Read Ninia Yali KEJADIAN 16 Bible Online

KEJADIAN 16 - Ninia Yali bible

KEJADIAN 16

¹Hwe Sarai ap Abram ohwe anyo omalik enderuk fug angge welatfag. Airoho wereg latfag famen, at amingming angge hwele eke obam o Mesir on unuk Hagar welatfag.

²Airoho wereg ma at Sarai en Abram hweag-utuk kwit, “TUHAN en de an nomalik eke endag-dahu fug ulug enda boruk mu, hwe an namingming angge au en omalik eke an fahet enderuhu ane ulug hat hinim noho iek,” ulug hweag-etfag ma at Abram en fano ebag.

³Airoho ebag aire Abram ebe o Kanaan watfagdeg tahun 10 en welatfag ma, at hwe Sarai ai en hwe Hagar anyo Abram hweimohweap dowag ulug og-etfag.

⁴Airoho debagdeg, Abram hwe Hagar anyo inim nohobag ma omalik ahummu atfag. Ahummu atfag ma at hwe Hagar omalik ahummu atfag anyo oluk atfagdeg winik-wonog uruk kwit, “Hwe Sarai re maben hag,” ulug, bulip-debag.

⁵Airoho boruk katfag ma at hwe Sarai en Abram hweag-utuk kwit, “Hwe Hagar aire namingming angge on famen hat og-hitihik on anyo en omalik ahummu atsi on oluk atsireg, an endama en maben boruk. Airoho duruk aire indip hat siag fam.[28] Aireg ma re wene su fahet nit hat nim deg lahe ale aire at TUHAN en neg ayo wit-nesahu,” ulug hweag-etfag.

⁶Airoho hweag-etfag ma at Abram en uruk kwit, “Fano, at de hat hamingming angge on hat hapma wereg ma re, hat honggwareg henda boruk kahen ale higitdoho debemihin,” ulug hweag-etfag ma, at hwe Sarai en hwe Hagar mun siag-biagdoho debebag ma longgo ik lebag.

⁷Airoho longgo ik lebagdeg, o leimu ap homi elegma o unuk Sur lauk mu etma ik eleruk wilibik waharuk mu etma lebagdeg wereg ma, at TUHAN en ayonggo malaikat TUHAN eke akit mondorik watfag.

⁸Airoho watfagdeg ele hweag-utuk kwit, “Hwe Hagar Sarai amingming angge on su nerek, hat hebe o keman kema lamin ulug?” Ulug hweag-etfag ma at hwe Hagar en de “An de nisinga Sarai obam en longgo ik waharihik,” ulug, hweag-etfag.

⁹Airoho hweag-etfag ma at malaikat anyo en de, “Sombandoho hwe Sarai akit lalug, at let-duruk karuhun,” ulug hweag-etfag.

¹⁰Airoho hweag-etfagdeg eke hweag-utuk kwit, “An den de haren ondohoma on enebe mun hum-hamdoho ap homi en enenggik fam wenag-enebuk fug aleroho og-huruhuk.

¹¹Hat homalik hahummu ai ebe ap angge horog ketia endag-dahun. Ne, hat oba yatuk mu TUHAN esanggo mundoho holsi mu re unuk Ismael[29] ulug soaliyug.

¹²Airoho endag-dahun famen de homalik ai obabut de wam keledai maro on hag deg laruhu. Ne, at ebe re ori erekwi inim minggiroho wereg ma, ap homi enebe domog en at watul ulug deheg, aren it enowatmin ulug deheg, duruk kwit inim mun siagdoho welamuhup,” ulug hweag-etfag.

¹³Airoho hweag-etfag ma at hwe Hagar endaman de, “An de ai demdoho At Allah fubi nobaharuk on anyo nilen hihi famen, owan noluk welahi a?” ulug bebagdeg de TUHAN at fam ele mag-utuk katfag on anyo fahet unuk de, “Allah Fubi Nobaharuk on,” ulug soalfag.

¹⁴Airoho ebag ai en de ik hwenangguruk mu o Kades dulug Bered dulug bohwe habuligmu ai fahet de ap homi en de unuk, “At Oluk Mundoho Wereg lit Fubi Nobaharuk on Ahaik Sene,” ulug ebag.

¹⁵ At hwe Hagar anyo airoho hebagdeg, amloho ap angge endetfag ma akni Abram en unuk Ismael soalfag.

¹⁶Eta li em Abram ebe umur 86 tahun deg latfag.