Read Nhengatu Apukalipisi 1 Bible Online

Apukalipisi 1 - Nhengatu bible

Apukalipisi 1

¹Jesus Kristu uxariwaa ukuawa sese kua Deus uxariwaa umukame iyaraita umaa aintauriwaa kuri aintapiri kutara, uxari ukuawa ae umundu resewara Juão ipiri yepe ianju.

²Umbeu sese panye umaawaa, umbeu sese kua Deus nyenga Jesus Kristu rese yuiri.

³Suuri kuri kuaita uleriwaita kua inyenga sese kua uriwaa kuri, suuri kuri yuiri kuaita usenduwaita kua inyenga, aintayuiri kuaita uruyariwaita panye hampinimawaa, nyãse kuayentuana sangawa yanerunde.

⁴Ixe Juão hampinima penye arama muiri penye setiwaita ingreja Azia upe; umundu penye arama purangasawa timaaresesawa yuiri kua uikuwaa kuiri, kuximare yuiri, kua uikuwaa kuri yuiri, aintayuiri kuaita setiwaita espiritu uikuwaita itrunu runde kiti aintaumundu penye arama yuiri purangasawa timaaresesawa yuiri.

⁵Ae yuiri Jesus Kristu, kua umbeusara supiwa, kua uyupiruwaa upaka manusawa sui, kua umunduwaa muiri kuaita tuixawaita mundu upe. Kua ugustariwaa yande nyãse suwi irumu uyurawa yande yanepekadu sui.

⁶Uxari imiraita yande, uxari isaserdutita yande kua ipaya Deus supe, yamee kuri ixupe purangawaa yawewarawate, amem.

⁷Panye kuri aintaumaa uri kuri nuvi upe, aintaumaa kuri yuiri aintaresa irumu ae panye, aintayuiri kuaita ukutukawaita kuera ae aintaumaa kuri ae, asuiwana kuri panye kuaita miraita kua mundu upe aintauyaxiu kuri sesewara. Supiwa hambeu, amem.

⁸Yaneruixawa Deus umbeu: —Ixete kua Alfa ixete yuiri Umega, ixete yuiri kua kuiriwaa, ixete kua haikuwaa kuxima, ixete kuri kua uriwaa, ixete kua kirimbawawaa panye sui.

⁹Ixe Juão pemu hapurara peirumu yaneruixawa Deus umunduwaa upe, Jesus uxari tiipiaiwa ixe hapurara, haiku kaapuamu rese serawaa Patimu, sesewara kua Deus nyenga, sesewara yuiri kua hambeuwaa Jesus rese.

¹⁰Asui kua Espiritu upisika ixe ukuawasawa irumu yaneruixawa ara upe, asui hasendu serakuera sui yepe nyenga tiapuwaa kuaye trumbeta yawe.

¹¹Umbeu ixe arama: —Rempinima livru upe kua remaawaa, asui remundu ae aintapiri kuaita ingrejaita supe; Efezu kiti, Esmirna kiti yuiri, Pergamu kiti yuiri, Tiatira kiti yuiri, Sardi kiti yuiri, Filadelfia kiti yuiri asui Laudiseia kiti yuiri.

¹²Asui hayereu hamaa awataa kua upurungitawaa seirumu, asui hayereu hamaa seti turi uwapikawaa rendawa uru suiwara.

¹³Asui aintapiterupi kuaita turi rendawa hamaa yepe yawewaa kua unaseri umaa kua ara, asui irupa ipukuwaa, asui iputia upe yepe sinturão uru suiwara.

¹⁴Asui iakanga iawa yuiri murutingawaa ainta kuaye uvelya rawa yawe, kuaye parana tiesawa yawe, asui sesa kuaye tata yawe.

¹⁵Asui ipi kuaye brunze sendiwaa yawe, kuaye brunze yawe aintaumukaturu tata irumu, asui tiapu inyenga kuaye turusuwaa ii yawe.

¹⁶Uriku ipu katusawa upe seti estrela, asui yepe espada usemu iyuru sui saimbewaa mukuĩ ruaxara. Asui suwa umuturi kirimbawa kuaye kurasi umuturiwaa yawe.

¹⁷Asui hamaa irumu ae hawari ipi ruaki kuaye umanuwaa yawe. Maa uxari serese ipu katusawa, asui umbeu: —Teresikie, nyãse ixete kua uyupirungawa, ixete yuiri kua anyu aramawaa.

¹⁸Ixete kua upakawaa, kuxima hamanu ixe, kuiri hapaka ixe yawewarawate, hariku manusawa xavi, infernu xavi yuiri.

¹⁹Kuiri rempinima kua remaawaa, panye kuaita kuiriwaita panye yuiri kuaita uriwaita kuri sakakuera kuaita kuiriwaita.

²⁰Asui kuaita tiwaita rekuawa sese, kuaita seti estrela remaawaa seipu katusawa upe, aintayuiri kuaita setiwaita turi uwapikawaa rendawa uru suiwara, aete kuaita seti estrela ainta anjuita kuaita setiwaita ingreja, asui kuaita seti turi uwapikawaa rendawa aete kuaita seti ingreja.