Read Nhengatu Ebrewita 8 Bible Online

Ebrewita 8 - Nhengatu bible

Ebrewita 8

¹Yawesawa kua yambeuwaa penye arama, yarikute yepe saserduti ruixawa uwapikawaa ikatusawa upe itrunu sui kua yaneruixawa kirimbawawaa iwaka kiti.

²Upuraki ipupe kua templu supiwa, kua tiwa apigawa umunya, maa Deus umunya ae.

³Nyãse panye kuaita saserdutita ruixawaita aintaurikute aintauxari Deus supe arama mira uxariwaita ixupe, uferta, nimbawa uyukáwaa yuiri; ape kua saserdutita ruixawa urikute uxari yuiri maantu Deus supe.

⁴Kua uiku rame mundu upe timaa arama saserduti ae, nyãse aikuete kuaita saserdutita uxariwaita Deus supe arama uferta, kuaye Deus nyenga kuximawara umbeuwaa yawe,

⁵Aintaupuraki sangawa kuera ixupe kua Deus ruka iwaka kitiwara. Muize umunya rame kua Deus ruka kua mundu upewara Deus umbeu ixupe: "Remaa nesui yawaite timaa remunya ae kuaye hamukamewaa yawe remaa iwitera rese."

⁶Maa kuiri kua Kristu uriku imuraki puranga piriwaa isui kua kuximawara, kuaye purangawaa yawe kua nyenga upurakiwaa isui kua nyenga kuximawara, nyãse kua nyenga pisasua uiku sese kua nyenga Deus umbeuwaa puranga piriwaa.

⁷Puranga rame maa kua nyenga kuera umbeuwaa, timaa maa resewara umbeu yuiri mukuĩsawa kua umbeuwaa.

⁸Nyãse umbeu irumu ainta supe kirimbawa inyenga Yaneruixawa umbeu: "Uri kuri amu ara, hambeu kuri israelitaita ruka puraita supe, yepe nyenga pisasua Judá ruka puraita supe yuiri,

⁹Yepe nyenga tiwa iyawe kua hambeuwaa aintaramunyaita supe harasu rame ainta seipu irumu harasu arama ainta Egitu sui, nyãse timaa aintauiku santa sese kua hambeuwaa, ape timaa hasendu ainta supe, yawe unyee kua Yaneruixawa."

¹⁰Yawe unyee Yaneruixawa: "Kuaye kua hambeuwaa israelitaita ruka puraita supe; nyã ara upe kuri haxari kuri aintarese hamanduarisawa, hampinima kuri senyenga aintapia upe, ape kuri aintaDeus ixe, asui semiraita kuri ainta.

¹¹Asui tikuri aintaumbue aintarumuara, tiyuiri kuri aintaumbue aintaimuita, tikuri aintaumbeu: Rerikute rekuawa Yaneruixawa; nyãse panye kuri aintaukuawa ixe, panye ipuiwaita, panye ipuwasuwaita.

¹²Nyãse pirasua kuri hamaa ainta aintapuxuwerasawa resewara, asui tikuri hamanduari mukuĩsawa aintapekadu."

¹³Umbeu rame sese kua nyenga pisasuwaa, anyunte umutuyuweana kua uyupiruwaa kuera umbeu. Asui kua kuximawara, umutuyuweanawaa kuera usasawana.