Read Nhengatu Tiagu 1 Bible Online

Tiagu 1 - Nhengatu bible

Tiagu 1

¹Ixe Tiagu upurakiwaa Deus supe arama, ixupe yuiri kua yaneruixawa Jesus Kristu, kuekatu penye arama penye duzi tribu aintaumusaĩwaita yanesui apekatu kiti.

²Semuita, puxuwerawa uri rame pepiri peiku kuri suuri,

³Nyãse pekuawate pepurara rame sesewara kua peruyariwaa peiku kuri santa inyenga rese.

⁴Ape perikute peiku puranga peiku resewara santa inyenga rese, periku arama pemanduarisawa purangawaa supiwa, tiarama maa watari penye arama.

⁵Tirame yepe pesuiwara ukuawa, urikute upurandu Deus irumu kua uxariwaa ainta supe panye kua aintaupuranduwaa irumu, timaa usaisu aintasui ae, asui uxari kuri ixupe ae.

⁶Urikute upurandu uruyarisawa irumu, timaa mukuĩ umanduarisawa, nyãse kua mukuĩ umanduarisawa kuaye parana turusuwaa gapenusawa yawe ae, iwitu upeyuwaa yawe ae.

⁷Kua apigawa tiupuderi umanduari yaneruixawa uxari ixupe maantu;

⁸Nyãse mukuĩ umanduarisawa, yawewarawate utiari umanduarisawa.

⁹Kua yanemu pirasuawaa urikute uyumusuuri sese kua urikuwaa purangawaa.

¹⁰Asui kua rikuwaa urikute uyumusuuri aintaumaa resewara ae yepewasute pirasuawaa irumu, nyãse upawa kuri ae kuaye kapĩ putira yawe.

¹¹Nyãse kurasi usemu irumu umuturi saku, asui uxirika kua kapĩ, asui uwari iputira, asui ipurangasawa ukanyemu. Yawete yuiri ukanyemu kuri kua rikuwaa uputari rame turusu imaa arama.

¹²Suuriwaa kuri kua apigawa uaguentariwaa puxi uri rame sese, nyãse uiku rame santa puxi uri rame sese uriku kuri kua kurua upakawaa Deus uxariwaa kuri ainta supe kuaita ugustariwaita ae.

¹³Yurupari uputari rame uganani yepe umunya arama puxi, tiupuderi umbeu: —Deus uganani ixe hamunya arama puxi. Nyãse tiawa upuderi uganani Deus umunya arama puxi, tiyuiri uganani amu umunya arama puxi.

¹⁴Nyãse muiri kuaita miraita Yurupari uputari uganani ainta aintaumunya arama puxi aintauputari irumu aintaumunya kuaye aintapira uputariwaa yawe.

¹⁵Asui aintauputari resewara aintaumunya kuaye aintapira uputariwaa yawe, anyunte aintaumunya aintapuxuwerasawa, asui aintaumunya rireana aintapuxuwerasawa, anyunte manusawa uwari aintarese.

¹⁶Tepeyuganani penyepawate penye semuita hagustariwaita.

¹⁷Iwaka suiwara panye kua purangawaa uxariwaa yande arama kua yanepaya uikuwaa murutingawaa upe, kua tiwa upuderi utrukari umanduarisawa nẽ kuaira.

¹⁸Inyenga supiwa irumu uxari tairaita yande uputari resewara yawe, yayupiru arama yaruyari aintasuiwara kuaita umunyawaita.

¹⁹Ape penye semuita hagustariwaita, haputari pekuawa puranga kua nyenga. Aintausendu arama kutara panye kuaita apigawaita, tiaintaupurungita arama kutara, tiaintapiaiwa kutara yuiri.

²⁰Nyãse ipiaiwa kuaita apigawaita tiuxari aintaumunya kuaye Deus uputariwaa yawe.

²¹Ape pexari pesui panye ikiawaa, panye puxuwerawa yuiri peyukiriariwaa sese, tiarama pepiaiwa pesuanti kua nyenga upuderiwaa umukaturu penye uyukiriari resewara pepia upe.

²²Pemunya kuaye inyenga umbeuwaa yawe, yawaite maa peruyari retentuwaa, yawaite peyuganani penyepawate.

²³Nyãse kua usenduwaa retentu kua nyenga tiwa umunya ae, iyawe ae kua umaawaa suwa waruwa upe;

²⁴Nyãse uyumaa aepawa, asui usu isui asui anyunte sesarai isui kua umaawaa.

²⁵Suuri kuri kua apigawa umanduari kua nyenga purangawaa uyurawawaa yande, kua uikuwaa sese santa, kua tiwa usendu retentu, maa umunya ae kirimbawa.

²⁶Yepe umanduari rame umanduari Deus, asui timaa upukuari iapeku uyuganani aepawate, retentu umanduari Deus.

²⁷Yaputari rame yamunya puranga yanepia ikiaimawaa irumu umaa kua yanepaya Deus, yarikute yamanduari kuaita ipayaimawaita, viuvaita yuiri aintaupurara rame yumãsi, yarikute yamukaturu yuiri yanepia ikiaimawaa kua mundu sui.