Read Ninia Yali KEJADIAN 14 Bible Online

KEJADIAN 14 - Ninia Yali bible

KEJADIAN 14

¹Eta li em ap enaknisi raja enebe ohwan welatfag. It ininuk de eke unuk Amrafel obam Babilonia on, ekere Ariokh obam Elasar on, Kedorlaomer obam Elam on inim Tideal obam Goyim on inim welatfag.

²Ne, it eneselei on raja enebe foaben amu on inim deg lit, weim yapuk katfag on ai ininuk de eke Bera obam Sodom on, Birsya obam Gomora on inim Syinab obam Adma on inim Semeber obam Zeboim on inim eke raja o Bela eke Zoar eheg uruk katfag on inim weim yapuk katfag.

³It ap raja foaben eta enebe misig sebe ulug de enautsi sehen foroho on tentara o Sidim fanggongma ketia ik Laut Mati weregma etma lohwalfag.

⁴It lohwalfag aire ap Raja Kedorlaomer en apma sebeloho fahat-enusug wereg kweleg neg tahun 12 en atfag famen de, tahun 13 angge neg de at along elehapdoho foul ulug weim abug ebag.

⁵Airoho ebagdeg weregman de tahun 14 anggere at Raja Kedorlaomer inim misig sebe ulug dog yapuk katfag enebe henahan etano enautsi tentara inim waharuk kwit de ap homi enunggul unuk Refaim o Asyterot-Karnaim etma enalong elehapdoho feseheg, it Zuzim enap it enobam Ham on etma enalong elehapdoho feseheg, it ap Emim enap enobam Syawe-Kiryataim on etma enalong elehap feseheg, debag,

⁶ai en it ap Hori on o dom fam Edom etma inim sebele fesebagdeg, sik-eneplug mug-eneplug de lei esanggoma yatma o unuk El-Paran etma feseik lebag.

⁷Airoho muko feseik lebagdeg, enembol somban o En-Mispat ketia unuk Kades uruk mu etma watfag. Waharuk kwit de ap homi Amalek on wereg ma mundoho sebele feseil waharuk kwit it ap homi Amori on o Hazezon-Tamar wereg on mundoho inim sebeloho fesebag.

⁸It raja ohwan anyo en airoho debeseik watfag ma it ap raja o Sodom on inim, Gomora, Adma on inim Zeboim, Bela on inim enautsi tentara og-eneplug ik Sidim fanggongma etma esan lohwalik wambebag.

⁹Lohwalik wambebagdeg de it raja Elam on inim Goyim on inim Babilonia on inim Elasar on inim weim yapfag ai fam de it raja enebe foaben anyo inim de it raja enebe ohwan anyo inim yapfag.

¹⁰Ik fanggong weim yapfag ma etma ahalue omamne on aspal ai hwenanggurukmu bohwe ele humdoho welatfag. Airoho wereg ma it raja Sodom on nim, Gomora on inim heye wilipuk men de it enebe biren et bohwe elma etmano wambebag. Ne, it raja foma henahan etano neg de koloroho wilipfagdeg domma etma watfag.

¹¹Airoho debag ma it ap raja enebe ohwan enomamne atfag on etano en de di angge su angge, ap homi o Sodom, Gomora on inim, nauk on foroho wereg on inim mun huhul hwelalug lebag.

¹²At Lot Abram aut amloho anyo o Sodom wereg ma angge anyo re it selei on omano en at ebe sabu hetdoho walug lauk kwit, angge di angge su angge inim hwelalug lebag.

¹³Airoho debag ma, ap eke weim ai fahet akolen wilibik watfag on en wene atfag ale anyo at Abram Ibrani on anyo bilinggoho hweag-irik watfag. Abram ebe e ousahan salma ousa ale duruk katfag ma, hun Mamre unggul unuk Amori on anggwenangma etma wereg ma hweag-irik watfag. Ne, at Mamre ebe inim ori Eskol, Aner inim eta Abram inim sebereg lit fanoreg latfag.

¹⁴Ap wene Abram hweag-irik watfag on anyo en Abram hweag-utuk kwit, “Haut amloho Lot anyo airoho duswa,” ulug hweag-etfag ma holfagdeg, at autsi o sum fam kemah saloho welatfag on omano andog-enepfag. Andog-esauk men de ap weim yapuk ale eneluk on de enebe 318 en atfag ma, it ap raja ohwan etano sik-mug eneplug lebagdeg de o kota Dan lebag.

¹⁵O etma aik lebagdeg at Abram en autsi etano enebe yohwandoho esan enemu heheg fesebag. Airoho debesebagdeg o hup angge sok lat-enepuk kwit enebe enowatil de sik-mug eneplug lebagdeg o Damsyik en utara fil o unuk Hoba etma feseik lebag.

¹⁶Airoho feseik lebagdeg, Abram en at Lot ebe inim angge di angge su angge huhul hwelebag angge omano inim, homi inim it ap foma sen-enepfag on inim deloho og-eneplug watfag.

¹⁷At Abram en at Raja Kedorlaomer inim it raja fomane inim sebe ulug weim yapuk katfag on inim enalong elehap debeselug de at Abram ambol somban watfag. Waharuk mu ap homi Sodom on enowe raja anyo at Abram waharuk mu olohotma ik Syawe fanggongma unuk ekere Raja obanggongma ulug uruk mu, etma lebag.

¹⁸ Etma ap unuk Melkisedek ap homi o Salem on enowe raja wereg lit, Allah Mun Leho wereg on fahet duruk on Imam welatfag on anyo en siburu roti inim anggur ahaik inim Abram og-irik watfag.

¹⁹Airoho og-etfagdeg fanoap deberuk kwit, “TUHAN Allah Mun Leho wereg on, at bohol kwenang wal-debag on anyo en fanoap hapuk kamag.

²⁰At Allah Mun Leho wereg on anyo en haselei on henggikmu fesimu sebele feselug wahen ma At neg unuk motdeg welamag,” ulug, hweag-etfag. Airoho hweag-etfag ma, At Abram en de di angge su angge huhul webagdeg sombandoho walug watfag on omano ebe domog at Abram en enggik wenag-heheg, sohoen on at fahat-dauk kwit misig-misig mangnoroho num on anyo at Melkisedek og-etfag.

²¹Airoho debag ma at raja Sodom on anyo en Abram hweag-utuk kwit, “Di angge su angge huhul angge wausa on deloho walug wahen angge aire, hat hwelauk kwit, ap homi an nomaliki on etma neg de an og-nimin,” ulug, hweag-etfag.

²²Airoho hweag-etfag ma at Abram en uruk kwit, “Nakni TUHAN Allah Mun Leho wereg on, At bohol kwenang wal-debag on ai owag.

²³An de hat hangge di angge su angge etman, eneyog ahut het-duruk on halug oho, hekel asigsig halug oho, an de eke hwelamin fug. Ne, an airoho wamin men de haren uruk kwit de, ‘An den Abram enggik dungap debehi’ ulug hweag-nuruhun fug en a? Airoho uhun lit deg.

²⁴Di angge su angge an nonggwaregdoho on ulug oho, eke hwelauk ale ai nerim. An den hwela hag de it an nautsi en mundoho nausa ai. Famen it nori ninim seberoho weim yabehe on hun Aner ha, Eskol ha, Mamre ha, neg de it inibil aha on eke enonggwareg en hwelowag,” ulug, hweag-etfag.