Read Nhengatu Ebrewita 5 Bible Online

Ebrewita 5 - Nhengatu bible

Ebrewita 5

¹Nyãse panye kuaita saserdutita ruixawa aintauparawakawaita ainta apigawa suiwara, aintaupurandu arama aintarese kuaita apigawaita Deus irumu, aintauxari arama ixupe prezenti, asui aintauyuká nimbawa aintauxariwaita aintapuxuwerasawa resewara;

²Upuderi uajudari ainta puranga kuaita tiwaita ukuawa, uyusupariwaita yuiri, nyãse ae yuiri pituawaa ae.

³Asui sesewara urikute uxari Deus supe nimbawa uyukáwaa aintapuxuwerasawa resewara kuaita miraita, ipuxuwerasawa resewara yuiri.

⁴Asui tiawa uputari ixupe arama kua muraki yawaitewaa, tirame Deus uparawaka ae, kuaye uparawakawaa yawe kua Arão.

⁵Yawete yuiri kua Kristu, timaa umbeu purangawaa sesepawa saserdutita ruixawa arama ae, maa uparawaka ae kua umbeuwaa ixupe: "Seraira inde, kua ara upe nepaya ixe."

⁶Kuaye umbeuwaa yawe yuiri: "Indete yepe saserduti yawewarawate, kuaye iyawe kua Melkizedeki."

⁷Asui kua Jesus uiku ramere kua mundu upe, kirimbawa upurandu irumu kua upuderiwaa umukaturu ae manusawa sui, kirimbawa usenui ixupe uyaxiuwaa rupi, asui usendu ixupe umanduari resewara puranga.

⁸Asui Taira rame ae, ukuawa uruyari inyenga sesewara kua upurarawaa.

⁹Asui puranga resewara ae, uyupiru ainta supe kua salvasão tiwa upawa, kuaita uruyariwaita ae.

¹⁰Ape Deus uparawaka ae, saserdutita ruixawa arama ae, kuaye Melkizedeki yawe.

¹¹Siya yapuderi yambeu sese penye arama, iwasu ae yambeu mayesawataa ae, nyãse uyusikindawana peapisa kuara.

¹²Nyãse kuximawaraitana penye, ape perikute umbuesaraitana penye, maa peputari yuiri yambue penye sese kua nyenga iwasuimawaa Deus rese, peputari yayupui penye leiti irumu, timaa timbiu irumu.

¹³Nyãse kua uuwaa leiti, timaa ukuawa kua nyenga uxariwaa purangawaa yande, nyãse taina ae.

¹⁴Maa tuyuweita supe aramawaa kua timbiu, ainta supe aramawaa ae kuaita ukuawaita mayesawataa isui kua purangawaa, puxuwerawa yuiri.