Read Nhengatu Apukalipisi 9 Bible Online

Apukalipisi 9 - Nhengatu bible

Apukalipisi 9

¹Asui kua sinkusa anju upeyu itrumbeta, asui hamaa yepe estrela uwari iwaka sui kua mundu kiti, asui aintaumee ixupe ixavi kua tiipiwaa rukena.

²Asui upirari sukena kua tiipiwaa asui tatatinga usemu sukena sui maye tata turusuwaa tatatinga yawe, asui tatatinga usemu sukena sui umusikindawa kurasi iwitu yuiri.

³Asui tatatinga sui aintausemu kuaita tukuraita kua mundu kiti asui yawaite ainta kuaye lakraya yawe.

⁴Asui aintaumbeu ainta supe arama kuaita tukuraita tiarama aintaumbau kapĩ kua mundu kiti tiyuiri panye mitima tiyuiri mirá, maa anyunte aintauputari aintaumuaiwa kuaita apigawaita tiwaita uriku Deus selu aintaruwa rese.

⁵Anyunte aintaupuderi aintaumpurarakari ainta sinku yasi, tiaintaupuderi aintauyuká ainta, asui aintaumpurarakari ainta kuaye lakraya upiĩwaa yawe ainta sainti irumu.

⁶Asui nyã ara upe kuri aintauputari kuri aintaumanu kuaita apigawaita maa tikuri aintauwasemu manusawa, kirimbawa kuri aintauputari aintaumanu maa kua manusawa uyawawa kuri aintasui.

⁷Asui kuaita tukuraita kuaye kavalu yawe ainta aintaumukaturuwaita kera rupiara, asui aintaakanga rese kuaita kurua uru suiwara, asui aintaruwa apigawa ruwa yawe.

⁸Asui aintaawa kunya awa yawe, asui aintaranya kuaye leão ranya yawe.

⁹Asui aintauriku kamixa feru suiwara yawe, asui yasendu aintapepu tiapu maye yasendu karu kavalu usikiwaa uyana arama kera kiti.

¹⁰Asui aintaruwaya kuaye lakraya yawe, asui aintauriku aintarainti yuiri aintaumpurarakari arama kuaita apigawaita sinku yasi.

¹¹Asui aintaruixawa kua anju tiipiwaa suiwara, serawaa Abadum ebreu nyenga rupi, asui gregu nyenga rupi serawaa Apulium.

¹²Kuiri usasawana kua primeru puxuwerawa. Maa yawe rire kuri uri mukuĩ yuiri puxuwerawa.

¹³Asui kua seisa anju upeyu itrumbeta, asui hasendu nyenga uriwaa kuatru arukanga sui aintausapiwaa rendawa uru suiwara uikuwaa Deus runde kiti.

¹⁴Umbeu ixupe kua seisa anju urikuwaa kua trumbeta: —Reyurawa kuaita kuatru anju aintaupukuariwaita simbiwa kiti kua paranawasu serawaa Eufrati.

¹⁵Asui uyurawa kuaita kuatru anju pruntuwaita aintausaru nyã ura, ara yuiri, yasi yuiri, akayu yuiri aintauyuká arama musapirisawa parti aintasuiwara kuaita apigawaita panye.

¹⁶Asui aintasiyasawa kuaita kavalu kera rupiara vinti mili viaji dezi mili, yawe hasendu aintaumbeu.

¹⁷Asui sekerupi hamaa kuaita kavalu, kuaita uwapikawaita kavalu rese aintauriku aintakamixa feru suiwara tata yawewaa pirangawaa itawawaa. Asui aintaakanga kuaye leão akanga yawe, asui aintayuru sui usemu tata, tatatinga enxufre yuiri.

¹⁸Asui aintairumu kuaita musapiri usemuwaa aintayuru sui umanu musapirisawa parti aintasuiwara kuaita apigawaita, irumu kua tata, tatatinga yuiri asui enxufre irumu yuiri.

¹⁹Asui aintakirimbawasawa kuaita kavalu uiku aintayuru upe, aintaruwaya upe yuiri, nyãse buya yawe aintaruwaya, asui aintaakanga irumu aintaumuaiwa arama.

²⁰Asui kuaita amuita apigawaita tiwaita umanu sesewara kua puxuwerawa tisasiyara aintaumanduari aintaumunyawaita puxi aintaipu irumu, tiaintakuere aintaumee purangawaa demuniwita supe idulu supe yuiri, kuaita aintaumunya uru irumu, prata irumu, kubri irumu, ita irumu, asui mirá irumu yuiri, kuaita tiwaita umaa, tiyuiri aintausendu, tiyuiri aintauwata.

²¹Asui tisasiyara aintaumanduari aintauyuká mira, tisasiyara aintaumanduari payesawa, tiyuiri warixisawa, tiyuiri sasiyara aintaumanduari aintaumundasawa.