Read Nhengatu Titu 1 Bible Online

Titu 1 - Nhengatu bible

Titu 1

¹Ixe Paulu upurakiwaa Deus supe, Jesus Kristu umunduwaa ixe haxari arama aintauruyari kuaita Deus uparawakawaita, aintaukuawa yuiri kua nyenga supiwa, kuaye Deus uputariwaa yawe.

²Aintausaru arama aintauriku arama kuri mundu tiwa upawa, umbeuwaa ainta supe kuximare kua Deus tiwa uganani.

³Asui sangawa upe uxari yakuawa sese inyenga irumu hambue resewara ae, kuaye umunduwaa yawe ixe kua Deus umukaturuwaa yande.

⁴Hampinima inde arama inde Titu, inde seraira sese kua yaruyariwaa. Kuiri yanepaya Deus, Kristu Jesus umukaturuwaa yande yuiri, aintauxari inde arama ipurangasawa, itimaaresesawa yuiri.

⁵Sesewara haxari inde Kreta upe rembawa arama kua remunyawaa kua tiware yamunya. Asui rexari serakuena arama aintarendawa yaweyawe, maye hambeuwaa yawe inde arama.

⁶Rexari serakuena kua apigawa tiwa aintaumbeu puxi sese, kua uriku yepenyu ximiriku, kua urikuwaa tairaita aintauruyari, tiwa upurungita puxi aintarese, tiyuiri aintaumutenyuntu aintapaya nyenga.

⁷Nyãse kua usaruwaa Deus yaraita timaa upuderi uxari puxi amuita umaa ae, tiupuderi umanduari ukuawapiri aintasui, tiupuderi ipiaiwa ae, tiupuderi uu ukau arama, tiupuderi umaramunya, tiupuderi usikari uyuka imaa arama gananisawa irumu;

⁸Suuri urikute usuanti amuita, urikute ugustari panye purangawaa, urikute umundu umanduarisawa, urikute uputari uiku ipekaduimawaa ae, urikute ugustari Deus, urikute ukuawa umundu ipia;

⁹Urikute uiku santa sese kua nyenga supiwa yambuewaa, uriku arama kirimbawasawa, umbue arama ainta nyenga supiwa rese, ukuawa arama yuiri umuserana kuaita umuruanyanawaita ae.

¹⁰Nyãse siya kuaita apigawaita tiwaita uruyari, retentuwaa aintaupurungita, aintauganani, aintate kuaita aintasuiwaraita kuaita usirkunsidariwaita.

¹¹Yarikute yamukiriri ainta, nyãse aintauwata aintautrukari aintaumanduarisawa kuaita siyawaita uka puraita, aintaumbue resewara sikuyara irumu kua tiwa aintaupuderi aintaumbue.

¹²Yepe utitikawaa aintapitera sui umbeu: "Kretawaraita aintauganani yawewarawate, suu nyãruwaa ainta, aintaugustari aintaumbau turusu."

¹³Supiwa kua umbeuwaa, ape rembeu ainta supe nyenga kirimbawa irumu, santa arama aintauiku sese kua yaruyariwaa;

¹⁴Tiarama aintaumanduari aintarese kuaita judewita nyenga, tiyuiri kua aintaumunduwaa kuaita apigawaita tiwaita uruyari kua nyenga supiwa.

¹⁵Puranga aintaumaa panye supe kuaita urikuwaita aintaumanduarisawa purangawaa, maa kuaita urikuwaita aintaumanduarisawa puxuwerawa, kuaita tiwaita uruyari yuiri, tiawa aintaumaa purangawaa yawe, nyãse iyukana panye aintaumanduarisawa, panye aintapia yuiri.

¹⁶Aintaumbeu aintaukuawate Deus, maa aintaumunyawaita irumu aintauyumimi sesewara, puxi aintaumaa ainta, tiwaita uruyari ainta, timaa aintaupuderi aintaumunya purangawaa.