Read Nhengatu Ebrewita 4 Bible Online

Ebrewita 4 - Nhengatu bible

Ebrewita 4

¹Ape yarikute yasikie, yawaite yepe pesuiwara uyawi, umbeu ramere yande arama yawike arama Deus yapitu rendawa upe.

²Nyãse kua nyenga purangawaa usikana yanerese kuaye usikawaa yawe aintarese, maa timaa uajudari ainta nyãse tiaintauruyari ae kuaita usenduwaita ae.

³Nyãse yande uruyariwaita yawike upitu rendawa upe, kuaye umbeuwaa yawe: "Kirimbawa hambeu sepiaiwasawa irumu, tikuri aintauwike hapitu rendawa upe, umbawana umunya panye kuaita umunyawaita senundere umunya kua mundu.'

⁴Asui yawe kuera umbeu sese kua setisa ara: "Asui setisa ara rese Deus upitu panye imuraki sui."

⁵Asui arame yuiri umbeu mukuĩsawa: "Tikuri aintauwike hapitu rendawa upe."

⁶Ape watarire yepeyepe aintasuiwara aintauwike, asui kuaita usenduwaita kua nyenga purangawaa tiaintauwike tiresewara aintauruyari.

⁷Asui uikupuku yaweana uxari yuiri sangawa inyenga irumu kua Davi, yawe umbeu kuera: "Uyi ara pesendu rame inyenga tepemusanta pepia."

⁸Ape Juzue uxari rame maa aintaupitu arama, timaa umbeu sakuera sese amu ara kuri.

⁹Asui aikue yepe aintaupitu rendawa aintarunde kuaita Deus miraita.

¹⁰Nyãse awa rame uwike Deus upitu rendawa upe, upitu yuiri imuraki sui, kuaye Deus upituwaa yawe imuraki sui.

¹¹Ape kirimbawa yarikute yasikari yawike upitu rendawa upe, tiarama yepe uwari tiresewara uruyari, kuaye aintayawe kuera.

¹²Nyãse kua Deus nyenga upakawaa ae, kirimbawa ae, saimbepiri ae isui kua espada urikuwaa mukuĩ ruaxara saimbewaa, upuderi uwike yanepia upe, utiari arama yanepia sui kua yamanduarisawa. Utiari yuiri yanemuapirisawa isui kua kãwera puraita, upuderi ukuawa panye yamanduarisawa, panye yuiri yanepia upewaraitare.

¹³Tiaintaupuderi aintauyumimi isui kuaita umunyawaita, nyãse kua umbeuwaa kuri yanerese uyukuawa umaa ainta panye kua yambeuwaa, panye yamunyawaita.

¹⁴Nyãse kua Deus raira Jesus aete kua saserdutita ruixawa uwikewaa iwaka kiti; ape yarikute yaiku santa sese kua yaruyariwaa.

¹⁵Nyãse kua saserdutita ruixawa ukuawate mayetaa yanepituasawa rese; kuxima Yurupari uputari uganani yuiri ae, kuaye yaneyawe, maa ae timaa umunya puxi.

¹⁶Ape tiyasikie, yarikute yamusuaki itrunu purangawaa, pirasua arama umaa yande, yawasemu arama ipurangasawa uajudari arama yande mairamentu yasikari ae.