Read Nhengatu Tiagu 2 Bible Online

Tiagu 2 - Nhengatu bible

Tiagu 2

¹Semuita, tepeparawaka pemaa miraita penye peruyariwaita kua yaneruixawa Jesus Kristu, kua yaneruixawa purangawaa werawerawaa.

²Nyãse uwike rame peyatiriwaa upe yepe urikuwaa idedu rese anelu uru suiwara irupa sipiwasu yuiri, asui uwike yuiri yepe pirasua irupa puxuwerawa irumu,

³Asui puranga pemanduari kua urikuwaa irupa purangawaa, asui pembeu ixupe: —Rewapika ike puranga; asui pembeu ixupe kua pirasuawaa: —Repuamu ape u rewapika ike seipi rendawa wirupi;

⁴Pemunya rame yawe, maitaa tiserá peparawaka pemaa kuaita miraita pembeute yuiri aintarese pemanduarisawa puxuwerawa irumu.

⁵Pesendu penye semuita hagustariwaita. Maitaa tiserá Deus uparawaka kuaita pirasuawaita kua mundu upe aintauriku arama turusu kua uruyarisawa, aintauriku arama yuiri kuri kua yaneruixawa Deus umunduwaa upe ae, kua umbeuwaa ainta supe kuaita ugustariwaita ae.

⁶Maa penye puxi pemaa kua pirasuawaa. Maitaa tiserá aintaumpurarakari penye kuaita rikuita? Maitaa tiserá aintaurasu penye serakuenawaita ipiri?

⁷Maitaa tiserá aintaumbeu puxi sese kua sera purangawaa aintaukuawa perese.

⁸Pemunya puranga pemunya rame kua nyenga umunduwaa pemunya, yawe aintaumpinima: "Perikute pegustari perumuaraita kuaye peyugustariwaa yawe penyepawate."

⁹Maa pemunya pekadu peparawaka rame pemaa kuaita miraita, asui Deus nyenga kuximawara uxari yakuawa puxuwerawaita penye.

¹⁰Awa uruyari panye kua Deus nyenga kuximawara, maa uyawi yepenyute nyenga anyunte umpena aepawate sese panye.

¹¹Nyãse kua umbeuwaa terexari nerimiriku, umbeu yuiri tereyuká mira. Asui tirame rexari nerimiriku, maa reyuká mira anyunte remunya puxi Deus nyenga kuximawara rese.

¹²Ape pepurungita puranga, pemunya yuiri puranga aintayawe kuaita umbeuwaita kuri aintaresewara ipupe kua nyenga uyurawawaa yande.

¹³Nyãse tikuri pirasua umaa ixupe umbeu rame sesewara kua tiwa pirasua umaa amuita supe. Pirasua resewara umaa yande umburi yanesui kua puxuwerawa umbeuwaa yaneresewara.

¹⁴Semuita, timaa arama ixupe kua yepe umbeuwaa uruyari puranga, tirame umunya puranga. Maitaa kuri umukaturu ae kua uruyarisawa yawe?

¹⁵Aikue rame nemu u nerendira tirame uriku irupa u timbiu yuiri,

¹⁶Asui yepe pesuiwara umbeu ainta supe arama: "Pesuana puranga, pemundeu perupa saku arama pepira, pembau peapu." Maa timaa uxari ainta supe kua watariwaa aintapira supe, ape maitaa kuri uajudari kua umbeuwaa?

¹⁷Yawete yuiri kua uruyarisawa umanuwaa ae uiku rame yepenyu tirame uriku yamunyawaita purangawaa.

¹⁸Maa yepe umbeu kuri: "Inde reruyariwaa, asui ixe hariku hamunyawaita purangawaita; remukame hamaa reruyariwaa tirameana remunya maantu puranga, asui hamukame kuri remaa hamunyawaita purangawaa irumu kua haruyariwaa."

¹⁹Maitaa reruyari yepenyute kua Deus? Ape remunya puranga, nyãse kuaita demuniwita aintauruyari yepenyu ae, asui aintauriri.

²⁰Inde apigawa retentuwaa, maitaa reputari hamukame remaa retentuwaa kua uruyarisawa, tirame uriku remunyawaita purangawaita.

²¹Maitaa tiserá puranga umaa ixupe kua yaneramunya Abraão umunya resewara puranga, uxari irumu usapi rendawa upe kua taira Izaki?

²²Remaa kuiri, kua uruyarisawa upuraki yepewasu umunyawaita purangawaa irumu, asui usikana kua uruyarisawa umunyawaita purangawaa resewara.

²³Asui umunya kuaye aintaumpinima umbeuwaa yawe: "Abraão uruyari Deus asui sesewara purangawaa Deus umaa ixupe. Asui aintauseruka ae Deus sumuara ae."

²⁴Ape pekuawate purangawaa Deus umaa apigawa umunyawaita purangawaita resewara timaa uruyari resewarantu maa.

²⁵Asui yawete yuiri kua warixiwaa Raabi, maitaa tiserá purangawaa Deus umaa ae umunyawaita purangawaa resewara, usuanti irumu kuaita aintaumunduwaita umaa aintarunde, asui umundu ainta aintauyuiri amu pee rupi.

²⁶Nyãse kuaye yanepira yawe umanu ae tirame uriku espiritu, yawete yuiri kua uruyarisawa tirame uriku yamunyawaita purangawaa, umanu ae.