Read Nhengatu Tiagu 3 Bible Online

Tiagu 3 - Nhengatu bible

Tiagu 3

¹Semuita, tepexari siya kuaita umbuesaraita pesuiwaraita, nyãse pekuawate Deus kuri umbeu kirimbawa piri yaneresewara yande umbuesaraita aintasui kuaita amuita.

²Nyãse panye yande siya viaji yayawi, ape aikue rame yepe tiwa uyawi inyenga irumu, kua apigawa purangawaa ae, ukuawa yuiri upukuari panye ipira.

³Yapukuari rame kavaluita yuru aintaumunya arama kuaye yaputariwaa yawe, yapuderi yuiri yamundu panye aintapira.

⁴Pemaa yuiri kuaita naviwita ipuwasuwaita ainta, asui iwitu kirimbawawaa upeyu ainta, maa kua pilutu urasu ae maa kiti uputari usu kua lemi kuairawaa irumu.

⁵Yawete yuiri kuaira kua yaneapeku, umbeu nyenga turusuwaa. Pemaa maitaa kua tata kuairawaa upuderi usapi turusuwaa.

⁶Asui tata kua yaneapeku. Kua yaneapeku uiku yanepira rakanga piterupi kuaye mundu puxuwerawa yawe, umuaiwa panye yanepira, umundeka panye kua yanepira uputariwaa umunya, kua infernu umundeka yaneapeku.

⁷Kuaita miraita aintaupuderi aintaumunyaruima panye suu, panye wirá, panye maiwaita, parana puraita yuiri. Aintaumunyaruima siyawaita.

⁸Tiawa aintasuiwara kuaita apigawaita upuderi umunyaruima kua iapeku, tiupuderi timaarese ae, teresemu ae venenu irumu.

⁹Yaneapeku irumu yamee purangawaa yaneruixawa supe, yanepaya supe yuiri, irumute yuiri yambeu puxi aintarese kuaita apigawaita kuaita Deus umunyawaita iyawe.

¹⁰Yepenyu yaneyuru sui yamusemu nyenga purangawaa, nyenga puxuwerawa yuiri. Semuita tipuranga yamunya yawe.

¹¹Maitaa yepe ii rukena upuderi umusemu ii purangawaa, irawawaa yuiri?

¹²Semuita, maitaa kukura upuderi umusemu iya patawa? Maitaa fava upuderi umusemu iya kukura? Yawete yuiri kua ii rukena sembikawaa, tiupuderi umusemu ii seẽwaa.

¹³Awa ukuawa pepiterupi, urikute umukame yamaa umunyawaita purangawaita ukuawasawa tiwa ipiaiwasawa irumu.

¹⁴Maa periku rame pemuasisawa irawawaa pepia upe, peputari rame peyumusuuri penyepawate, tepembeu purangawaa peresewara, tepeganani sese kua nyenga supiwa.

¹⁵Nyãse kua pemanduarisawa yawewaa timaa iwaka suiwara ae, maa kua mundu upewara ae, mira suiwara ae, Yurupari suiwara ae.

¹⁶Kuaita umuasiwaita aintapia upe, kuaita uputariwaita uyumusuuri aintapawa, aintauriku yuiri kuri puxuwerawa aintapia upe, aintaumunya panye puxuwerawa.

¹⁷Maa kua ukuawasawa iwaka suiwara uxari ikiaimawaa yamanduarisawa, uxari timaarese yande, uxari timaa ipiaiwa yande, uxari yasendu ainta supe puranga, uxari pirasua yamaa amuita supe, uxari yamunya purangawaa, timaa uxari mukuĩ yamanduarisawa, timaa uxari retentuwaita yande.

¹⁸Ainta supe arama kua iya puranga aintauyutima timaarese.