Read Nhengatu 1 Juão 3 Bible Online

1 Juão 3 - Nhengatu bible

1 Juão 3

¹Pemaa maye Deus ugustari yande uxari arama Deus rairaita yande, yandete Deus rairaita yande. Sesewara tiaintaukuawa yande kuaita mundu puraita, nyãse tikuera aintaukuawa ae.

²Hagustariwaita, kuiri Deus rairaita yande, maa tire yakuawa maitaa kuri yande, maa yakuawate uri rame kuri yaiku kuri kuaye iyawe, nyãse yamaa kuri maitaa ae.

³Asui awa uriku kua usaruwaa umaa urikute umukaturu umanduarisawa kuaye purangawaa yawe kua Jesus.

⁴Awa umunya puxi tiumukaturu Deus nyenga kuximawara, nyãse puxuwerawa panye kua tiyamunya kuaye Deus nyenga kuximawara umunduwaa yawe.

⁵Pekuawate uri kuera urasu arama yanesui yanepuxuwerasawa, tiyamaa puxuwerawa sese.

⁶Awa uiku ipia upe tiupuderi umunya ipekadu, kua uikuwaa ipekadu rese timaa umaa ae, tiyuiri ukuawa ae.

⁷Serairaita, tepexari amu uganani penye. Kua umunyawaa puranga purangawaa ae kuaye purangawaa yawe Jesus.

⁸Yurupari suiwara kua umunyawaa ipekadu, nyãse kua Yurupari umunya puxi uyupirungawa suiwara. Sesewara uri kua Deus raira umukanyemu arama kuaita Yurupari umunyawaita.

⁹Kua unaseriwaa Deus sui tiupuderi umunya ipekadu, nyãse Deus ukuawasawa uiku ipia upe, asui tiupuderi umunya ipekadu nyãse unaseriana ae Deus sui.

¹⁰Asui sesewara yapuderi yakuawa awataa kuaita Deus rairaita, yapuderi yuiri yakuawa awataa kuaita Yurupari rairaita, awa tiumunya puranga timaa Deus suiwara ae, ae yuiri kua tiwa ugustari sumuara timaa Deus suiwara ae.

¹¹Nyãse aete kua nyenga pesenduwaa uyupirungawa suiwara, umbeu yayugustari arama.

¹²Tepemunya kuaye Kaim yawe kua Yurupari suiwara, asui uyuká itainasawa. Marantaa uyuká ae? Nyãse puxuwerawaita kuaita umunyawaita, asui purangawaita itainasawa umunyawaita.

¹³Semuita, tepesikie pemaa puxi rame aintaumaa penye arama kuaita mundu puraita.

¹⁴Yakuawate yasasawana manusawa sui upaka arama yande nyãse yagustari kuaita yaneanamaita. Awa tiugustari ianamaita uikure manusawa upe.

¹⁵Uyukáwaa mira kua puxi umaa sumuara, nyãse pekuawate timaa yepe uyukáwaa mira uriku ipia upe kua mundu tiwa upawa.

¹⁶Nyãse irumu yakuawa kua gustarisawa, nyãse umanu Kristu yaneresewara, asui yarikute yamanu yande aintaresewara kuaita yaneanamaita.

¹⁷Maa awa uriku kua mundu yara asui umaa sumuara timaa nungara uriku, maa usaisu isui ae, maitaa upuderi uiku ipia upe kua gustarisawa Deus suiwara?

¹⁸Setainaita, timaa puranga yagustari nyenga irumu yaneyuru irumu yuiri, maa yarikute yagustari yamunyawaita irumu supiwa.

¹⁹Ipupe yuiri yakuawa supiwa yande, yapuderi yuiri yaxari timaarese yanepia senunde.

²⁰Mairamentu yanepia umbeu puxi yanerese kirimbawa piri Deus yanepia sui, asui ukuawate panye maantu.

²¹Hagustariwaita, tirame yanepia umbeu yanerese puxi, suuri kuri yamusuaki Deus.

²²Asui maantu yapurandu irumu uxari yande arama ae, nyãse yamunya kua umbeuwaa, yamunya yuiri kua umusuuri aramawaa ae.

²³Aete kua umbeuwaa yande arama yaxari arama yanepia sese kua taira Jesus Kristu, yayugustari arama yuiri kuaye umbeuwaa yawe yande arama.

²⁴Uikute Deus ipia upe kua umunyawaa kua umbeuwaa, asui Deus uiku yuiri ipia upe. Asui ipupe yakuawa uiku yanepia upe irumu kua Espiritu uxariwaa yande arama.