Read Ninia Yali KEJADIAN 13 Bible Online

KEJADIAN 13 - Ninia Yali bible

KEJADIAN 13

¹At Abram o Mesir embeselug o Kanaan utara fil lamin ulug, o Kanaan en selatan fil etma watfag. Waharuk kwit de at ohwe inim, di angge su angge mundoho inim hwelalug waharuk mu at Lot anyo oho ombolim watfag.

²Abram owam de domba, kambing inim sapi inim angge emas, perak inim wereg ma at enggik dung ahun welatfag.

³Airoho waharuk kwit o Betel lamin ulug o ekema en ekema kweheg dil de o Betel dulug o Ai dulug etma aik watfag. Aik watfagdeg de ousama atam o sabo kemah saloho mezbah witfag ma etano aik watfagdeg TUHAN apne webag.

⁵Ne, at Lot ohore ahain elekwe on inim, amingming angge inim, owam domba, kambing inim sapi inim welatfag.

⁶It enebe birenet enowam humdoho welatfag ai fam enggelangge dotdeg ma inim misigmu welam fug ale atfag.

⁷Ai fam de at Abram amingming angge wam hwalduk katfag on inim, Lot amingming angge wam hwalduk katfag on inim suahal humon ebag. (Eta li it ap homi Kanaan on inim Feris on inim o etma welatfag.)

⁸Enamingming angge suahal airoho uruk katfag ma at Abram en Lot hweag-utuk kwit, “Nit de ninindip misig on deg lahe ma hat hamingming angge inim an namingming angge inim suahal uruk aire siag.

⁹Aireg ma nit nenemu domog minggitul fano. Ne, haren kwenang suma an yondi fil imihin halug an yahandi fil atmin, ne, haren an yahandi fil imihin halug an yondi fil atmin angge, haren momal-dakin o,” ulug, hweag-etfag.

¹⁰ Airoho hweag-etfag ma at Lot il alulukwe kumu hebagdeg ik Yordan donggoma huli en o kota Zoar huli etma il fu hauk men de, ik mun humdoho, At TUHAN eyabukmu hag[26] ite o Mesir kwenang fam hag wereg ma fu hebag. (O etma At TUHAN en o Sodom inim Gomora inim elehapdoho enowaruk eleg kweleg orohole mun fano airoho welatfag ai.)

¹¹At Lot il airoho hebagdeg o Yordan donggo fil etma momal-dalug de, at timur fil etma wirig atfag. Airoho it enebe biren anyo minggit-atfag.

¹²Minggit-atfagdeg, at Abram neg de o Kanaan etma bok atuk kweleg, at Lot anyo ik Yordan donggoma etma o kota anggeleg kwe etma kemah da witil ya witil lebag. Lebagdeg o Sodom it ap homi enobabut mun kwasikdeg lit TUHAN il hanim siag neg humdoho duruk on wereg ma horogdoho etma bok aik lebag.

¹⁴At Lot airoho mun wirig atfag ma TUHAN en Abram hweag-utuk kwit, “Hat hebe unduhuk lahenma eta unduhuk lit, hil ilihig-wirihig, nunggulig-funggulig fu hakin.

¹⁵ Kwenang hat hil fu hehenma etma abirangge hat hebe inim, haren ondohoma on inim akni atlug mundoho-mundoho welamuhup en ulug og-hesahuk.

¹⁶An den de haren ondohoma on enebe hum atlug kwenang amug-mug kwenangma enenggik en wenahauk fug aleroho wereg anyo hag, henebe henenggik en wenahauk fug aleroho henobahakuk.

¹⁷Kwenang etma abirangge hat og-huruhuk angge re hil emberim fil apma fil lundi fil yondi fil kumu hil lakin,” ulug, hweag-etfag.

¹⁸Airoho hweag-etfag ma, Abram en kemah salfag on anyo walug e ousahan salma ousa ale duruk katfag man horogma o unuk Mamre, o Hebron horog deg ma etma kemah salik lebagdeg TUHAN fahet mezbah witfag.