Read Nhengatu Apukalipisi 17 Bible Online

Apukalipisi 17 - Nhengatu bible

Apukalipisi 17

¹Asui yepe anju aintasuiwara kuaita setiwaita urikuwaa seti kupu uri sepiri umbeu ixe arama: —Reyuiri haxari remaa kuri mayetaa upurara kua warixiwaa uwapikawaa panye parana upe.

²Kua warixiwaa irumu kuaita tuixawaita mundu upewaita, asui kuaita miraita mundu puraita aintaukau iwarixisawa puxuwerawa irumu.

³Asui kua anju urasu ixe Espiritu ukuawasawa irumu yepe kampu kiti, akiti hamaa yepe kunya uwapika yepe suu pirangawaa rese, asui teresemu kua suu sera puxuwerawa irumu, uriku seti iakanga asui uriku dezi iakaita.

⁴Asui isaya kua kunya piranga pixunawaa asui piranga murutingawaa yuiri, siya sese ipurangasawa uru suiwara, ita purangawaa, perula yuiri, asui ipu upe uriku yepe kupu uru suiwara teresemu ae ipuxuwerasawa irumu iwarixisawa ikiasawa irumu yuiri.

⁵Asui suwa upe aintaumpinima sera umbeu arama sesewara: "Babilunia turusuwaa, warixiwaa maya ae, mundu puraita puxuwerasawa maya ae."

⁶Asui hamaa ukau kua kunya aintaruwi irumu kuaita uruyariwaita, aintaruwi irumu kuaita aintaumbeu testemunyu Jesus rese, asui hasikie hamaa irumu ae.

⁷Maa kua anju umbeu ixe arama: —Marantaa resikie remaa? Hambeu kuri inde arama mayesawataa kua kunya, mayesawataa kua suu yuiri uwapikawaa sese urikuwaa seti iakanga asui dezi iakaita yuiri.

⁸Kua suu remaawaa, uikuwaa kuera, tiwa yamaa kuiri, usemuwaa kuri tiipiwaa sui usu arama kuri ukanyemu ae. Asui panye kuaita mundu puraita tiwaita aintauriku aintarera livru upakawaa upe mundu uyupirungawa rame aintausikie aintaumaa kua suu uikuwaa kuera, kua tiwa aintaumaa kuiri, maa uri kuri.

⁹Aintaupuderi aintaukuawa ae kuaita ukuawawaita; seti iwitera aintate kuaita seti akanga, asui kua kunya uwapika aintarese. Asui seti tuixawaita aintayuiri.

¹⁰Asui sinku aintasuiwara aintauwari, asui yepe uiku kuiri asui amu uri kuri aintaruixawa arama ae kutarantu.

¹¹Asui kua suu uikuwaa kuera tiwa yamaa kuiri, aete yuiri yepe aintasuiwara kuaita setiwaita maa uitusa ae, usu ukanyemu arama.

¹²Asui kuaita dezi iakaita remaawaa dezi tuixawaita, ainta tire aintauriku aintarendawa tuixawa arama ainta maa kua suu uxari kuri ainta supe umundusara tuixawa yawe irumu kua suu kutarantu yepe ura.

¹³Yepenyu aintaumanduarisawa, asui aintauxari suu supe aintaukuawasawa umundusara yuiri.

¹⁴Aintaumunya kuri kera suaxara kua kurderu, asui kua kurderu umuserana kuri ainta, nyãse aete aintaruixawa kuaita aintaruixawaita, aete yuiri aintaruixawa kuaita tuixawaita, asui aintaumuserana kuri yuiri irumu kuaita uparawakawaita uikuwaa santa irumu.

¹⁵Asui unyee ixe arama: —Kua parana remaawaa uwapikawaa ape kua kunya warixiwaa aete kuaita miraita siyawaita, panye kuaita aintarendawa yaweyawe, panye kuaita upurungitawaa panye nyenga rupi.

¹⁶Asui kua dezi iakaita remaawaa asui kua suu yuiri, puxi kuri aintaumaa kua kunya warixiwaa, asui aintauyuka isui panye imaa yawentu arama kuri ae, asui aintaumbau kuri sukuera asuiwana kuri aintausapi ae tata upe.

¹⁷Nyãse Deus uxari aintaumunya aintapia sui kuaye uputari yawe aintaumunya, yepewasu arama aintaumanduari aintauxari suu supe panye kua umundusara aintauriku ate Deus umbawa umunya kuaye uputariwaa yawe.

¹⁸Asui kua kunya remaawaa aete kua tetama turusuwaa umunduwaa ainta panye kuaita tuixawaita kua mundu kiti.