Read Nhengatu Apukalipisi 6 Bible Online

Apukalipisi 6 - Nhengatu bible

Apukalipisi 6

¹Asui hamaa kua kurderu upirari yepe selu, asui hasendu yepe aintasuiwara kuaita kuatru upakawaita umbeu kuaye truvão nyenga yawe, umbeu: —Reyuiriana.

²Asui hamaa uri yepe kavalu murutinga, asui kua uwapikawaa sese urasu mirapara kera rupiara, asui aintaumee ixupe yepe kurua, asui usu umuserana arama, asui umuserana.

³Asui upirari irumu kua mukuĩsawa selu hasendu kua mukuĩsawa upakawaa umbeu: —Reyuiriana.

⁴Asui amu kavalu yuiri usemu, piranga ae, asui kua uwapikawaa sese upuderi uyuka timaaresesawa aintasui kuaita mundu puraita aintauyuyuká arama, asui aintauxari ixupe yepe espada ipukuwaa.

⁵Asui upirari irumu kua musapirisawa selu hasendu kua musapirisawa upakawaa umbeu: —Reyuiriana. Asui hamaa amu kavalu, pixuna ae, asui kua uwapikawaa sese uriku ipu upe yepe balansa.

⁶Asui hasendu yepe nyenga yawewaa aintapiterupi kuaita kuatru upakawaita umbeu: —Yepe litru trigu rikuyara yepe denariu, asui musapiri litru sevada rikuyara yepe denariu, maa tepemunya yawe azeti supe, tiyuiri vinyu supe.

⁷Asui kua kurderu upirari irumu kua kuatrusa selu, hasendu kua kuatrusa upakawaa umbeu: —Reyuiriana.

⁸Asui hamaa amu kavalu, itawa ae, asui kua uwapikawaa sese serawaa Manusawa, asui infernu usu sakakuera, asui aintauxari ainta supe kirimbawasawa aintauyuká arama kuatrusa parti aintasuiwara kuaita mundu puraita, aintauyuká ainta espada irumu, yumãsi irumu yuiri, mãsi irumu yuiri, asui suu nyãruwaita irumu yuiri kua mundu puraita.

⁹Asui upirari irumu sinkusa selu hamaa aintausapiwaa rendawa wirupi aintaanga kuaita aintauyukáwaita Deus nyenga resewara, sesewara yuiri kua aintaumbeuwaa sese.

¹⁰Asui aintausasemu kirimbawa, aintaumbeu: —Inde Yaneruixawa Kirimbawawaa, purangawaa Inde supiwa yuiri! Mairametaa rembeu arama aintarese reyuka arama yaneruwi rikuyara kuaita mundu puraita sui?

¹¹Asui aintauxari ainta supe aintayaweyawe aintarupa murutingawaa, asui aintaumbeu ainta supe aintaupitu xinga aramare kuairantu ate aintauyuká aramare kuri yuiri kuaita aintarumuaraita aintaimuita uruyariwaita aintayawe.

¹²Asui hamaa kua kurderu upirari kua sextu selu, asui uriri kirimbawa kua iwi. Asui pixuna kua kurasi kuaye fazenda pixuna yawe, asui piranga kua yasi kuaye tuwi yawe.

¹³Asui kuaita estrelaita aintauwari iwaka sui iwi kiti, aintauwari kuaye mirá figera iya yakira uwariwaa yawe iwitu upeyu irumu ae kirimbawa.

¹⁴Asui kua iwaka upawa kuaye yamamana yawe papera. Asui panye iwitera panye kaapuamu yuiri utirika ainta aintarendawa sui.

¹⁵Asui panye kuaita tuixawaita kua mundu upe, panye kuaita ipuwasuwaita, panye kuaita kumandantita, panye kuaita rikuita, panye yuiri kuaita kirimbawaita, panye yuiri rikuita kurumi asui kuaita patrãoimawaita yuiri aintausu aintauyumimi iwitera piterupi ita kuara piterupi yuiri.

¹⁶Asui aintaumbeu ainta supe kuaita iwitera ita supe yuiri: —Pewari yanerese peyumimi yande suwa sui kua uwapikawaa trunu upe, peyumimi yande isui ipiaiwasawa kua kurderu.

¹⁷Nyãse usikana kua ara turusu aintaipiaiwasawa, asui awataa maa upuderi upuamu suaxara.