Read Ninia Yali KEJADIAN 18 Bible Online

KEJADIAN 18 - Ninia Yali bible

KEJADIAN 18

¹At TUHAN ebe Abraham olohotma o Mamre e ousa ahan indipmu etma enam aik watfag. Ai salim de nukoho mo olok en at Abraham o sum fam kemah wirigmu etano sokolma hwerieg wereg lit,

² elaha leko fu hauk men de ap enebe henahan angge at olohotma unduhuk wereg ma esebag. Airoho unduhuk mu esebagdeg, og-enepmin ulug buroho enelohotma lebagdeg, alukwe belabeg sahaun ulug,

³hweag-esauk kwit, “Naknisi, nobam suma kel wat-da fug angge bekit de laluhup fug. E indipmu suma kel waroho huramek. Airoho hwerieg wereg kweleg, an den ik oko heneyog ho-henepmin. Ne, aren nit nenobahet fano nenebukwag beiyek.

⁵Hit henebe henomamne atlug laluhup en ulug de nauk on lohon bobag-henepmin. Naknisi hiren an nalongap nobaharuk kwit henebe an henamingming angge nobam kwik wahep,” ulug, hweag-esebag. Airoho hweag-esebag ma, iren de, “Hat hobabut fano en og-nenebehen ma, dang-habehe,” ulug, hweag-etfag.

⁶Airoho dang-debag ma, at Abraham folo-folo obam kemah salegma etmano kwik lebagdeg, Sara hweag-utuk kwit, “Folo-folo tepung mun fano on sum fam yohwareg on misig eke wamihindeg roti duk on werarin,” ulug, hweag-etfag.

⁷Airoho hweag-utlug at de buroho wam sapi kabogdeg wereg ma etmano lebagdeg de sapi omalik seireg ma ino kul on eke sen-halug watfagdeg, at amingming angge eke en eserukwag ulug og-irik watfag.

⁸Og-irik watfag on anyo mundoho esetfag ma, at Abraham en sapi ahowe mel, ahowe ket angge lokoreg on inim, wam sapi osoho angge anyo inim walug de it ap bohon e indipmu hwerieg wereg ma enapma feik waharuk katfag. Airoho Abraham onggwareg en neg feik waharuk kweleg de it nauk katfag.

⁹Fobik it ap bohon etano en Abraham hein og-hauk kwit, “Hat hohwe Sara ebe kema wereg?” Ulug hein og-hebag ma, Abraham en de, “At de o sum on fam wirigmu etma wereg,” ulug hweag-esebag.

¹⁰ Airoho hweag-esebag ma, ap iron etano eke en uruk kwit de, “An bigalem soho en enam dahu[32] mu welaruhukdeg fobik henekit waruhuk. Airoho waruhuk mu eta li em hohwe Sara omalik ap angge endag-dahu,” ulug, hweag-etfag. Airoho uruk kweleg at hwe Sara de it ap bohon etmano enambolma o kemah saleg on anyo sokolma hwerieg wereg lit esanggo holeg welatfag.

¹¹At Abraham ohwe Sara inim mun sobal atfag ma, ne, hwe Sara ohwe amep mundoho bal-atfag ma, omalik enderuk fug alereg latfag.

¹² Airoho atfagdeg welatfag ma re at hwe Sara endama en unda yatuk kwit de, “An de mundoho sobal atihikdeg nahap mundoho halo isi oma re nahun inim nohoul nenda abi, ulug behi halereg a? Nahun oho re mundoho sobal atsi men anggere nakol,” ulug ebag.

¹³Airoho ebag ma, At TUHAN en Abraham hein og-hauk kwit, “Hwe Sara en an nebe mun sobal atihik mu omalik higitdoho enderihi halereg a? ulug ai beheikdeg unda yareheik ai nunggwelug?

¹⁴ An henakni TUHAN en duk fug alereg on eke wereg a? An den aruhu ulug hweag-hisihi ale anyoroho, bigalem soho en welatlug de fobik henakit waruhuk. Ne, An waruhuk li em etare hwe Sara omalik ap angge endag-dahu,” ulug hweag-etfag.

¹⁵Airoho hweag-etfag ma, hwe Sara anyo akol en de, “An unda yarihi fug,” ulug, awea webag. Awea webag ma, At TUHAN en de, “Fahe hat demdoho unda yarehen anyo,” ulug, hweag-etfag.

¹⁶Etano it airoho ulug, ap bohon henahan anyo lowag ulug Abraham en monde feseik lebag. Lebagdeg de obale o Sodom inil belap-ha lauk mu eke aik lebag.

¹⁷Lebagdeg At TUHAN endama en uruk kwit, “An den fobik dimin ale fahet Abraham fam herahamin fug.

¹⁸Aren ondohoma on enunggul unuk hum atuk kwit enomamne humon welamuhup fug no? Ne, at fene en de di ap homi su ap homi kwenangma on enunggul unuk domog[33] fanoap enebuhuk fug no? Enebuhuk neg.

