Read Nhengatu 1 Pedru 2 Bible Online

1 Pedru 2 - Nhengatu bible

1 Pedru 2

¹Ape pexari pesui panye puxuwerawa, panye gananisawa yuiri, panye retentuwaa, panye umuasisawa yuiri, panye marandua puxuwerawa yuiri.

²Pesikari kirimbawa kua kambi yukise supiwa Espiritu rese kuaye taina pisasua usikariwaa yawe uu arama, uxari arama peyukiriari puranga ipupe, umukaturu arama kuri penye.

³Pesaã rameana purangawaa kua yaneruixawa.

⁴Peyuiriana ipiri kua ita upakawaa aintausaisuwaa kuaita apigawaita, maa Deus uparawakawaa ae, purangawaa ae.

⁵Asui penye kuaye itaita upakawaita yawe, ape pesikari peyusupiri penyepawate Espiritu ruka arama, saserdutita arama kuri penye purangawaita, pexari arama kuri Deus supe kua pexariwaita purangawaita, ipupe kua Jesus Kristu.

⁶Nyãse yawe aintaumpinima: "Kuiri haxari yepe ita Sião upe, yepe ita santawaa uka uiku aramawaa sese haparawakawaa purangawaa, asui awa rame uxari ipia sese tikuri uyumutiĩ ae."

⁷Ape sipiwasuwaa penye arama ae penye peruyariwaita, maa ainta supe kuaita tiwaita uruyari, aete kua ita aintaumburiwaa kuaita umunyawaita uka, kuiri ita santa ae, uka uiku aramawaa sese.

⁸Asui kua ita uxari aintauwari sese, asui kua ita uxari yuiri aintapiaiwa ainta, tiresewara aintauruyari kua nyenga aintauwari nyãse yawe kuera Deus ukuawa aintarese.

⁹Maa penye imiraita penye uparawakawaita, isaserdutita penye kua peruixawa, imiraita penye purangawaita pemanduarisawa, Deus miraita penye ixupe aramawaita pembeu arama kuri umunyawaita purangawaita resewara, kua usenuiwaa penye pitunawasuwaa sui umuturiwaa purangawaa kiti.

¹⁰Kuxima tiwa miraita penye, maa kuiri Deus miraita penye, kuxima tipirasua umaa penye, maa kuiri pirasua umaa penye.

¹¹Penye hagustariwaita, penye aintaumusaĩwaita apekatu kiti, hapurandu penye tiarama pemunya kua pepira uputariwaa umunya kua umunyawaa kera pemanduarisawa ruaxara.

¹²Pemunya puranga aintapiterupi kuaita tiwaita judeu, asui aintaumbeu rame peresewara pemunya puxi, aintaumaa arama kuri kuaita pemunyawaita purangawaa, aintaumee arama kuri purangawaa Deus supe umbeu irumu kuri peresewara.

¹³Yaneruixawa resewara peruyari kuaita umunduwaita penye kua mundu puraita, panye ixupe kua aintaruixawa kirimbawa piriwaa aintasui,

¹⁴Panye yuiri ainta supe kuaita guvernaduruita umunduwaita aintaumpurarakari arama ainta kuaita umunyawaita puxuwera, aintaumbeu arama kuri aintaresewara puranga kuaita umunyawaita puranga.

¹⁵Nyãse Deus uputari pemukiriri ainta kuaita apigawaita tiwaita ukuawa, pemunya resewara puranga.

¹⁶Peiku kuaye apigawa uyurawawaa yawe, tepemunya puxuwera uyurawa resewara penye, maa peiku kuaye upurakiwaita yawe Deus supe arama.

¹⁷Perespetari panye kuaita miraita, pegustari kuaita peanamaita, pesikie Deus sui, perespetari kua peruixawa kua mundu pura.

¹⁸Penye upurakiwaita, peruyari kuaita pepatrãoita pesikie resewara aintasui, maa tiaintantu kuaita umunyawaita penye arama puranga tiwaita ipiaiwa, maa yawete yuiri kuaita umunyawaita penye arama puxi.

¹⁹Suuri Deus umaa ixupe kua uaguentari umanduari resewara Deus aintaumpurarakari rame ae sesewara kua tiwa umunya.

²⁰Maitaa periku purangawaa peaguentari rame aintaumpurarakari irumu penye sesewara kua pemunyawaa puxi. Maa peaguentari rame aintaumpurarakari irumu penye sesewara kua purangawaa pemunyawaa, ape kuri suuri Deus umaa penye arama.

²¹Nyãse sesewara usenui penye, nyãse upurara peresewara kua Kristu, ape uxari pemaa arama perangawa ae, pesu arama sakuera sapee rupi.

²²Tiumunya pekadu, tiyuiri aintauwasemu gananisawa iyuru sui.

²³Aintaumunya irumu ixupe puxi tiumuyuiri ainta supe puxuwerawa, asui aintaumpurarakari irumu ae, asui tiuputari umpurarakari ainta sikuyara, maa uxari ipia sese kua umbeuwaa aintaresewara supiwa.

²⁴Aepawate urasu yanepuxuwerasawa ipira upe mirá rese, umanu arama yande yanepuxuwerasawa sui, yapaka arama irumu kua purangawaa Purangana penye aintaresewara kuaita iperewaita.

²⁵Nyãse uyusupariwaita kuera penye kuaye uvelyaita yawe, maa kuiri peyuiriana ipiri kua usaruwaa penye, kua umaawaa pepia.