Read Ninia Yali KEJADIAN 11 Bible Online

KEJADIAN 11 - Ninia Yali bible

KEJADIAN 11

¹It atam etma ap homi inunggul unuk domog kwenangma di obam su obam wereg on etma, enele we misig neg deg lit, di angge su angge unuk we misig on neg uruk katfag.

²Airoho neg wereg lit, o mo lahaik waharuk mu timur fil etma enanggwenang yugdoho on eleg en dag watil noruk kwit, donggo mun finik-fanoma o unuk Babilonia etma lebagdeg, “Dia nenobam yugdoho welamul,” bolug, bok aik lebagdeg welatfag.

³Etma wereg lit, it-it enele uruk kwit, “Nit kwenang dangge on fam helep hag omamne amag ulug indokma weraruhuk,” ebag. Airoho ebagdeg de o helep fam wutuk on fahet de, helep hagdoho amag ulug kwenang dangge werako feheg, ahalue anggot-kot on ter helep senggetdoho wutuk kwit, dag-duruk on ulug fouk deheg, duruk katfag.

⁴Airoho wereg ma, iren uruk kwit, “Nit nenebe o di o su o buhuluk eleg angge wereg lit, nininuk wereg lamag ulug de, o kota eke wutuk kwit de o eke yit-yaron sep hun-hun ambiang bohol fam witil lahakuk,” ebag.

⁵Airoho ebagdeg it wutuk mu At TUHAN en o kota witfag on anyo inim, o helep fam sep hun-hun witil laharuk katfag on anyo inim nil hamin ulug wambik lamin bebag.

⁶Wambik lamin bebagdeg aren uruk kwit, “It au inunggul unuk we misig neg wereg lit, enele oho misig at wereg lit diroho duhuk ulug wene keram lenggalswa on fam oho re au hihi. Ne, fobik de, iren, nit diroho dul nenenda, uhupmu re higitdoho neg duruk kamuhup men deg.

⁷Aireg fam, it-it eke en eke fam enele holuk eleg angge dukwag ulug niren enele naleg-haleg apdoho fesoul en wambukohon,” ulug, wambik watfag.

⁸Wambik watfagdeg At TUHAN en it enebe buhuloho di obam su obam wilibi fesebag ma, o kota witul ulug duruk katfag on anyo foma heila debelug wilipfag.

⁹O etma en at TUHAN en it ap homi enunggul unuk domog mundoho enele unggut naleg-haleg apdoho fesebagdeg, o di obam su obam buhuloho wilibi fesebag ai en de o etma unuk Babel[24] soalfag ai.

¹⁰Ap Sem ambiangma on enebe re su. Ik fu humon anyo watfag li em tahun biren debelug, at Sem ebe umur 100 tahun deg li at omalik ap angge eke unuk Arpakhsad endetfag.

¹¹Ai en at ebe umur 500 tahun ekenim wereg lit, omaliki foma amu on ninim endag-enepfag.

¹²Ne, at Arpakhsad umur 35 tahun deg li aren omalik ap angge eke unuk Selah endetfag.

¹³Ai en at Arpakhsad ebe umur 403 tahun eke inim wereg lit omaliki foma amu on inim endag enepfag.

¹⁴Ne, at Selah umur 30 tahun deg li aren omalik ap angge eke unuk Eber endetfag.

¹⁵Ai en at Selah ebe umur 403 tahun eke inim wereg lit, omaliki foma amu on inim endag-enepfag.

¹⁶Ne, at Eber umur 34 tahun deg li aren omalik ap angge eke unuk Peleg endetfag.

¹⁷Ai en at Eber ebe umur 430 tahun eke inim wereg lit, omaliki foma amu on inim endag-enepfag.

¹⁸Ne, at Peleg umur 30 tahun deg li aren omalik ap angge eke unuk Rehu endetfag.

¹⁹Ai en at Peleg ebe umur 209 tahun eke inim wereg lit, omaliki foma amu on inim endag-enepfag.

²⁰At Rehu umur 32 tahun deg li aren omalik ap angge eke unuk Serug endetfag.

²¹Ai en at Rehu ebe umur 207 tahun eke inim wereg lit omaliki foma amu inim endag-enepfag.

²²At Serug umur 30 tahun deg li aren omalik ap angge eke unuk Nahor endetfag.

²³Ai en at Serug ebe umur 200 tahun eke inim wereg lit omaliki amu on foma inim endag-enepfag.

²⁴At Nahor umur 29 tahun deg li omalik ap angge eke unuk Terah endetfag.

²⁵Ai en at Nahor ebe umur 119 tahun eke inim wereg lit omaliki foma amu on inim endag-enepfag.

²⁶Ne, at Terah umur 70 tahun deg li aren omaliki ap angge ininuk de Abram, Nahor, Haran inim endag-enepfag.

²⁷Hun Terah en omaliki endag-enepfag on de enunuk su: Abram inim, Nahor inim, Haran inim endag-enepfag. Ne, at Haran en de ap misig unuk Lot endetfag.

²⁸At Haran de akni ebe oluk wereg kweleg obam indipmu o Babilonia o unuk Ur etman waratfag.

²⁹Ne, at Abram en de ohwe Sarai hweleheg, Nahor en ohwe hun Haran ahaloho unuk Milka hweleheg debag. Ne, at Haran amloho ap angge eke unuk de Yiska endetfag.

³⁰Aireg famen de at hwe Sarai neg de ibili welatfag.

³¹Airoho wereg ma hun Terah o Kanaan waruhuk ulug, o Babilonia en kota Ur embeselug amloho Abram inim, omba Lot inim, ahaloho Sarai Abram ohwe anyo inim watfag. Watfag famen de lahuk ulug o Haran watfagdeg etma bok aik watfagdeg yugdoho welatfag.

³²Etma wereg lit at Terah ebe umur 205 tahun atfagdeg o etma en ebe waratfag.