Read Nhengatu 1 Juão 2 Bible Online

1 Juão 2 - Nhengatu bible

1 Juão 2

¹Setainaita, yawe hampinima penye arama tiarama pemunya pepekadu, maa yepe umunya rame ipekadu yarikute yepe upuranduwaa yanerese yanepaya irumu, aete Jesus Kristu kua purangawaa.

²Asui aete kua upurarawaa yanepekadu resewara, maa timaa yanepekadu resewarapawantu maa aintapekadu resewara yuiri panye kuaita mundu puraita.

³Yamunya rame kuaye umbeuwaa yawe, asui ipupe yapuderi yakuawa yakuawana ae.

⁴Kua umbeuwaa: "Hakuawate ae;" maa timaa uruyari kua umbeuwaa, gananiwera ae, timaa uriku kua nyenga supiwa ipia upe.

⁵Kua uruyariwaa kua inyenga supiwa ugustari Deus ipia upe. Ipupe yapuderi yakuawa yaiku ipia upe.

⁶Kua umbeuwaa uiku ipia upe urikute uwata yuiri kuaye Jesus uwatawaa yawe.

⁷Hagustariwaita, timaa hampinima penye arama nyenga pisasuwaa, maa kua kuximawara perikuwaa uyupirungawa suiwara, kua nyenga kuximawara aete kua nyenga pesenduwaa kuera.

⁸Maa hampinima penye arama yepe nyenga pisasuwaa, supiwa ae sese perese yuiri, nyãse pitunawasuwaa usasawana, asui umuturiana kua turi supiwa.

⁹Kua umbeuwaa uiku turi upe, maa puxire umaa imu, uikure pitunawasuwaa upe.

¹⁰Kua ugustariwaa imu uiku turi upe, tiyamaa sese umuapatukasawa.

¹¹Maa kua puxi umaa imu, uiku pitunawasuwaa upe, uwata yuiri pitunawasuwaa upe, tiukuawa maa kiti usu nyãse pitunawasuwaa usikindawa sesa.

¹²Setainaita, hampinima penye arama nyãse umburiana pesui pepekadu sera resewara.

¹³Hampinima penye arama penye aintapayaita nyãse pekuawana ae kua uikuwaa ara rundere. Hampinima penye arama penye kurumiwasuita nyãse pemuserana kua puxuwerawa.

¹⁴Setainaita, hampinimana penye arama nyãse pekuawana kua yanepaya. Hampinimana penye arama penye aintapayaita nyãse pekuawana kua uikuwaa ara rundere. Hampinimana penye arama penye kurumiwasuita nyãse kirimbawawaita penye, nyãse Deus nyenga uiku pepia upe, asui pemuseranana kua puxuwerawa.

¹⁵Tepegustari kua mundu, tiyuiri kua mundu yaraita. Awa ugustari kua mundu, tiugustari yanepaya ipia upe.

¹⁶Panye kua mundu upewaa, yanepira uputariwaa umunya, yaneresa uputari umuasi yuiri, panye kua yaputariwaa yamunya kirimbawa kua mundu upe yuiri, timaa yanepaya suiwara ae, maa kua mundu upewara ae.

¹⁷Asui kua mundu upawa kuri, panye yuiri kua uxariwaa kirimbawa yaputari yamunya, maa kua umunyawaa kuaye Deus uputariwaa yawe uiku kuri yawewarawate.

¹⁸Setainaita, kuiri peikuana anyu aramawaa upe, pekuawate uri kuri kua Kristu ruanyana, kuiri aintauriana siya Kristu ruanyanaita, ape yakuawate yaiku anyu aramawaa upe.

¹⁹Aintausemu yanesui nyãse timaa yanesuiwaraita ainta, yanesuiwaraita rame ainta aintauiku yaneirumu, maa aintausemu yanesui yakuawa arama timaa yanesuiwaraita ainta panye.

²⁰Maa uxariana perese ukuawasawa kua purangawaa, ape pekuawana panye.

²¹Timaa hampinima penye arama tiresewara pekuawa kua nyenga supiwa, maa hampinima penye arama pekuawa resewara ae, pekuawa timaa gananisawa usemu nyenga supiwa sui.

²²Awataa kua ugananiwaa? Aete kua umbeuwaa timaa Kristu kua Jesus. Kua Kristu ruanyana uyumimi Kristu ipaya yuiri.

²³Kua uyumimi Deus raira timaa uriku yanepaya Deus, maa kua umbeuwaa Deus raira resewara urikute yanepaya Deus.

²⁴Pexari uiku pepia upe kua pesenduwaa uyupirungawa suiwara, uiku rame pepia upe kua pesenduwaa uyupirungawa suiwara ape peiku yuiri kuri Deus raira ipia upe, yanepaya Deus ipia upe yuiri.

²⁵Aete kua mundu tiwa upawa kua umbeuwaa yande arama.

²⁶Yawe hampinima penye arama aintaresewara kuaita usikariwaita uganani penye.

²⁷Maa uiku pepia upe kua ukuawasawa uxariwaa penye arama, timaa watari penye arama amu umbue penye, nyãse ukuawasawa umbue penye arama panye rese, supiwa ukuawasawa timaa gananiwera ae, ape peiku ipia upe kuaye ukuawasawa umbuewaa yawe penye.

²⁸Asui kuiri penye setainaita, peiku ipia upe suuri arama kuri yande yamaa ixupe uri rame kuri, tiarama kuri yayuiri isui yatiĩ resewara yamaa ae uri rame kuri.

²⁹Pekuawa rame purangawaa ae, pepuderi yuiri kuri pekuawa aintaunaseri panye Deus sui kuaita umunyawaita puranga.