiri, panye kuaita yanemuita yuiri.

²²Haputari yaneruixawa uiku nepia irumu. Haputari ipurangasawa uiku peirumu.