Read Nhengatu Ebrewita 1 Bible Online

Ebrewita 1 - Nhengatu bible

Ebrewita 1

¹Siya viaji Deus upurungita ainta supe kuaita yaneramunyaita, aintayuru sui kuaita utitikawaita.

²Maa kua anyu aramawaa ara upurungita yande arama Taira rupi, kua uxariwaa ixupe uriku panye maantu, ipupe umunya kuera kua mundu.

³Umuturi yanerese Deus purangasawa irumu, yepewasute ae Deus irumu, inyenga kirimbawa irumu umukaturu panye kua mundu, iwaka yuiri. Asui umbawa rire umburi panye yanepekadu, usu uwapika ikatusawa sui kua kirimbawawaa iwaka upewaa.

⁴Asui uiku puranga piri aintasui kuaita anjuita, nyãse ae puranga piri sera aintarera sui.

⁵Nyãse tiawa supe aintasuiwara kuaita anjuita Deus umbeu: "Seraira inde, uyi ara nepaya ixe." Tiyuiri umbeu: "Ipaya kuri ixe, asui seraira kuri ae."

⁶Asui umbeu yuiri mukuĩsawa, umundu rame kua Taira aintarundewara kua mundu kiti: "Pexari panye Deus anjuita umee ixupe arama purangawaa."

⁷Asui umbeu aintarese kuaita ianjuita: "Umunya ainta iwitu yawe kuaita ianjuita, asui uxari tata sendiwaa yawe kuaita upurakiwaita ixupe."

⁸Maa sese kua Taira umbeu: "Inde Deus tiwa upawa kua netrunu." Asui umbeu yuiri: "Umundu ainta purangawaa ibatuna irumu, Yaneruixawa Deus umunduwaa upe ae."

⁹Regustari panye purangawaa, puxi remaa panye puxuwerawa, ape Deuste kua neDeus uyusena nerese kua azeti umusuuri arama inde, aintasui kuaita nerumuaraita.

¹⁰Asui umbeu yuiri: "Inde Yaneruixawa reyupiru kuera remunya kua mundu, asui kua iwaka, remunya ainta neipu irumu.

¹¹Aintaukanyemu kuri panye, maa inde reiku kuri yawewarawate; kuximawara kuri ainta kuaye rupa kuximawara yawe.

¹²Remamana kuri ainta kuaye yamamana yawe rupa; asui retrukari kuri ainta kuaye yatrukari yawe yanerupa; maa inde interuwate kuri inde, maa inde tikuri tuyuwe inde."

¹³Nyãse awa supe aintasuiwara kuaita anjuita Deus umbeu: "Rewapika sekatusawa upe ate mairame kuri hamburi kuaita neruanyanaita neipi wira kiti."

¹⁴Maitaa timaa espirituita kuaita upurakiwaita panye kuaita anjuita, umunduwaita ainta aintawajudari arama kuaita urikuwaita kuri mundu tiwa upawa?