Read Nhengatu 1 Juão 4 Bible Online

1 Juão 4 - Nhengatu bible

1 Juão 4

¹Hagustariwaita, teperuyari panye kuaita espirituita, maa pesaã pemaa ainta kuaita espirituita Deus suiwaraita ainta u timaa, nyãse siya utitikawaita gananiwerawaita aintauwata kua mundu upe.

²Ipupe pepuderi pekuawa kua espiritu Deus suiwara, Deus suiwara panye kua espiritu umbeuwaa Jesus Kristu uri ipira upe.

³Timaa Deus suiwara kua espiritu tiwa umbeu Jesus resewara. Aete iespiritu kua Kristu ruanyana kua pesenduwaa sese uri kuri, asui kuiri uikuana kua mundu upe.

⁴Setainaita, Deus suiwaraita penye, pemuserana kuaita utitikawaita gananiwerawaita, nyãse kirimbawa piri kua uikuwaa pepia upe isui kua uikuwaa kua mundu upe.

⁵Mundu suiwaraita ainta, asui aintaumbeu kua mundu suiwarawaa, asui kuaita mundu upewaraita aintausendu ainta supe.

⁶Deus suiwaraita yande. Asui awa ukuawa Deus usendu yande arama, asui awa tiukuawa Deus timaa usendu yande arama. Asui irumu yakuawa kua espiritu supiwa, irumu yuiri yakuawa kua espiritu gananiwerawaa.

⁷Hagustariwaita, puranga yayugustari, nyãse Deus suiwara kua gustarisawa, asui kua ugustariwaa unaseri Deus sui, ukuawa yuiri Deus.

⁸Kua tiwa ugustari timaa ukuawa Deus, nyãse gustarisawa kua Deus.

⁹Ipupe umuyukuawa yanepiterupi kua gustarisawa Deus suiwara umundu resewara Taira yepenyuwaa kua mundu upe yapaka arama yande irumu.

¹⁰Asui sese yamaa gustarisawa timaa yagustari resewara Deus, maa ugustari resewara yande, ape umundu Taira upurara arama yanepekadu resewara.

¹¹Hagustariwaita, Deus ugustari rame yande turusu, yarikute yayugustari yuiri.

¹²Tire awa umaa Deus. Yayugustari rame Deus uiku yanepia upe, asui ugustarisawa uyukiriari yanepia upe.

¹³Sese yapuderi yakuawa yaiku ipia upe, asui uiku yuiri yanepia upe uxari resewara yande arama iEspiritu.

¹⁴Asui yamaawana, yambeuwana yuiri yanepaya Deus umundu Taira kua mundu kiti umukaturu arama mundu puraita.

¹⁵Awa umbeu Jesus resewara Deus raira ae, Deus uiku ipia upe, uiku yuiri Deus ipia upe.

¹⁶Ape yakuawate yaxari yuiri yanepia sese kua gustarisawa Deus umeewaa yande arama. Gustarisawa kua Deus, asui kua uikuwaa gustarisawa rese uiku Deus ipia upe, asui Deus uiku yuiri ipia upe.

¹⁷Asui kua gustarisawa uyukiriari puranga yanerese, suuri arama yamanduari kua anyu aramawaa ara, nyãse yaiku kua mundu upe kuaye uikuwaa yawe.

¹⁸Tiyamaa sikiesawa gustarisawa rese, maa kua gustarisawa purangawaa umburi isui panye sikiesawa. Nyãse umpurarakarisawa kua sikiesawa, asui kua uiku sikiesawa upe timaa puranga uyukiriari gustarisawa rese.

¹⁹Yagustari nyãse uyupiru ugustari yande.

²⁰Yepe umbeu rame: —Hagustari Deus; asui puxi umaa sumuara, gananiwera ae, nyãse kua tiwa ugustari kua umaawaa tiupuderi ugustari Deus kua tiwa umaa.

²¹Aete kua Deus umbeuwaa yande arama: —Kua ugustari Deus urikute ugustari sumuara yuiri.