Read Ninia Yali KEJADIAN 12 Bible Online

KEJADIAN 12 - Ninia Yali bible

KEJADIAN 12

¹ At TUHAN en Abram hweag-utuk kwit, “Hat de hobam indipmu inim, hakni ahain elekwe inim embeselug de o An den hweag-huruhukmu etma lahun.

²An den de haren ondohoma on humdoho saha uruk kwit enunggul unuk hum amag ulug hobahakuk. An den hat hebe fanoap hobahakeg, hunuk werehap hobahakeg, duhuk ai fam, hat halahasik de, ap homi amu on inim fanoap debeseruk karuhuk.

³ Ap homi eke en hat fanoapdoho hobaharuk halug it ai An den fanoap debeseheg, it eke en hat hururung hobahakup halug An den it ai hururung debeseheg, duhuk. Ne, hat fene en de, di ap homi su ap homi enunggul unuk domog[25] mundoho fanoap debesehuk,” ulug, hweag-etfag.

⁴At hun Abram ebe umur 75 tahun deg kweleg, at TUHAN en hweag-etfag ale anyo higitdoho o Haran embeselug o Kanaan watfag. At waharuk kwit de hwe Sarai inim, aut amloho Lot inim ne o Haran wereg lit, ap homi eke it enamingming angge amag ulug og-enepfag on inim, enengge di angge su angge inim hwelalug watfag. It enebe o Kanaan mundoho aik watfagdeg,

⁶at Abram o anggeleg kwe en il kumu hil watfagdeg de ousa ale duruk katfag ma o Sikhem en de o More e ousahan indipmu aik watfag. (Ne, eta li em ap homi o Kanaan enap kwenang ai fam etma welatfag.)

⁷ Eta aik watfagdeg wereg ma, At TUHAN ebe Abram olohotma enam aik watfagdeg, hweag-utuk kwit, “O kwenang An den it hat hambiangma en endag-amuhup on etma og-esahuk mu re suma,” ulug, hweag-etfag ma, at Abram en TUHAN olohotma enam aik watfag on anyo obahet wam waroho yaldukmu obale mezbah eke witfag.

⁸Airoho debelug de selatan fil etma duk-duk kwe en kota Betel en foma timur fil etma watfagdeg, o Betel en dulug o unuk Ai en dulug bul etma o sabo kemah eke witfag. Ne, o witfag ma etan barat fil etma re o Betel ai, ne, timur fil etma re o Ai. O etmano en obale mezbah eke witfagdeg TUHAN apne webag.

⁹Airoho debelug de o ekema en ekema laheg dil de o Kanaan en selatan fil etma lebag.

¹⁰Airoho lebag famen de o Kanaan etma siburu obok humon laharuk ale en de siburu sig atuk halug waruhuk ulug, selatan fil yatdoho o Mesir erahamu aik lebag.

¹¹Airoho lamin ulug lauk kwit o Mesir kwik laukmu horog aik lebagdeg, aren ohwe Sarai anyo hweag-utuk kwit de, “Hwe su, hat de hil aluli sibandoho mun fano deg lahen ma re,

¹²ap homi Mesir on en inil healug, Ai Abram ohwe hehe, ulug, hat hebe holuk angge heraho hobaharuk kwit an nowaruhup.

¹³ Angge re, haren, Ap sure an nowe, ulug hweag-esahun fano. Airoho uhun mu, iren hat hobahet an noluk nobahakupdeg fano nabuhup,” ulug, komo-debag.

¹⁴It airoho enele ulug, Abram lebagdeg o Mesir mundoho kwik lebag hag de, ap homi Mesir on en de hwe Sarai anyo orohole mun fano deg ma hebag.

¹⁵Aireg ma hebagdeg at raja autsi pegawai en oho inil hebag. Inil hebagdeg raja anyo hweag-irik lauk kwit, “Hwe eke orohole aluliroho buhun on eke hehe,” ulug, hweag-irik lebagdeg, hwe anyo walug ap raja obam walug lebag.

¹⁶Walug lebag ma at raja anyo en de hwe Sarai alahasikdoho Abram fanoap debeheg, ap homi Abram amingming angge welamag ulug og-ereheg, wam domba, kambing, sapi inim keledai, unta inim ulukdoho og-ereheg debag.

¹⁷Airoho debag famen, raja en hwe Sarai hwelebag ai fam at TUHAN en ap raja anyo inim at obam olma yabuk duruk on omano inim fam ouk indip namelmel on og-esebag.

¹⁸Airoho enobam atfag ma at raja anyo en Abram wol-debagdeg, hweag-utuk kwit, “Nunggwelug hwe sure an nohwe ulug hweag-nitihin fug? Keroho dirihin abi?

¹⁹Haren de hwele sure an naut irihin mu an den nohweap dirihik ai hwi? Hohwe ebe su hwelalug hangge lakin,” ulug hweag-etfag.

²⁰Airoho hweag-etfagdeg at raja anyo en autsi pegawai omano mingming enepuk kwit, “Abram ebe inim, ohwe inim angge di angge su angge omano mundoho inim o suman wilibi feseik lakiek,” ulug hweag-esebag.