Read Nhengatu Apukalipisi 2 Bible Online

Apukalipisi 2 - Nhengatu bible

Apukalipisi 2

¹Asui rempinima ixupe kua ingreja anju Efezu kiti: —Yawe umbeu kua upisikawaa ipu katusawa upe kuaita seti estrela, kua uwatawaa aintapiterupi kuaita seti turi uwapikawaa rendawa uru suiwara.

²Hakuawa aintarese kuaita remunyawaita, nemuraki yuiri, hakuawa yuiri maye tinepiaiwa repurara, tirepuderi reaguentari aintairumu kuaita apigawaita puxuwerawaita, asui resaã rekuawa kuaita umbeuwaita Jesus umunduwaita ainta maa umbaa umunduwaita ainta, asui rekuawate gananiweraita ainta.

³Hakuawate tinepiaiwa repurara, asui reaguentari serera rese, asui timaa nekuere inde.

⁴Maa yepe nyenga hambeu nerese: —Timaa regustari ixe kuiri kuaye regustariwaa yawe ixe kuxima reyupiru.

⁵Ape remanduari kuiri kua rewariwaa isui, asui sasiyara remanduari nepuxuwerasawa asui remunya kuaye reyupiru remunya. Tirame yawe remunya hayuiri kuri nepiri hayuka neturi uwapikawaa rendawa sendawa sui, tirame sasiyara remanduari nepuxuwerasawa.

⁶Maa yepe reriku purangawaa, puxi remaa aintaumunyawaita kuaita nikulaitaita, ixe yuiri puxi hamaa ainta.

⁷Kua urikuwaa iapisa kuara usendu mayetaa Espiritu umbeu ainta supe kuaita ingrejaita. Kua umuseranawaa haxari kuri umbau iya kua mirá upakawaa upuamu Deus paraizu upe.

⁸Asui kuiri rempinima ixupe kua ingreja uikuwaa Esmirna kiti: —Yawe umbeu kua uyupirungawa kua anyu aramawaa yuiri, kua umanuwaa kuera asui uyuiri upaka ae.

⁹Hakuawate maye repurara, hakuawate yuiri pirasua inde, maa riku inde, hakuawate yuiri mayetaa aintaumbeu puxi nerese kuaita umbeuwaita judewita aintamaa timaa judewita ainta, anyunte Yurupari sinaguga ainta.

¹⁰Teresikie sesewara kua repurarawaa kuri. Kua Yurupari kuri umburi yepeyepe pesuiwara kadeya kiti uputari usaã penye pexari arama kua peruyariwaa, asui pepurara kuri akiti dezi ara; kuiri reiku santa ate remanu inde, ape kuri haxari inde arama kua kurua upakawaa.

¹¹Kua urikuwaa iapisa kuara usendu mayetaa Espiritu umbeu ainta supe kuaita ingrejaita. Kua umuseranawaa tikuri upurara mukuĩsawa manusawa.

¹²Asui kuiri rempinima ixupe kua ingreja anju uikuwaa Pergamu kiti: —Yawe umbeu kua urikuwaa espada mukuĩ ruaxara saimbewaa.

¹³Hakuawate reiku Yurupari uikuwaa upe, hakuawa reiku santa serera rese, timaa reyumimi sese kua reruyariwaa, tiyuiri reyumimi seresewara aintauyuká rame nepiterupi kua tiwa ikuere umbeu serese serawaa Antipa, Yurupari uikuwaa rendawa upe.

¹⁴Maa aikuete yepeyepe puxuwera nerese, nyãse rerikute yepeyepe neruaki aintaumbue Balaão nyenga rese, kua umbue Balaki umuyusana kuaita israelitaita aintaumbau arama sukuera aintauxariwaa idulu supe aintaumunya arama yuiri puxuwera aintapira irumu.

¹⁵Aikuete yuiri neruaki kuaita yepeyepe aintaugustari kua aintaumbuewaa kuaita nikulaitaita.

¹⁶Kuiri sasiyara remanduari nepuxuwerasawa. Tirame sasiyara remanduari nepuxuwerasawa ape kuri hayuiri nepiri hamunya kera aintaruaxara irumu kua espada usemuwaa seyuru sui.

¹⁷Kua urikuwaa iapisa kuara usendu mayetaa Espiritu umbeu ainta supe kuaita ingrejaita, asui ixupe kua umuseranawaa haxari kuri kua timbiu uyumimiwaa, haxari yuiri kuri ixupe yepe ita kuairawaa murutingawaa, apete kuri yepe sera pisasua sese kua ita kuairawaa, tiwa awa ukuawa kua sera anyunte kua urikuwaa kua ita kuairawaa ukuawa ae.

¹⁸Asui rempinima ixupe kua ingreja anju uikuwaa Tiatira kiti: —Yawe umbeu kua Deus raira kua urikuwaa sesa kuaye tata yawe, asui ipi kuaye brunze sendiwaa yawe:

¹⁹—Hakuawate kuaita remunyawaita, hakuawate regustari puranga, reruyari puranga yuiri, repuraki puranga yuiri, hakuawate yuiri tinepiaiwa repurara, asui hakuawate repuraki turusu piri isui reyupiruwaa.

²⁰Maa hakuawa nerese yepe puxuwerawa, nyãse rexari timaarese kua kunya serawaa Jezabel, kua umbeuwaa utitikawaa ae, asui umbue ainta aintaumunya arama puxi, maa uganani yuiri ainta kuaita seyaraita aintaumunya arama tenyuntu aintapira irumu, aintaumbau arama yuiri sukuera aintauxariwaa idulu supe.

²¹Hasaruana sasiyara umanduari ipekadu, maa timaa uputari sasiyara umanduari ipuxuwerasawa.

²²Remaa, haxari kuri imãsi ae, asui kuaita umunyawaita aintapuxuwerasawa irumu, haxari kuri aintaupurara turusu tirame sasiyara aintaumanduari kua puxuwerawa uxariwaa aintaumunya.

²³Hayuká kuri kuaita imembiraita, asuiwana kuri panye kuaita ingreja aintaukuawa kuri ixete kua ukuawa panye aintaumanduarisawa aintapia upe yuiri, asui haxari kuri peyaweyawe sikuyara kua pemunyawaa.

²⁴Kuiri hambeu penye arama penye amuita Tiatira upewaita, penye tiwaita peiku inyenga rese, tiyuiri pekuawa kuaita aintaumbeuwaa Yurupari tiipisawa. Tikuri haxari pepurara mukuĩsawa.

²⁵Maa haputari anyunte pemukaturu santa kua perikuwaa ate hayuiri yuiri mukuĩsawa.

²⁶Kua umuseranawaa haxari kuri umundu kuaita miraita kua umunyawaa semuraki ate upawa.

²⁷Asui umundu kuri ainta ibatuna feru suiwara irumu, umukurui kuri ainta kuaye yamukuruiwaa yawe kamuti.

²⁸Kuaye sepaya uxariwaa yawe yuiri ixe arama, yawete yuiri kuri haxari penye arama kua estrela kuemaitewara.

²⁹Kua urikuwaa iapisa kuara usendu mayetaa kua Espiritu umbeu ainta supe kuaita ingreja.