Read Nhengatu Ebrewita 11 Bible Online

Ebrewita 11 - Nhengatu bible

Ebrewita 11

¹Uruyarisawa kua yakuawawaa supiwa sese kua yasaruwaa yamaa, kua yakuawawaa santa sese kua tiwa yamaa.

²Nyãse puranga Deus umaa kuaita yaneramunyaita aintauruyari resewara.

³Nyãse uruyarisawa irumu yapuderi yakuawa Deus umunya kua mundu inyenga irumu, umunya kua yamaawaa irumu kua tiwa yamaa. Uruyariwaita ambira

⁴Asui uruyari resewara kua Abel uxari Deus supe nimbawa uyukáwaa ixupe puranga piriwaa Kaim yaraita sui, asui ipupe puranga Deus umaa ixupe, asui Deus umbeu ixupe usuanti kua uxariwaa ixupe, asui umanu ae, maa upurungitare ae yande arama uruyari resewara.

⁵Nyãse Deus urasu Enuki panye ipira irumu, tiumanu uruyari resewara; asui tiaintauwasemu ae, nyãse Deus urasu ae. Nyãse senundere urasu ae Deus umbeu ixupe umusuuri ae.

⁶Tiyapuderi yamusuuri Deus tirame yaruyari ae. Nyãse awa uputari umusuaki Deus urikute ukuawa ipia upe upakawaa ae, uxari yuiri purangawaa ainta supe kuaita uputariwaita ae.

⁷Nyãse uruyari resewara kua Nue, Deus umbeu ixupe sese kua uriwaa kuri tiware aintaumaa; asui uruyari ae, umunya yepe batelão umukaturu arama suka puraita, ipupe yuiri uxari panye kua mundu ukuawa aintaukanyemu, asui ipupe yuiri uriku ae kua purangawaa uruyari resewara.

⁸Uruyari resewara kua Abraão uruyari Deus umbeuwaa ixupe usu arama amu tetama kiti uxariwaa kuri ixupe arama, asui usu tiramere ukuawa maa kiti usu.

⁹Asui uruyari resewara uiku kua tetama uxariwaa ixupe kuaye amuita retama yawe, uiku suka upe enseradu suiwara irumu kua Izaki, Jaku yuiri, kuaita urikuwaita irumu kua umbeuwaa;

¹⁰Usaru umaa kua tetama uikuwaa santa, Deus kua umusangawa ae, umunyawaa yuiri ae.

¹¹Uruyari resewara kua Sara uxari ixupe arama ikirimbawasawa uriku arama imembira waimi rameana ae, nyãse ukuawate umunya kuaye umbeuwaa yawe kua umbeuwaa ixupe ae.

¹²Ape yepe apigawa pituana ituyuwesawa isui aintausemu siya kuaita ximiariruita, aintasiyasawa kuaye kuaita estrelaita uikuwaa iwaka rese, aintasiyasawa kuaye praya yawe uikuwaa parana turusuwaa rimbiwa upe tiwaita yapuderi yakuawa aintasiyasawa.

¹³Panye umanuwaita ainta uruyarisawa rese senundere aintauriku kua umbeuwaa ainta supe, maa aintaumaa ae apekatu suintu, asui aintaumukuema ae, aintaukuawa yuiri apekatu suiwara ainta ipupe kua mundu.

¹⁴Nyãse kuaita miraita umbeuwaita aintayawe, aintauxari yakuawa aintausikari yepe aintaretama arama.

¹⁵Nyãse aintaumanduari rame maa kua aintaretama aintauriwaa asui, aintaupuderi maa aintauyuiri akiti mukuĩsawa.

¹⁶Asui yuiri aintausikari aintaretama arama puranga piriwaa kua iwaka kitiwara, ape timaa Deus utiĩ aintaukuawa arama aintaDeus ae, nyãse umukaturuana aintarunde yepe aintarendawa arama.

¹⁷Asui uruyari resewara kua Abraão Deus uputari irumu usaã umaa ae uxari ixupe arama Izaki, asui kua urikuwaa kua Deus umbeuwaa suuriana ae, uyuká arama taira yepenyu

¹⁸Kua umbeuwaa ixupe: "Izaki aintasuiwara kuri kuaita nerimiariruita."

¹⁹Nyãse umanduari kirimbawa kua Deus upuderi usupiri ae manusawa sui, asui umuyuiri ixupe arama ae yawesawa manusawa sui.

