Read Ninia Yali KEJADIAN 15 Bible Online

KEJADIAN 15 - Ninia Yali bible

KEJADIAN 15

¹Airoho debagdeg at TUHAN Abram olohotma enam aik watfagdeg ele hweag-utuk kwit, “Abram, hakol bouk fug. Howatul ulug duruk kweleg, An den halong baloho fahat-husug welaheg, onggo humon og-hereheg, duruk karuhuk,” ulug, hweag-etfag.

²Airoho hweag-etfag famen, at Abram en uruk kwit, “TUHAN Allah Mun Leho on en, an nomalik eke og-nutuk kahen fug. Ne, an nabinggi angge re at namingming angge Eliezer o Damsyik[27] on au akni aruhu oma re, Haren alemaroho nunggwelug onggo ai og-huruhuk ulug ehen?” ulug, hein og-hebag.

⁴Airoho hein og-hebag ma At TUHAN en Abram ekenim hweag-utuk kwit, “Hat habinggi angge re hamingming angge ai en hwelahu fug. Ite, hat honggwareg hamloho en hwelahu,” ulug, ele hweag-utuk mu hol-hebag.

⁵ Airoho hweag-etfagdeg At TUHAN en Abram walug oluluk wilibik lebagdeg, hweag-utuk kwit, “Hil bohol fam lahap-halug sohwalanggen etlema henggik fam higitdoho wenahaken halereg a? Wal-hakin. Haren ondohoma on de sohwalanggen ai hag saha-faha uhup” ulug, hweag-etfag.

⁶ Airoho hweag-utuk mu holfagdeg, at Abram enda TUHAN fam dip-debebag. Airoho dip-debebag ai fam, TUHAN endama ahayeg boruk ale debebag ma ulug TUHAN en Abram fanoroho webag.

⁷Fobik at TUHAN en nikangge at hweag-utuk kwit, “An hakni TUHAN en o Ur Babilonia etma en kwenang suma hat akni aruhun en og-huruhuk ulug og-haplug waharihik,” ulug, hweag-etfag.

⁸Airoho hweag-etfag man at Abram en hein og-hauk kwit, “TUHAN Mun Leho on, kwenang suma an akni aruhuk ulug de nangginoho noluk aruhuk?” ulug hein og-hebag.

⁹Airoho hein og-hebag ma at TUHAN en onggo hweag-utuk kwit, “Haren an nobahet wam sapi hwe on eke inim kambing hwe on eke inim domba yohombuk on eke inim enebe domog de umur 3 tahun deg on neg wauk kwit, suwe yalma hag on eke inim suwe bel hag on eke inim eneko nobahaik ma,” ulug, hweag-etfag.

¹⁰Airoho hweag-etfag ma Abram en wam suwe ai TUHAN fahet feseik watfag. Airoho fesebagdeg wam sapi inim kambing domba inim anyo howit-heheg febagdeg biren heheg foma-foma erare febag famen de suwe neg de abirangge angge fesebag.

¹¹Airoho febag ma suwe ikwesahop hag di on su on wareg nauk on watfagdeg, wam sabu howisoho wereg on omano ino funggul-heheg namin ulug hweria aik waharuk mu, at Abram en siloho wilipuk katfag.

¹² Airoho duruk katfagdeg o mo obuk ikoho lit duruk kweleg, etano Abraham noho homogdoho nohobag. Airoho nohoruk kwit wereg ma fetagdoho etano amelmel hum atfag.

¹³ Airoho akol amelmel atfagdeg wereg ma, TUHAN en hweag-utuk kwit, “Haren ondohoma on de ap amu on enobam lahupdeg wereg ma, ap homi enobam indipmu on etma en enamingming angge enebeheg duruk men, 400 tahun di anggin su anggin enobam foruk kamuhup angge re, henda ebereg nu.

¹⁴ Aireg famen de it ap homi enobam indipmu on en haren ondohoma on enamingming angge enebeheg duruk kamuhup on ai An den siag onggo anggin on enobam fohuk. Fohuk mu haren ondohoma on o etma embeselug wilibik waharuk kwit, it enobam indipmu on en enengge di angge su angge humdoho hwelalug wilibik wamuhup.

¹⁵Hat hebe umur yatdoho wereg laruhundeg henda hambukdoho wararuhun mu, wareg sal-habuhup.

¹⁶Ap homi Amori on enobabut mun kwasikdoho duruk on anyo hum amuhupdeg duruk ale en siag onggo anggin on enobam feselug muko wilibi fesehuk on owan deg lahi. Anggere, haren ondohoma on de enebe hwili ohwan endag-amuhupdeg hat hombasi on o suma wamuhup,” ulug hweag-etfag.

¹⁷Airoho hweag-etfagdeg o hup atfag ma waruk fam indok fisako hobu fulohomdoho wilipuk on eke inim, esahe ombagbagdeg on eke inim diman waha eleg deg man enam atfagdeg, wam senggeleg omano hwiliroho erareg wereg ma bul healik watfag.

¹⁸ Airoho waharuk kweleg, etano At TUHAN en Abram wene sali wat-utuk kwit, “An den de, haren ondohoma on kwenang su abirangge og-esahuk. Og-esahuk alere o Mesir hwili etman Ik Efrat hwili,

¹⁹ap homi Keni, Kenas, Kadmon, enobam sili inim

²⁰Het, Feris, Refaim, enobam sili inim,

²¹Amori, Kanaan, Girgasi, Yebus on inim enobam wereg hwili etma abirangge og-huruhuk,” ulug, wene sali wat-utuk kwit hweag-etfag.