Read Nhengatu Tiagu 5 Bible Online

Tiagu 5 - Nhengatu bible

Tiagu 5

¹Kuiri penye rikuita, peyaxiu, pesasemu sesewara kua pepurarawaa kuri.

²Pemaa iyukana, asui trasa umbawana perupaita.

³Peyaraita uru suiwaraita, prata yuiri ferujuana ainta, asui aintaferuju umbeu peresewara, asui umbau kuri perukuera kuaye tata usapiwaa yawe. Pemuatiriana pemaa anyu aramawaa ara runde.

⁴Pemaa, kua aintaupurakiwaa rikuyara pesaisu aintasui kuaita upuuwaita pekupixawa upe usenuiwana kirimbawa, asui kua aintaruixawa kuaita siyawaita usenduana aintausenui kuaita upuuwaita.

⁵Puranga peiku kua mundu upe pemaa irumu, peyumusuuri, peyumukirá kua mundu purangasawa irumu.

⁶Pexariana tiarama ueskapari kua apigawa purangawaa, asui peyuka ae, maa tiumuruanyana penye.

⁷Ape penye semuita, periku pasiensia ate yaneruixawa uri. Pemaa kua upurakiwaa kupixawa upe usaru uikupuku imitima iya ate amana uwari.

⁸Ape penye peaguentari yuiri. Asui pemukirimbawa pepia nyãse kuayentuana yaneruixawa rangawa uri arama.

⁹Semuita, tepembeu amu resewara tiarama kuri umbeu peresewara, nyãse kua umbeu yaneresewara uikuana ukena ruaki.

¹⁰Semuita, pemaa perangawa maye kuera aintaupurara, maye kuera yuiri aintauwaguentari kuaita utitikawaita umbeuwaita yaneruixawa rera rese.

¹¹Suuriwaita yaseruka kuaita uikuwaita kuera santa. Pesenduana maye kuera uiku santa kua Jú, pekuawate maye kuera yaneruixawa uxari ixupe turusu purangawaa anyu aramawaa; pekuawate purangawaa yaneruixawa pirasua umaa yande arama.

¹²Ape semuita, tepembeu kirimbawa nyenga iwaka rese, mundu rese yuiri, tiyuiri maa resentu; pembeu rame ẽẽ, perikute pemunya kuaye pembeuwaa yawe, yawete yuiri pembeu rame umbaa, yawaite puxi aintaumbeu perese.

¹³Upurara rame yepe pesuiwara, urikute upurandu Deus irumu. Suuri rame yepe urikute unyengari purangawaa.

¹⁴Imãsi rame yepe pesuiwara, urikute usenui kuaita ingreja serakuenawaita, aintaupurandu arama sese, asui aintauxari azeti iakanga rese yaneruixawa rera rupi.

¹⁵Asui aintaupurandu resewara uruyarisawa irumu umukaturu kuri kua imãsiwaa, asui yaneruixawa usupiri kuri ae mãsi sui, umunya rame ipuxuwerasawa umburi kuri isui ae.

¹⁶Ape pembeu pepekadu perumuaraita ainta supe, pepurandu perumuaraita rese, umukaturu arama kuri penye mãsi sui. Deus kuri usendu ixupe kua purangawaa upuranduwaa irumu kirimbawa.

¹⁷Asui kua Elia apigawa ae kuaye yaneyawe, asui upurandu Deus irumu kirimbawa tiarama amana uwari, asui musapiri akayu seis yasi yuiri timaa amana uwari iwi rese.

¹⁸Asui upurandu mukuĩsawa Deus irumu, asui amana uwari iwaka sui, asui usini panye mitima iwi sui.

¹⁹Semuita, yepe pesuiwara uyusupari rame ae isui kua nyenga supiwa, asui amu umuyuiri ae,

²⁰Pekuawate kua umuyuiriwaa kua uyusupariwaa sapee puxuwerawa sui, umukaturu kuri ae manusawa sui, asui uyumimi ipuxuwerasawa siyawaita.