Read Nhengatu Apukalipisi 13 Bible Online

Apukalipisi 13 - Nhengatu bible

Apukalipisi 13

¹Asui hamaa yepe suu usemu parana turusuwaa sui, uriku dezi iaka, asui seti iakanga, asui muiri iaka rese uriku kurua, asui iakanga rese aintarera puxuwerawaita.

²Asui kuaye yawarate yawe kua suu, asui ipi kuaye ursu ipi yawe, asui iyuru leão yuru yawe. Asui kua dragão uxari ixupe ikirimbawasawa, itrunu yuiri, asui umundusara yuiri.

³Asui hamaa perewa yepe iakanga rese sasiwaa ae, maa ukaiĩwana kua perewa sasiwaa, asui panye kua mundu puraita aintausu sakakuera kua suu nyãse aintausikie aintaumaa ae.

⁴Asui aintaumee ixupe purangawaa kua dragão nyãse uxari ixupe umundusara kua suu, asui yuiri aintaumee purangawaa ixupe kua suu, aintaumbeu: —Awataa yepewasu irumu kua suu? Awataa upuderi umunya kera suaxara?

⁵Asui aintauxari ixupe arama kua suu yepe yuru upurungita arama ae nyenga tenyuntuwara puxuwerawa, asui aintauxari ixupe umundusara umundu arama kuarenta duis yasi.

⁶Asui upirari iyuru umbeu arama tenyuntu Deus rese, umutenyuntu sera, itemplu yuiri, aintayuiri kuaita uikuwaita iwaka upe.

⁷Asui aintauxari yuiri umunya kera aintaruaxara kuaita uruyariwaita umuserana arama ainta. Asui aintauxari ixupe arama umundusara umundu arama panye miraita, panye kuaita upurungita aintanyenga rupi, aintayaweyawe panye kua mundu upe.

⁸Asui panye kua mundu puraita aintaumee kuri ixupe purangawaa kuaita tiwaita uriku aintarera livru upakawaa upe kua kurderu umanuwaa kuximare mundu uyupiru rame.

⁹Awa uriku iapisa kuara urikute usendu.

¹⁰Awa urasu prezu amu umprezu yuiri kuri ae, awa uyuká mira espada irumu, espada irumu kuri aintauyuká ae. Ape yapuderi yakuawa tiaintapiaiwa irumu aintaupurara kuaita uruyariwaita kirimbawa yuiri aintauruyari.

¹¹Asui hamaa yepe suu usemu iwi sui. Mukuĩ ruaxara iaka kuaye kurderu iaka yawe, maa upurungita ae dragão yawe.

¹²Umunya panye maa ukuawasawa irumu umaawaa upe kua suu uyupiru usemu. Asui uxari panye kua mundu puraita aintaumee purangawaa ixupe arama kua suu uyupiruwaa kua perewa ukaiĩwaa isui kua sasiwaa.

¹³Asui umunya yuiri sangawa, uxari tata uwari iwaka sui kua mundu kiti aintaumaa arama kuaita apigawaita.

¹⁴Asui uganani kuaita mundu puraita sangawa irumu umunyawaa senunde kiti kua suu, asui umbeu ainta supe kuaita mundu puraita aintaumunya arama sangawa ixupe kua suu, kua suu aintaumperewawaa espada irumu maa upakate ae.

¹⁵Asui aintauxari uxari upakate kua suu rangawa upurungita arama kua suu, asui kua sangawa kuera uyuká arama panye kuaita tiwaita umee purangawaa sangawa kuera supe.

¹⁶Asui uxari yuiri aintaumusangawa ainta aintaruwa rese u aintaipu katusawa rese panye kuaita ipuiwaitare panye ipuwasuwaita yuiri, panye rikuita yuiri panye pirasuawaita, panye patrãoimawaita, panye rikuita kurumi.

¹⁷Tiarama awa upuderi upiripana tiarama uvenderi yuiri, tirame uriku sangawa kua suu rera u sera siyasawa.

¹⁸Ike aikue ukuawasawa. Awa uriku ukuawasawa upuderi ukuawa isiyasawa kua suu, nyãse apigawa siyasawa ae. Ape isiyasawa seisentu sesenta seis.