Read Nhengatu Juda 1 Bible Online

Juda 1 - Nhengatu bible

Juda 1

¹Ixe Juda upurakiwaa Jesus Kristu supe, ixe Tiagu imu, kuekatu penye arama penye Deus usenuiwaita, ugustariwaita, umukaturuwaita Jesus Kristu ipia upe.

²Pirasua xinga kuri umaa penye arama, uxari xinga kuri penye arama timaaresesawa, gustarisawa yuiri.

³Hagustariwaita, hamanduari rame hampinima penye arama sese kua salvasão yarikuwaa yepewasu, asui hawasemu sepia upe harikute hampinima penye arama, hapurandu arama penye pemaramunya arama aintairumu sesewara kua uruyarisawa uxariwaa ainta supe anyu aramawaa kuaita uruyariwaita.

⁴Nyãse aintauwikeana uyumimisawa upe pepiterupi yepeyepe kuaita tiwaita umanduari Deus, kuaita aintaumpinimawaita sese kuxima aintaukanyemu kuri, asui aintaumutenyuntu kua Deus purangasawa aintaumunya arama kuaye aintauputariwaa yawe, asui aintauyumimi sesewara kua yepenyuwaa yaneruixawa Jesus Kristu.

⁵Asui kuiri haputari haxari pemanduari ae, aintaumbeu rame penye sese panye, umukaturu kuera kuaita miraita Egitu sui, asui arire uxari aintaukanyemu kuaita tiwaita uruyari.

⁶Asui kuaita anjuita tiwaita uiku interu, maa aintauxari aintauiku rendawa, umukaturu pitunawasuwaa upe, upukuari ainta kurenti tiwa upawa irumu senunde kua ara turusuwaa umbeu arama aintaresewara.

⁷Yawete yuiri Suduma, Gumura yuiri, aintayuiri kuaita tetamaita aintaruakiwaita aintauyuxariwaa aintapawa warixisawa supe, aintaumunya arama tenyuntu aintapira irumu aintairumu kuaita tiwaita mira ainta, asui kuiri aintaupurara tata tiwa upawa upe, pemaa arama pesui.

⁸Yawete yuiri kuaita apigawaita ikerupiwaita, aintaumunya puxi aintapira upe, tiaintauruyari guvernu, aintaumbeu puxi serakuenawaita rese yuiri.

⁹Maa kua arkanju serawaa Migel umaramunya rame Yurupari irumu sesewara kua Muize ipira kuera, timaa umbeu ixupe kirimbawa, maa umbeu: "Yaneruixawa kuri umbeu neresewara."

¹⁰Maa kuaita apigawaita aintaumbeu puxi sese panye kua tiwa aintaukuawa, panye sese kua aintaukuawa yuiri, asui aintauyumuaiwa kuri ipupe kua aintaumunyawaa kuaye suu yawe.

¹¹Puxuwera kuri aintarese, nyãse aintauwata Kaim rapee rupi, asui aintaumuasi resewara aintaumunya puxi kuaye Balaão yawe, asui aintaumanu tiresewara aintauruyari kuaye Kure yawe.

¹²Kuaita apigawaita kuaye itaita tiipiimawaa yawe pepiterupi peyumuatiri rame pembau peyugustari resewara, tiaintausikie aintauyumuatiri aintaumbau arama, anyunte aintauyumaa aintapawate, kuaye nuvẽ yawe tiwa uriku ii iwitu upeyuwaa, kuaye mirá iyaimawaa ainta sangawa upe, mukuĩ viaji umanu ainta, tiaintauriku aintarapu.

¹³Kuaye parana turusuwaa gapenusawa yawaitewaa yawe ainta, aintaumburi aintasui aintatiesawa kua aintaumunyawaa tenyuntu, kuaye estrela uyusupariwaa yawe ainta, umukaturu aintarunde kua pitunawasuwaa yawewarawate.

¹⁴Aintarese utitika kuera kua Enuki kua Adão rimiariru, unyee: "Xukui uri aintairumu kua Yaneruixawa kuaita siyawaita purangawaita,

¹⁵Uri arama umbeu aintaresewara panye, umbeu arama aintapuxuwerasawa kuaita tiwaita umanduari ae aintaumunyawaita tiresewara aintaumanduari ae, umbeu arama yuiri kua puxuwerawa aintaumbeuwaa sese kuaita puxuwerawaita tiwaita umanduari ae."

¹⁶Uyakawawaita ainta, sasiyarawaita ainta, umunyawaita ainta kuaye aintapira uputariwaa yawe, umuseranawaita ainta turusu, aintaumusasawa ainta supe nyenga kuaita amuita aintauriku arama kuri purangawaa aintapawate.

¹⁷Maa penye hagustariwaita, perikute pemanduari kua aintautitikawaa sese kuaita yaneruixawa Jesus Kristu umunduwaita.

¹⁸Yawe kuera aintaumbeu penye arama: "Anyu aramawaa upe kuri aintauri kuri kuaita ukasuariwaita aintaumunya puxi kuaye aintapira uputariwaa yawe."

¹⁹Aete kuaita uxariwaita aintautirika aintasui, kua mundu yaraita ainta, tiaintauriku kua Espiritu.

²⁰Maa penye hagustariwaita, peyukiriari puranga sese kua uruyarisawa purangawaa, pepurandu Deus irumu kua Espiritu Santu.

²¹Peiku puranga sese kua gustarisawa Deus suiwara, pesaru pirasua umaa penye arama kua yaneruixawa Jesus Kristu periku arama kuri kua mundu tiwa upawa.

²²Pirasua pemaa ainta supe arama kuaita yepeyepe mukuĩwaita umanduarisawa;

²³Pemukaturu ainta peyuka resewara ainta tata sui, asui kuaita yepeyepe pirasua pemaa ainta supe pesikie resewara aintasui, puxi pemaa aintarupa aintaumukiawaa ipupe kua aintaumunyawaa aintapira irumu.

²⁴Kuiri kua upuderiwaa umukaturu penye tiarama pewari, kua uxariwaa peiku ikiaimawaa suuri umaa kua purangawaa,

²⁵Yamee ixupe arama purangawaa kua Deus yepenyuwaa kua umukaturuwaa yande ipupe kua yaneruixawa Jesus Kristu, aete yaneruixawa, aete yaneruixawa purangawaa, aete kua umunduwaa yande kuxima mundu rundere kuiri yuiri, yawewarawate yuiri, amem.