Read Ninia Yali KEJADIAN 20 Bible Online

KEJADIAN 20 - Ninia Yali bible

KEJADIAN 20

¹Hun Abraham anyo o Mamre en de o Kanaan selatan fil etma lebagdeg o Syur dulug Kades dulug bul etma yugdoho welatfag. Etma welatlug fobik o Gerar il eke wereg lit de,

² at ohwe Sara anyo fahet de, “Aire an naut,” ulug, ebag. Airoho ebag ma, ap Raja Abimelekh Gerar ahun anyo en hwe Sara ai wag lalug at akit wamag ulug mon-enepfag.

³Hup misig fam de raja anyo a og-hauk men Allah olohotma enam atfagdeg hweag-utuk kwit, “Hwe aire ahun wereg kweleg wehen ma re hat hebe wararuhun,” ulug hweag-etfag.

⁴Airoho hweag-etfag famen de at Raja Abimelekh en hwe Sara owan ahap sen-hebag fug mu, at anyo en uruk kwit, “TUHAN, an de siag dirihik fug nahun! Haren de an nebe inim nomaliki an nunggul unuk on inim elehapdoho nenobahakun a?

⁵At Abraham onggwareg en uruk kwit de, Hwe aire an naut, isi, ne, at hwe ai onggwareg en ohore, An de Abraham aut, isi. Ai halug wene ai fahet de nenda anggen mun buhundeg lit dirihik mu, an de siag dirihik fug boruk kahi,” ulug hweag-etfag.

⁶Hweag-etfag ma, At Allah en onggo a fam hweag-utuk kwit, “Demdoho, hat henda anggen mun fano deg lit dirihin ai An noluk deg ma, An nobam siag dehen ha no ulug hahap wendare hobahaki. Haren hwe ai ahap kei howag ulug embesehi fug ai.

⁷Ai famen de hwe ai ahun de nawene hweag-esauk on nabi deg ma, hat waram no ulug somban hobahet imisi angge re, ketia hwe ai ahun onggwareg og-imin. Wenggel-hakin! Haren hwe ai ahun onggwareg og-itmihin fug halug de hat hebe inim hat homaliki hwal-enepuk kahen on mundoho inim waramuhup,” ulug hweag-etfag.

⁸Airoho hweag-etfag ma, likia hubetdoho re Abimelekh en it autsi pegawai omano wol-enepfagdeg debag ale anyo mundoho dindiloho hweag-esebag ma, it mundoho enekol humon atfag.

⁹Ai debagdeg at Abimelekh en hun Abraham anyo wol-debagdeg hein og-hauk kwit, “An den siag hat hobam nangginig on dirihik mu haren anggin on an nebe inim ne an nomaliki melal-enepuk kahi on inim nenobam feik wahen? Nit nenobam sure keroho on nenobahaken abi? Aireg on aire an nobam de nenobahauk fug alereg on famen debehen.

¹⁰Nunggwelug haren airoho dehen abi?”

¹¹Ulug airoho hein og-hebag ma, at Abraham en onggo hweag-utuk kwit, “An den wenggel-hauk kwit de, o suma ap homi enenda Allah fam enekol boruk on eke wereg fug mu it ap an nohwe su enenda nauk on en hwelauk kwit an nebe binggi nowaruhup berihikdeg dirihik.

¹²Ebe re demdoho at aire an naut. Nenakni misig famen de nenesingasi amu-amu en ondoho lit og-og atuhuk.

¹³Allah en an mingming-napuk kwit, Hakni obam embeselug o hapeleg kwe etma da nohweil ya nohweil noruk kamin, ulug hweag-nitsi mu re, an den nohwe hweag-utuk kwit, Henda an nobam neg dipdeg lahen halug de ap amu on fam de au an nowe iyug, ulug hweag-itihik,” ulug hweag-etfag.

¹⁴Anyo airoho hweag-etfag ma, at Abimelekh en hwe Sara anyo hun Abraham akit feik lauk kwit aren amingming angge inim wam domba, sapi inim og-etfag.

¹⁵Og-utuk kwit de at raja anyo en Abraham hweag-utuk kwit, “An nobam nanggwenang de oma anggere haren kumu halug henda bemihin mu etma welamin,” ulug hweag-etfag.

¹⁶Ai en hwe Sara anyo hweag-utuk kwit, “Hat demdoho siag dehen fug ulug ap homi en enolukdoho eneg anggere howe uang perak on 1.000 en og-irihi ai,” ulug hweag-etfag.

¹⁷Hwe Sara hun Abraham ohwe fam atfag ale anyo en de TUHAN en homi hun Abimelekh obam olma wereg on omano mundoho ibiliap debebag man, Abraham en Allah fam somban ebag ma, Allah en Abimelekh ebe hilinggeheg ohwe inim homi amingming angge omano inim hilinggi feseheg debag ma, homi omano enomalik endag-enepfag.