Read Nhengatu Ebrewita 12 Bible Online

Ebrewita 12 - Nhengatu bible

Ebrewita 12

¹Ape yariku rameana yaneruaki kuaita siyawaita umaawaita yande arama, yarikute yaxari yanesui panye ipusewaa, panye yanepuxuwerasawa yuiri uikuwaa yanerese, ape yarikute yayana tiyanekuere ipiri kua yanerunde kitiwaa.

²Yarikute yamaa sese kua Jesus, kua uyupiruwaa uruyari, umukaturu yuiri kua yaruyariwaa, kua uaguentariwaa upurara kurusa rese sesewara kua suuriwaa umaawaa senundere, timaa arama ixupe kua aintaumutiĩ ae, asui kuiri uwapika ikatusawa upe kua Deus trunu kiti.

³Ape perikute pemanduari kua uaguentariwaa turusu aintaumuruanyana rame ae turusu kuaita puxuwerawaita, tiarama pekuere penye, tiarama yuiri pitua peruyari.

⁴Tire pemburi peruwi pemuruanyana resewara pepekadu.

⁵Maitaa timaarese penye isui kua umbeuwaa penye arama kuaye tairaita yawe? Nyãse yawe unyee: "Inde seraira, teremaa puxi Neruixawa supe uxari rame repurara nepuxuwerasawa resewara, terexari ae umpurarakari rame inde.

⁶Nyãse Yaneruixawa umpurarakari panye kuaita ugustariwaita, asui unupa panye kuaita tairaita usuantiwaita."

⁷Perikute peaguentari umpurarakari rame penye, nyãse Deus umunya yande arama kuaye taira yawe. Nyãse awataa kua taina tiwa ipaya umpurarakari ae ipuxuwerasawa resewara?

⁸Tirame umpurarakari penye pepuxuwerasawa resewara kuaye umpurarakariwaa yawe penye panye, ape maa ipayaimawaita penye, asui timaa tairaita penye.

⁹Nyãse yarikute yanepaya kua mundu upewaraita umpurarakariwaita yande yanepuxuwerasawa resewara, asui yawaite yamaa ainta supe. Ape turusu piri yaruyari inyenga kua espiritu paya yapaka kuri yande irumu.

¹⁰Nyãse kuaita yanepayaita kua mundu puraita aintaumpurarakari yande kuairantu kuaye aintauputariwaa yawe, maa kua Deus umpurarakari yande yaiku arama puranga, yariku arama yamanduarisawa purangawaa kuaye iyawe.

¹¹Maa umpurarakari rame yande sasi yasaã ae, timaa umusuuri yande, maa arireana uxari tiyanepiaiwa yande, uxari yuiri purangawaa yamanduarisawa yande umpurarakariwaita.

¹²Ape pemusanta peipu pituawaita, pemukirimbawa perinipia membekawaita;

¹³Pemusatambika peipi rapee tiarama kuri uyereu uyumuapiriwaa upe kua alejadu, maa puranga arama kuri ae.

¹⁴Pesikari timaarese peiku puranga aintairumu panye kuaita apigawaita, pesikari yuiri pemanduariwaa ikiaimawaa, nyãse ikiawaa irumu tikuri pemaa yaneruixawa.

¹⁵Pemaa pesui yawaite yepe pesuiwara tiuriku Deus purangasawa, yawaite usemu pesui sapu irawawaa utiari arama penye, umukia arama kuaita siyawaita.

¹⁶Pemaa pesui yawaite ikiawaa umanduarisawa kua yepe, yawaite tiumanduari Deus kuaye kua Ezau yawe, kua uxariwaa ituyuwesawa kua itainasawa supe umbau yepe viaji rikuyara.

¹⁷Nyãse pekuawate yawe rire uputari rame ixupe arama kua purangawaa tiaintauxari ixupe ae, nyãse tiupuderi utrukari umanduarisawa, asui uyaxiu, uputari resewara utrukari umanduarisawa.

¹⁸Nyãse tipemusuaki kua yapuderi yapisika yaneipu irumu, kua tata sendiwaa, kua pitunawasuwaa, kua sasiyarasawa, kua trevada yuiri,

¹⁹Tiyuiri pemusuaki trumbeta tiapusawa, tiyuiri kuaita upurungitawaita kirimbawa, asui kuaita usenduwaita ainta supe aintauputari aintaupitu aintaupurungita.

²⁰Nyãse tiaintaupuderi aintawaguentari suaxara kua nyenga umbeuwaa ainta supe, yawe unyee: "Awa upisika kua iwitera rese aintauyuká ae ita irumu, ate suu yuiri."

²¹Nyãse turusu yawaite kua aintaumaawaa, asui Muize umbeu: "Hasikie, hariri yuiri."

²²Maa pesikana ipiri kua iwitera serawaa sião, setama yuiri kua Deus upakawaa, Jeruzalẽ kiti kua iwaka kitiwara, aintapiri yuiri kuaita anjuita siyawaita, ipiri yuiri panye kuaita uyumuatiriwaita Deus yaraita ainta.

²³Pesikana ipiri iingreja kiti kuaita primeruwaita kuaita urikuita aintarera iwaka kiti, Deus ipiri yuiri kua umbeuwaa aintaresewara panye, aintaespiritu ipiri yuiri kuaita apigawaita purangawaita umukaturuwaita,

²⁴Ipiri yuiri kua Jesus kua umusasawasara kua umbeuwaa pisasua, pemusuaki suwi umburiwaa umbeu yande arama puranga piri Abel ruwi sui.

²⁵Pemaa pesui yawaite tiperuyari kua upurungitawaa penye arama. Nyãse tirame aintaueskapari ainta tiwaita usendu kua upurungitawaa ainta supe kuxima kua mundu upe, tiyuiri kuri yaeskapari yande tirame yaruyari kua upurungitawaa yande arama iwaka sui.

²⁶Inyenga irumu umuriri kuera kua mundu, maa kuiri umbeu yande arama: 'Amu ara kuri hamuriri yuiri kuri kua mundu, timaa kua mundunyu, maa iwaka yuiri."

²⁷Umbeu rame kuera yepe viajite kuri hamuriri kua mundu, asui ipupete uxari yakuawa umburi kuri kua umuririwaita aintasuiwara kuaita umunyawaita, aintauiku arama santa kuaita tiwaita upuderi umuriri.

²⁸Ape yarikute yaxari suuri yanepia, nyãse yarikute yaneretama tiwa upuderi umuriri; ape yarikute yamee Deus supe purangawaa kuaye uputariwaa yawe yamanduari resewara ae puranga, yasikie resewara yuiri isui.

²⁹Nyãse tata sendiwaa kua yaneDeus.