Read Nhengatu Tiagu 4 Bible Online

Tiagu 4 - Nhengatu bible

Tiagu 4

¹Awataa uxari pemaramunya arama? Awataa uxari peyuyakawa arama? Maitaa tiserá kuaita peputariwaita pemunya kirimbawa kuaita umaramunyawaita pepira upe?

²Pemuasi, maa timaa nungara periku, asui peyuká mira. Pemuasi, maa tipewasemu penye arama, ape pemaramunya pemunya yuiri kera. Timaa nungara periku nyãse tipepurandu.

³Pepuranduana irumu maa tiuxari penye arama, nyãse puxi pepurandu irumu, anyunte peputari peyumusuuri penyepawantu irumu kua umeewaa penye arama.

⁴Penye tiwaita supi penye. Maitaa tiserá Deus ruanyana kuaita uputariwaita kua mundu sumuaraita ainta? Ape mayewaa uputari kua mundu sumuara ae anyunte umuruanyana Deus.

⁵Maitaa pemanduari retentuwaa umbeu kua aintaumpinimawaa kuera: "Kirimbawa umuasi yande kua Espiritu uxariwaa yanepia upe."

⁶Maa uxari yande arama turusu ipurangasawa, ape umbeu aintaumpinimawaa upe: "Deus upuamu aintaruaxara kuaita umanduariwaita purangawaita ainta, maa uxari ainta supe ipurangasawa kuaita tiwaita umanduari purangawaa ainta."

⁷Ape peyuxari Deus supe arama. Pemuruanyana kua Yurupari, ape kuri uyawawa pesui.

⁸Pemusuaki Deus, ape kuri umusuaki penye. Pemuyasuka peipu penye puxuwerawaita, asui pemuyasuka yuiri pepia penye mukuĩwaita pemanduarisawa.

⁹Peyumusasiyara, pejemeri, peyaxiu. Pemburi pesui kua upukásawa peyaxiu arama, pexari umusasiyara penye kua umusuuriwaa penye.

¹⁰Peyumukuaira penyepawate Deus umaa, asui usupiri kuri penye.

¹¹Semuita, tepembeu puxi amuita rese. Kua umbeuwaa puxi sumuara rese umbeu puxi sese kua Deus nyenga kuximawara. Maa rembeu rame puxi sese kua Deus nyenga kuximawara tiremunya puranga sese, maa rembeu puxi sese.

¹²Yepenyute kua uxariwaa yande arama Deus nyenga kuximawara, aete kua umbeuwaa yaneresewara, aete kua upuderiwaa umukaturu yande, upuderi yuiri uxari yakanyemu.

¹³Pemaa penye pembeuwaita: —Kuiri u wirande yasu arama amu tetama kiti, yaiku arama yepe akayu yaganyari arama yanemaa arama.

¹⁴Tipekuawa maitaa kuri pesasawa wirande. Awataa penye. Penyete kuaye serenu yawe uyariwaa kutara asui ukanyemu.

¹⁵Maa perikute pembeu: —Yaneruixawa uputari rame yapaka rame yande, asui yamunya kuri ae.

¹⁶Asui kuiri anyunte pembeu sese kua peputariwaa pemunya pemanduari resewara pekuawa penye panye. Puxi panye kua pembeuwaa yawe.

¹⁷Awa ukuawa umunya purangawaa, asui tiumunya ae, umunya pekadu.