Read Ninia Yali KEJADIAN 2 Bible Online

KEJADIAN 2 - Ninia Yali bible

KEJADIAN 2

¹Aireg ma, At Allah en bohol kwenang inim bohol kwenang fam wereg angge inim mun fotogdoho wal-debesebag.

² Airoho mun wal-debesebagdeg, nukoho sabit salim enggik kel waroho welatfag.

³Allah en mundoho wal-debebagdeg, nukoho sabit salim kel waroho welatfag on fanoap debelug, “Nukoho sabit angge su an nonggwareg fahet ene fahat dihi,” ebag.

⁴Allah en bohol kwenang mundoho wal-debebag ale re ai. TUHAN Allah en bohol kwenang ebe inim, bohol kwenang fam wereg angge inim wal-debebag li em,

⁵Aren osit owan belabik waheg, ne ap homi yabuk wutuk on owan welaheg, deg fug mu anggen feheleg eleg angge welaheg, kwenang fam di enggela su enggela eke wilibig eleg angge welaheg, deg latfag.

⁶Aireg latfag famen de, ik kwenangma en fululukdoho wilibik waharuk kwit, kwenang abirangge oweril lauk katfag.

⁷ Ai en fobik At TUHAN Allah en kwenang dorangge lohon webagdeg lohoum-lohoumdoho ap[5] debebagdeg de sat enebe enoluk enepuk on ele ahe ambiang elekwe fu-roho kwelabe febag. Airoho kwelabe febag ma ap anyo oluk atfag.

⁸Ai en At TUHAN Allah en airoho wal-debebagdeg mo lahaik waharuk fil etma kwenang yabuk eke unuk Eden yaho folug, aren ap wal-debebag on anyo oko yabukmu etmano febag.

⁹ Airoho febagdeg At TUHAN Allah en di ahan su ahan orohole fano on inim anggen fano yihiruk on inim wilibukwag ulug debebag. Airoho wilibi febag ma sahalimu etma re e eke re anggen nauk mu enebe enelugap enepuk on eke wilibi feheg, ne, e eke re anggen nauk mu wene di wene su wene fano wene eneluk aheg,[6] siag wene eneluk aheg duruk on wilibi febag.

¹⁰Eden yabukmu wilibig on omano oweruruk kamag ulug de yabukmu etma en ik eke fulohomdoho wilipuk katfag. Ne, Eden yabukmu etma en wilibik lalug de agdoho ohwan wirig-atuk katfag.

¹¹Ik atam on unuk de Pison; ik aire o Hawila kwenangma etma maseroho wirig atuk.

¹²O etman de emas fano on mel, ahalue amben fano on o amumu en wa fug on mel, helep anggen permata onggo hum angge fam balduk on mel wauk.

¹³Ik bireneg on de unuk Gihon; ik ai re o Kus[7] kwenangma etma maseroho wirig atuk.

¹⁴Ik henahaneg on de unuk Tigris ai ambut de o Asyur en foma fil mo lahaik waharuk fil etma wirig aik lauk. Ne, ik ohwaneg on de unuk Efrat.

¹⁵Ai en At TUHAN Allah en ap anyo oko o Eden yabukmu etma wereg lit yabuk wireheg, hwaleheg, duruk kamag ulug etma febag.

¹⁶Ne, At Allah en ap anyo hweag-utuk kwit, “Di ahan su ahan yabukmu wilibig on oma abirangge anggen bal-dalug nauk karuhun famen de,

¹⁷e anggen nauk mu di wene su wene fano on mel siag on mel eneluk atuk on au neg de anggen dahanoho na fug. Ne, e anggen ai nahun halug de, hat nauk li eta at hebe wararuhun,” ulug, hweag-etfag.

¹⁸Airoho hweag-etfagdeg, TUHAN Allah en uruk kwit, “Ap su neg amu ilmu siagdoho wereg ale siag deg ma re, at let-hauk kamag ulug are eke inim higit on wal-itmin,” ulug, ebag.

¹⁹Airoho ebagdeg kwenang anggen dorangge enggikmu webagdeg lohoum-lohoumdoho, wam, suwe, bak, kisu mel kwenang kwe noruk karuhu ulug inim, kolo kwe daril noruk karuhu on ulug inim buhun-debebag. Buhun debebagdeg, “Ap anyo en keroho enenuk hundomog soalmisi e,” ulug, Allah en ap anyo akit feseik watfag. Di angge su angge enenuk soalukwag ulug feseik watfag ma enenuk soalfag on indip de ai.

²⁰Airoho ap anyo akit walug feseik watfag ma di angge su angge kwenang kwe noruk angge inim, kolo kwe daril noruk angge inim abirangge ininuk soal-enepfag. Ai debebag famen de, di angge su angge ininuk hundomog soal-enepfag on etma enesahalimu en eke at are at let-hauk kamag ulug at inim higit on misig eke welatfag fug.

²¹Airoho deg latfag ma, At TUHAN Allah en ap anyo noho homogdoho nohoukwag ulug debebag ma at nohoruk kweleg, At TUHAN Allah en ap anyo obal owag eke liako webagdeg, obale kwe anyo ino fam dopno-debebag.

²²Ap obal owag anyo fam Allah en hwe wal-debebagdeg ap anyo akit og-irik watfag.

²³Airoho og-irik watfag ma at ap anyo en de, “At su owag de an nowag on, An ap on famen oko buhun-deheik ma, At su ino re an nino on, An ap[8] on famen buhun-nabeheik ma, At su unuk de hweap ulug soalihi,” ulug, ebag.

²⁴ Airoho buhun-debag ai en de ap en isinga akni embeselug, ohwe inim sebe atlug, it biren anyo misig neg atuk.

²⁵It ap inim hwe inim eta enebe enebulukwe kohouk angge wereg lit en de enenggali eleg angge welatfag.