²⁰Asui uruyari resewara kua Izaki upurandu Deus uabensuari Jaku, Ezau yuiri sese kua tiware aintaumaa.

²¹Asui uruyari resewara kua Jaku umanu irumu ae upurandu Deus uabensuari arama ainta kuaita Juze rairaita, asui umunya benditu Deus supe ibatuna rakapira rese.

²²Asui uruyari resewara kua Juze kuayentu isui manusawa umbeu ainta supe kuaita israelitaita maitaa kuri aintausemu Egitu sui, umbeu yuiri maitaa kuri uputari aintaumunya ikãwera supe.

²³Asui aintauruyari resewara kua Muize paya, imaya yuiri, asui unaseri rire ae aintauyumimi ae musapiri yasi, nyãse aintaumaa kua taina puranga ae, nyãse timaa yuiri aintausikie isui kua tuixawa umbeuwaa.

²⁴Asui uruyari resewara kua Muize kurumiwasuana ae, usaisu aintauseruka ae imembira ae kua Farao rayera;

²⁵Uputari puxi aintaumaa ixupe aintairumu kuaita Deus miraita isui kua pekadu umusuuriwaa ae kutara.

²⁶Nyãse puranga piriwaa umaa kua upurarawaa Kristu resewara isui kua Egituwaraita aintamaa, nyãse usaru umaa kua purangawaa.

²⁷Asui uruyari resewara uxari kua Egitu, tiusikie ipiaiwasawa sui kua aintaruixawa, nyãse uiku santa kuaye umaawaa yawe kua tiware yamaa.

²⁸Uruyari resewara umunya kua paskua, asui uyusena kua tuwi tiarama kua uyukásara uyuká kuaita israelitaita rairaita tuyuwewaita.

²⁹Asui aintauruyari resewara kuaita miraita, aintausasawa kua parana turusuwaa serawaa pirangawaa, kuaye iwi santawaa yawewaa rese yawe.

³⁰Asui aintauruyari resewara kuaita miraita uwariana Jeriku kuraraita ita suiwara aintauyatimana rire ikupe rupi seti ara.

³¹Asui uruyari resewara kua Raabi kua warixiwaa timaa ukanyemu aintairumu kuaita tiwaita aintauruyari, nyãse suuri usuanti kuaita israelitaita umunduwaita umaa aintarunde.

³²Asui maa xingate hambeu? Nyãse kua ara tiusika hambeu aintarese panye kuaita Gideão, Baraki yuiri, Sansão yuiri, Jefite yuiri, Davi yuiri, Samuel yuiri, aintayuiri kuaita utitikawaita.

³³Asui aintauruyari resewara aintaupisika amuita tuixawaita retama, aintaumunya yuiri puranga, aintauriku yuiri kua Deus umbeuwaa ainta supe, aintausikindawa yuiri leão yuru.

³⁴Aintaumuweu yuiri tata sendiwaa, aintaueskapari yuiri espada sui, kirimbawa ainta aintapituasawa sui, asui kirimbawa yuiri aintaumunya kera, aintauxari aintauyawawa kuaita suraraita apekatu suiwaraita.

³⁵Umbaka umanuwaita ainta supe kuaita kunyaita. Asui aintaumpurarakari kuaita yepeyepeita nyãse timaa aintauyuxari ainta supe, nyãse aintauputari aintauriku kua mundu puranga piriwaa.

³⁶Asui kuaita amuita aintaukasuari ainta, asui aintaunupa ainta xikuti irumu, asui amuita aintaupukuari kurenti irumu, aintaumprezu ainta.

³⁷Aintauyuká ainta ita irumu, aintausaã ainta, asui aintaumunuka kuaita amuita seruti irumu aintapiterupi, aintauyuká yuiri ainta espada irumu, aintauwata pirasua yawe kua mundu upe, anyunte aintarupa uvelya pirera, kabra pirera yuiri, watari ainta supe panye maantu, aintaupurara, puxi aintaumunya ainta supe.

³⁸Aintauwata kampu rupi, iwitera rese yuiri, iwi kuara upe yuiri; timaa puranga kua mundu supe aramawaita ainta kuaita yawewaita.

³⁹Asui panye ainta puranga Deus umaa ainta aintauruyari resewara puranga, maa timaa aintauriku kua umbeuwaa.

⁴⁰Nyãse Deus umukaturu yanerunde yepe puranga piriwaa yawaite umukaturu yanesui ainta.