Read Nhengatu 2 Pedru 1 Bible Online

2 Pedru 1 - Nhengatu bible

2 Pedru 1

¹Ixe Simão Pedru, upurakiwaa ixupe kua Jesus Kristu umunduwaa yuiri. Penye arama perikuwaita kua uruyarisawa kuaye yaneyawe sese kua ipurangasawa kua yaneDeus kua umukaturuwaa yande Jesus Kristu yuiri.

²Haputari uxari penye arama turusu piri ipurangasawa, timaaresesawa yuiri, pekuawa resewara kua Deus yaneruixawa Jesus yuiri.

³Ukuawasawa purangawaa irumu uxari yande arama panye maa yaiku arama puranga, yamanduari arama yuiri ae, yakuawa resewara kua usenuiwaa yande ipurangasawa rese, ukuawasawa rese yuiri.

⁴Nyãse aintairumu uxari yande arama kuaita purangawaita umbeuwaita yande arama turusuwaa, umukaturu arama kuri penye aintairumu isui kua iyukawaa uikuwaa kua mundu upe sesewara kua yanepira uputari yamunya, periku arama irumu ukuawasawa purangawaa.

⁵Asui sesewara perikute pesikari kirimbawa pexari uruyarisawa rese kua pemirasawa, asui pemirasawa rese pexari pekuawasawa;

⁶Asui pekuawasawa rese pexari kua pemuserana arama pepira, asui umuseranasawa rese pexari pepasiensia, asui pepasiensia rese pexari pemanduarisawa Deus rese;

⁷Asui pemanduarisawa Deus rese pexari pegustari perumuaraita, asui pegustari perumuaraita rese pexari ugustarisawa.

⁸Nyãse periku rame ainta pepia upe, aintauyukiriari rame aintawajudari penye tiarama pitua penye, tiarama iyaimawaa penye ukuawasawa rese kua yaneruixawa Jesus Kristu.

⁹Nyãse kua tiwa uriku ainta anyunte sesaimawaa ae, tiumaa apekatu, tiumanduari maye kuera Jesus umuyasuka isui ipekadu kuximawara.

¹⁰Ape serumuaraita pesikari pekuawa kirimbawa xinga Deus usenuiwaita penye, uparawakawaita penye, ape pemunya rame kuaye tikuri peyawi.

¹¹Ape turusu kuri aintaupirari penye arama pewike arama ape yaneruixawa Jesus umunduwaa upe tiwa upawa, kua umukaturuwaa yande.

¹²Ape yawewarawate kuri haputari haxari pemanduari sese, pekuawa pukusawate ae, peiku rame santa sese kua nyenga supiwa perikuanawaa.

¹³Hamanduari puranga haiku ramere sepira upe, hambaka penye irumu kua nyenga haxariwaa ipupe pemanduari ae.

¹⁴Nyãse hakuawa kuayentuana serunde serangawa hasemu arama sepira sui kuaye yaneruixawa Jesus uxariwaa yawe hakuawa.

¹⁵Mayentu kuri hapuderi haputari haxari pemanduari kua nyenga mairamentu kuri hasu rireana kuri pesui.

¹⁶Nyãse timaa yambeu penye arama nyenga ukuawawaa yawe yamunyawantu yande pawantu yambeu rame penye arama uri yaneruixawa Jesus Kristu ukuawasawa rese yuiri, maa yaneresa irumu yamaa kuera ipurangasawa.

¹⁷Nyãse yanepaya Deus umee irumu ixupe irespeitu, ipurangasawa yuiri, asui inyenga irumu umbeu ixupe purangawaa iwaka sui, kuaye unyee: "Aete seraira haputariwaa, suuri hamaa ixupe."

¹⁸Nyãse yasendu kua nyenga uriwaa iwaka sui, yaiku rame irumu iwitera purangawaa rese.

¹⁹Asui kuiri uxari xinga yakuawa supiwa kua nyenga aintautitikawaa sese. Puranga pesendu ixupe kua nyenga kuaye yamaawaa yawe turi umuturiwaa pitunawasu sui ate murutingana ae, usemu yuiri kuri pepia upe estrela kuemaitewara.

²⁰Perikute pekuawa panye sui tiyapuderi yakuawa yakuawasawa irumu kua aintautitikawaa aintaumpinimawaa;

²¹Nyãse timaa kuera aintautitika aintaukuawasawa irumu kuaita apigawaita, maa kua Espiritu Santu upuraki aintapia upe, asui aintaumbeu kua Deus uxariwaa aintaumbeu.