Read Nhengatu Apukalipisi 7 Bible Online

Apukalipisi 7 - Nhengatu bible

Apukalipisi 7

¹Asui arire hamaa kuatru anju aintaupuamu kuatru mundu arukanga upe, aintaupisika panye kuatru iwitu tiarama aintaupeyu kua mundu kiti, yawaite aintaupeyu parana rese u mirá rese yuiri.

²Asui hamaa yuiri amu anju uyupiri kurasi usemuwaa sui uriku Deus upakawaa selu, asui kirimbawa usasemu ainta supe kuaita kuatru anjuita umuaiwawaita panye iwi parana yuiri.

³Umbeu: —Teremuaiware kua iwi parana turusuwaa yuiri mirá yuiri ate yamusangawa selu irumu aintaruwa rese panye kuaita yaneDeus supe aramawaita.

⁴Asui hasendu aintaumbeu ixe arama aintasiyasawa kuaita aintaumusangawaita selu irumu, sentu kuarenta kuatru mili aintasiyasawa panye kuaita Israel rairaita suiwara.

⁵Aintaumusangawa ainta selu irumu duzi mili aintasuiwara kuaita Judá suiwaraita, asui duzi mili yuiri aintasuiwara kuaita Ruben suiwaraita, asui duzi mili aintasuiwara kuaita Gadi suiwaraita.

⁶Asui duzi mili yuiri aintasuiwara kuaita Azer suiwaraita, asui duzi mili aintasuiwara kuaita Naftali suiwaraita, asui duzi mili aintasuiwara kuaita Manase suiwaraita.

⁷Asui duzi mili aintasuiwara kuaita Simeão suiwaraita, asui duzi mili aintasuiwara kuaita Levi suiwaraita, asui duzi mili aintasuiwara kuaita Izakar suiwaraita.

⁸Asui duzi mili aintasuiwara kuaita Zebulum suiwaraita, asui duzi mili aintasuiwara kuaita Juze suiwaraita, asui aintaumusangawa selu irumu duzi mili aintasuiwara kuaita Benjamĩ suiwaraita.

⁹Asui arire hamaa, asui hamaa siyawaa mira tiawa upuderi upapari muiri aintasiyasawa, aintasuiwara panye mira kua mundu upe, panye kuaita upurungitawaita aintayaweyawe, aintaupuamu umaa trunu runde sui kua kurderu yuiri, murutingawaa aintarupa, asui aintauriku aintaipu upe kuruwai ruã rawa.

¹⁰Asui aintaumbeu nyenga tiapuwaa irumu: —Kua salvasão iyara ae kua yaneDeus uwapikawaa itrunu upe, iyara yuiri kua kurderu.

¹¹Asui panye kuaita anjuita upuamu trunu ruaki aintaruaki yuiri kuaita serakuenawaita kuaita kuatru upakawaita yuiri, asui aintauyawika trunu runde sui, asui aintaumee purangawaa Deus supe,

¹²Aintaumbeu: —Amem. Iyara panye purangawaa, panye purangasawa, panye ukuawasawa, panye purangasawa purangawaa, panye yawaitesawa, panye umundusawa, panye kirimbawasawa yuiri, iyaraita ainta kua yaneDeus yawewarawate, amem.

¹³Asui yepe aintasuiwara kuaita serakuenawaita umbeu: —Awataa ainta? Asui maa suiwarataa ainta, urikuwaita aintarupa murutinga?

¹⁴Asui hambeu ixupe: —Seruixawa, inde rekuawa. Asui umbeu ixe arama: —Aintausemu isui kua turusuwaa aintaupurara, aintaumuyasuka aintarupa aintauxari murutingawaa ae suwi upe kua kurderu.

¹⁵Ape aintauiku Deus trunu runde sui, asui aintaupuraki ixupe templu upe muiri ara muiri pituna yuiri, asui kua uwapikawaa trunu upe umukaturu kuri ainta suka upe.

¹⁶Timaa kuri sasi ainta supe yumãsi, timaa kuri aintaisi ainta, timaa kuri kurasi umuturi aintarese kirimbawa, timaa yuiri aintaupurara sakuwaa.

¹⁷Nyãse kua kurderu uikuwaa ipiterupi kua trunu usaru kuri ainta, urasu kuri ainta ii rukena upakawaa ipiri, asui Deus kuri uyusi panye aintaresa yukise.