Read Ninia Yali KEJADIAN 17 Bible Online

KEJADIAN 17 - Ninia Yali bible

KEJADIAN 17

¹At Abram umur 99 tahun deg li TUHAN en Abram olohotma enam aik watfagdeg, hweag-utuk kwit, “An Allah Nalong Wereg On de An. An nele hole folug higitdoho neg duruk kwit, An nendama nahayeg hauk kahi ale neg hundig-hundig duruk kamin.

²An den wene sali hat ninim wat-wat aheg, haren ondohoma on hum-hamdoho og-hereheg, duhuk,” ulug hweag-etfag.

³Airoho hweag-etfag ma at Abram en orohole belabeg sahaun-debelug apne webag ma, Allah en hweag-utuk kwit,

⁴ “An den wene sali su wat-hirik. An den hat hebe ap homi enunggul unuk esan humon enomba-ap habuhuk mu hunuk Abram uruk kamuhup fug, ite, Abraham[30] uruk kamuhup.

⁶An den hat hombasi hum-hamdoho endag-amag ulug hobahakuk mu, it on en eke raja inamuhup. Ne, haren ondohoma on airoho enebe hum aheg duruk kwit fobik enunggul unuk domog hum amuhup.

⁷ Hat hebe inim haren ondohoma on en endag-ail lauk kamuhup on inim diroho og-hesahuk ulug wene sali wat-hisihi on ai aham-duk fug angge dipdoho neg og-hesauk kwit mundoho-mundoho welaruhuk. Hat hakni Allah nebe An, ne, it haren ondohoma on enakni Allah oho An neg welaruhuk.

⁸ An den de kwenang hat hebe ap bohon hagdoho welahen ma, suma hat inim haren ondohoma on inim og-hesahuk. Kwenang mundoho o Kanaan suma haren ondohoma on akni amuhupdeg mundoho-mundoho wereg ma An Allah it enakni atlug welaruhuk,” ulug, wene sali wat-etfag.

⁹Airoho wat-etfagdeg eke hweag-utuk kwit, “Hat hebe inim haren ondohoma on en endag-enepil lauk kamuhup on inim en wene sali wat-hisihi ai fik-fu debelug higitdoho duruk nu.

¹⁰ Higitdoho duruk kwit, hat hebe inim haren ondohoma on ap mundoho inim de enahap bal-enepuk kamuhup.

¹¹Ketia hwili en omalik ap angge endag-atuk halug, enebe domog umur enenggik ligin en welatlug de enahap bal-enepuk kamuhup. Airoho bal-enepuk kwit, it hamingming angge on enomalik hat hobam en endag-enepuk halug inim, ne it ap hamingming angge ap bohon fam en onggo bal-enepihin halug inim oho airoho bal-enepuk kamuk. Airoho enahap bal-enepuk ai fam, An den hat nim wene sali ninim wat-wat atuhuk on anyo eneg deg welaruhu.

¹³Ap enebe mundoho enahap bal-enepuk kamuhup. Ne, an den wene sali wat-wat atuhuk on ai mundoho-mundoho welaruhu ulug, enenda wenggeloho enebe domog enahap eneg aleroho airoho bal-enepuk kamuhup.

¹⁴Ap misig eke en An den wene sali wat-wat atuhuk on ai sahaloho enahap balduk eleg halug, wene An den sali waroho og-enepihik on anyo sahaloho embesesi ulug de it enebe An nomaliki welamuhup fug,” ulug, hweag-etfag.

¹⁵Airoho hweag-etfagdeg fobik Abraham eke hweag-utuk kwit, “Haren hohwe unuk Sarai uruk karuhun fug. Ketia hwili en unuk Sara uruk karuhun.

¹⁶An den fobik fanoap debehuk mu at omalik an den hat og-huruhuk on enderuhu. An den at hwe Sara ai fanoap debehuk mu at ebe ap homi enunggul unuk humon enisinga aruhu. Ne, aren ondohoma on en de foma ininuk bogdeg raja unduhuk welamuhup,” ulug hweag-etfag.

¹⁷Airoho hweag-etfag ma, at Abraham orohole belabeg kwenangma sahaun ebagdeg Allah apne webag famen de endaman, “An nebe sobal mun umur 100 tahun deg lahi mu nomalik de higitdoho endereheg, ne, nohwe Sara ai ebe mun sobaldoho umur 90 tahun at deg ma, omalik de higitdoho endereheg, dehe halereg a?” bolug unda yatfag.

¹⁸Airoho bebagdeg Allah hweag-utuk kwit, “At Ismael en halug an nabinggi angge hwelahu fano ane?” ulug, hein og-hebag.

¹⁹Airoho hein og-hebag man Allah en de, “Eleg, hohwe Sara en homalik ap angge endag-huruhu angge at unuk Ishak[31] soaliyug. Omalik ai inim ne aren ondohoma on inim de inim an den hinim sali wat-wat atuhuk on ai mundoho-mundoho welaruhu.

²⁰Aireg famen de haren Ismael fahet hein og-napihin mu hele nesanggo holdihik ai en, an den at Ismael fanoap debeheg aren ondohoma on humdoho endag-amag ulug og-ereheg duhuk. Airoho duhuk mu aren ondoho ma on enowesi enunuk bogdeg on nesanggoen endag-enebeheg, ne, an den enebe mun hum-hamdoho enunggul unuk humap debeseheg duhuk.

²¹Aireg famen de wene sali wat-wat atuhuk on aire at hamloho Ishak Sara en tahun fobik on fam ketia eiya hag deg li endag-dahu on ai fam aruhu,” ulug hweag-etfag.

²²Airoho mundoho hweag-utlug Allah at Abraham embeselug lebag.

²³Lebag ma o ai salim at Abraham en Allah ele holoho, amloho Ismael ahap on baleheg, ap mundoho at obam welatfag on inim, amingming angge at obam en endag-atfag on inim, amingming angge onggo fam hun-enepfag on inim enahap on bal-enepfag.

²⁴Ne, at Abraham de umur 99 tahun deg li ahap balfag.

²⁵Ne, amloho Ismael de umur 13 tahun deg li ahap balfag.

²⁶Nukoho misig salim it enebe ai enahap balfag ai bal-enepuk kwit, Abraham amingming angge mundoho inim enahap bal-enepfag ai.