¹⁹At omaliki inim aren ondohoma on en endag-enebuhup on anyo en, An ninim wene sali wat-wat atuhuk on anyo foroho lit higitdoho duruk kwit, bekitdoho deheg, dipdoho neg deheg, duruk kamag ulug komo enepuk karuhu en momaloho unduhuk ferihik. Iren ai mundoho duruk kamuhup halug An den Abraham wene sali ninim wat-wat atuhuk on ai ebe mundoho dip-debehuk,” ulug ai bebag.

²⁰Endama airoho bebagdeg At TUHAN en Abraham hweag-utuk kwit, “It ap homi Sodom Gomora on inim siag humon duruk ulug enebug siag on uruk mu nesanggo holduk kahi.

²¹Ai halug, it siag duruk ulug enebug siag on uruk ai en demdoho uruk ane seiale uruk a, ulug horogma en ha wambik lamin behi,” ulug, hweag-etfag.

²²Airoho hweag-etfagdeg it ap bohon enebe biren etano o Sodom Gomora lauk kweleg de At TUHAN neg de Abraham inim welatfag.

²³Inim wereg lit, Abraham en TUHAN aluluk aik lebagdeg hein og-hauk kwit de, “Haren ap homi siag duruk on mun elehap debeseruk kwit de, it foma siag duruk eleg on oho anggin on enobam folug elehap debesemin ulug a?

²⁴O kota etma ap homi enebe 50 en siag duruk eleg on wereg lalepman Haren ap homi o kota etma on mundoho elehap debeselen a? It ap homi enebe 50 en ai enoluk welamag ulug Haren o kota mundoho enowatuk ale embesemihin fug a?

²⁵Haren it ap homi siag duruk on ai binggi enowatuk kwit it siag duruk eleg on ai et enowatmihin hayog. TUHAN nakni airoho re duk fug. Ne, Haren Airoho enowatmihin halug de, it siag duruk eleg on etmano re it siag duruk on etmano enesahalimu ininim unggum enobam fohun lit deg. O bohol kwenang su enawene bilinggoho ayo wiri folug dipdoho neg duruk kahen on en de airoho eke dehen ha alereg a?” Duk fug alereg! ulug ebag.

²⁶Airoho hweag-etfag ma, At TUHAN en uruk kwit, “Ap homi enebe 50 en ai siag duk fug angge o Sodom demdoho wereg ma eselereg en de it eta enalahasik de kota etma on mundoho enahap wendat-enebuhuk,” ulug hweag-etfag.

²⁷Hweag-etfag ma, at Abraham en fobik eke inim uruk kwit, “Nakni an sure nebe ap homi on di wene su wene uk fug alereg kweleg, nakol eleg angge wene su ambiangma eke inim hweag-hitmin angge re bet-nabuk fug, nakni.

²⁸Ai famen de, ap homi siag duruk eleg on wereg ihi ai enebe 50 en wereg fug, ite, we 45 en wereg ane, boruk kahi mu, ap homi enebe foaben neg eleg ai en o kota etma on abirangge elehap debemin behen a?” Ulug hweag-etfag ma, At TUHAN en uruk kwit, “O etma ap homi enebe 45 en siag duruk eleg on wereg ma esamin halug de ap homi o kota etma on elehap debesehuk fug,” ulug hweag-etfag.

²⁹Airoho hweag-etfag ma, at Abraham en ekenim uruk kwit, “Ap homi siag duruk eleg on ai enebe 40 en neg wereg halug haren keroho enebehen halereg?” Ulug hweag-etfag ma, At TUHAN en onggo hweag-utuk kwit, “Ap homi enebe 40 en enalahasik de An nendama ahe laharuk kwit enowatmin ulug duruk kahi on ai embesehi halereg,” ulug hweag-etfag.

³⁰Airoho hweag-etfag ma, at Abraham en uruk kwit, “Nakni abi! An wene ekenim hweag-hitmin anggere hendama en holok nobam fouk fug. Ap homi siag duruk eleg on enebe 30 en neg wereg halug, haren keroho enepmihin?” Ebag ma, At TUHAN en de, “O kota etma ap homi siag duruk eleg on enebe 30 en wereg halug de enowatmin ihi on ai embesihi halereg,” ulug hweag-etfag.

³¹Airoho ebag ma, at Abraham en uruk kwit, “Nakni yei! An de nakol eleg angge hweag-hitil neg lamin aire bet-nabuk fug nakni. Ap homi siag duruk eleg on enebe 20 en neg wereg halen de keroho enebehen halereg?” Ulug hweag-etfag ma, At TUHAN en de, “Ap homi siag duruk eleg on enebe 20 en eta demdoho wereg ma esauk kahi halug, o kota etma on elehapdoho fesehuk fug,” ulug hweag-etfag.

³²Airoho hweag-etfag ma, Abraham en ambiangma fotogdoho uruk kwit, “An den wene dorangge eke hweag-hitmin angge hendama holok nobam fouk fug, nakni.” Ulug hweag-etfag ma, At TUHAN en uruk kwit, “Ap homi siag duruk eleg ai enebe 10 en eta demdoho wereg lalepman de, An den ap homi o kota etma on mundoho elehap debesemin fug,” ulug hweag-etfag.

³³Airoho mundoho ulug At TUHAN anyo lebag ma, at Abraham sombandoho obam watfag.