Read Nhengatu Filemum 1 Bible Online

Filemum 1 - Nhengatu bible

Filemum 1

¹Ixe Paulu aintaumprezu ixe Kristu Jesus resewara, ae yuiri yanemu Timuteu, inde arama inde Filemum yagustariwaa, uajudarisara yande;

²Ixupe yuiri kua yanerendira Afia, Arkipu yuiri, kua upurarawaa yaneirumu, ainta supe yuiri kuaita ingreja supe aramawaita neruka upe.

³Haputari Deus purangasawa, itimaaresesawa yuiri uiku peirumu, kua umeewaa yande arama kua yanepaya, yaneruixawa Jesus Kristu yuiri.

⁴Asui hapurandu irumu Deus hamanduari inde yawewarawate, asui hamee purangawaa Deus supe.

⁵Nyãse hasendu neresewara regustari puranga, reruyari yuiri puranga yaneruixawa Jesus, aintayuiri kuaita panye uruyariwaita.

⁶Asui hapurandu Deus irumu uxari arama aintaukuawa panye kua purangawaa yanerese yarikuwaa Kristu rese, aintauruyari resewara yepewasu neirumu.

⁷Nyãse turusu remusuuri ixe neirumu, inde semu regustari resewara ainta puranga, nyãse neresewara suuri aintapia kuaita uruyariwaita.

⁸Ape hapuderi rame maa hamundu inde Kristu rese remunya arama kua watariwaa,

⁹Maa haputari hapurandu gustarisawa resewara, nyãse ixe Paulu tuyuweana ixe, asui prezu ixe Kristu Jesus resewara;

¹⁰Hapurandu inde sesewara kua seraira Unezimu, ipayana ixe Deus rese, prezu pukusawa ixe.

¹¹Kuxima timaa uajudari inde, maa kuiri uajudari inde, ixe yuiri.

¹²Kuiri hamundu uyuiri nepiri, mukuĩsawa, yawesawa urasu ixe irumu.

¹³Haputari uiku seirumu uajudari arama ixe nerikuyara prezu ramere ixe, sesewara kua nyenga purangawaa.

¹⁴Timaa nungara haputari hamunya nesui, yawaite hafursari inde remunya arama ixe arama puranga, asui timaa remunya ixe arama puranga nepia suintu.

¹⁵Nyãse hamanduari uikure nesui kutarantu, uyuiri arama uiku neirumu yawewarawate.

¹⁶Uri nepiri timaa inde aramawaa yawe, maa uri puranga piri isui; uri kuaye yanemu yaputariwaa yawe, nyãse yawe hamaa ae; asui inde yuiri kuri remaa ae nemu yawe, nemu yawe yuiri Kristu rese.

¹⁷Ape remaa rame ixe nerumuara yawe, resuanti ae kuaye resuantiwaa yawe ixe.

¹⁸Asui umunya rame inde arama puxi, u udeveri inde arama, haputari remburi ae sekunta upe.

¹⁹Ixe Paulu hampinima kua papera seipu irumu; hapagari kuri ae, maa timaa hambeu inde arama redeveri ixe panye indepawa.

²⁰Inde semu, haputari hawasemu neirumu kua purangawaa Kristu rese. Haputari remusuuri sepia Kristu rese.

²¹Hakuawate supiwa, reruyari kuri ixe, ape hampinima inde arama hakuawa irumu remunya kuri ixe arama turusu xinga isui kua hapuranduwaa neirumu.

²²Asui haputari yuiri remukaturu serunde hakiri rendawa, nyãse hasaru Deus rese hamaa yuiri nepiri, nyãse turusu pepurandu Deus serese.

²³Kua Epafra, aintaumprezuwaa seirumu Kristu Jesus resewara umundu inde arama kuekatu.

²⁴Aintaumundu yuiri inde arama kuekatu kuaita uajudariwaita ixe, panye Marku, Aristarku yuiri, Dema yuiri, asui Luka yuiri.

²⁵Kuiri yaneruixawa Jesus Kristu purangasawa uiku pepia upe.