Read Nhengatu Ebrewita 2 Bible Online

Ebrewita 2 - Nhengatu bible

Ebrewita 2

¹Ape yarikute yaruyari puranga kua nyenga supiwa yasenduwaa, yawaite yayusupari yande isui.

²Asui supiwa rame kua nyenga umbeuwaa anjuita yuru sui, uxari rame aintaupurara panye kuaita umunyawaita puxi, tiwaita uruyari yuiri,

³Ape, maitaa kuri yaeskapari yande tirame yaruyari kua turusuwaa salvasão? Yaneruixawa uyupiru umbeu ainta supe ae, asui kuaita usenduwaita ae, aintaumbeu yande arama ae.

⁴Asui Deus uxari yakuawa aintairumu umunya resewara kuaita tiwaitare yamaa, tiwaita yamunya yuiri, siya milagri yuiri, uxari resewara yuiri yande arama kua Espiritu Santu, kuaye uputariwaa yawe.

⁵Asui timaa Deus uxari kuaita anjuita aintaumunduwaita ainta, ipupe kua mundu uriwaa kuri, kua mundu yambeuwaa sese.

⁶Nyãse yepe umbeu kuera: "Awataa kua apigawa remanduari arama ae? Awataa kua usemu umaa kua mundu remanduari arama sese?

⁷Kuiri rexariana uiku pitua xinga aintasui kuaita anjuita, asui rexariana sese ipurangasawa, yawaitesawa yuiri.

⁸Asui panye maantu rexariana panye ipi wira kiti. Asui uxari irumu umundu panye maantu tiyamaa maa kua tiwa umundu. Maa timaare umundu panye maa."

⁹Asui yamaa kua Jesus, uikuwaa kuaira pitua xinga anjuita sui, Deus uxari sese ipurangasawa, yawaitesawa yuiri upurara resewara manusawa; upuderi arama usaã kua Deus purangasawa irumu kua manusawa aintaresewara panye kuaita apigawaita.

¹⁰Puranga umunya uxari irumu purangawaa ae, upurara resewara kua uxariwaa ainta supe kua salvasão, urasu irumu siya tairaita ipurangasawa kiti, kua umunyawaa panye maa ixupe aramate.

¹¹Nyãse kua umukaturuwaa ainta, kuaita yuiri umukaturuwaita yepenyu suiwarate ainta. Sesewara timaa utiĩ useruka imuita ainta;

¹²Umbeu: "Hambeu kuri semuita supe nerera rese, asui hanyengari kuri purangawaa nerese aintapiterupi kuaita uyumuatiriwaita."

¹³Umbeu yuiri: "Haxari kuri sepia sese." Umbeu yuiri: "Aete ixe kua, aintairumu kuaita tairaita Deus uxariwaita ixe arama."

¹⁴Nyãse kuaita tairaita yepewasu aintauriku aintapira rukuera, tuwi yuiri; asui yawete yuiri uxari sese ipira kuaye aintayawe, asui umanu resewara ae upuderi umburi kua Yurupari manusawa ruixawa.

¹⁵Asui uyurawa panye kuaita manusawa umprezuwaita ainta, aintausikie resewara isui.

¹⁶Nyãse yakuawate timaa uputari uajudari kuaita anjuita, maa uputari uajudari kuaita Abraão rimiariruita.

¹⁷Ape urikute uiku yepewasu aintairumu kuaita imuita panye rese, upuderi arama saserdutita ruixawa ae aintaresewara, Deus irumu umaa arama pirasua ainta supiwa, uperduari arama aintapekadu panye kuaita miraita.

¹⁸Nyãse kuxima ae yuiri upurara, Yurupari uputari yuiri uganani ae umunya arama puxi; ape kuiri upuderi uajudari kuaita Yurupari uputariwaita uganani aintaumunya arama puxi.